पीसीआर मेसिन खरिदका लागि वीरगन्ज महानगरलाई एकै दिन ७० लाख सहयोग

A+ A A-

कोरोना भाइरसको जाँच गर्ने पीसीआर मेसिन खरिदका लागि वीरगन्ज महानगरपालिकालाई एकै दिन ७० लाख रुपैयाँ सहयोग प्राप्त भएको छ । वीरगन्ज उद्योग वाणिज्य संघले ११ लाख ११ हजार १ सय ११ र वीरगन्जका विभिन्न व्यवसायीहरूले ५९ लाख गरी ७० लाख रुपैयाँ सहयोग गरेका हुन् ।

कोरोना परीक्षणको दायरा बढाउन आवश्यक रहेको भन्दै महानगरपालिकाले मेसिन खरिदका लागि आर्थिक सहयोगको सार्वजनिक आह्वान गरेको थियो । पर्सालाई कोरोना संक्रमणमुक्त बनाई ग्रीन जोनमा परिणत गर्नका लागि बढी थ्रोट स्वाब परीक्षण आवश्यक पर्ने भएकाले वीरगन्ज महानगरले पीसीआर मेसिन खरिदका लागि आर्थिक सहयोगको आह्वान गरेको थियो ।

आह्वानअनुसार वीरगञ्जका उद्योगी व्यसायीले मेसिन खरिदका लागि चाहिने ७० लाख रुपैयाँ आज महानगरपालिकालाई प्रदान गरेका हुन् । महागरपालिकामा आयोजित कार्यक्रमममा वीरगन्ज उद्योग वाणिज्य संघका अध्यक्ष गोपाल केडियाले ७० लाख ११ हजार रुपैयाँको चेक नगर प्रमुख विजय सरावगीलाई हस्तान्तरण गरे ।

वीरगन्ज उद्योग वाणिज्य संघले ११ लाख ११ हजार रूपैयाँ सहयोग गरेको छ । बाँकी ५९ लाख रुपैयाँ संघको आग्रहमा उद्योगी व्यवसायीले महानगरलाई दिएका हुन् । उद्योगी वीरेन्द्र संघाइले २० लाख , बाबुलाल चाचानले १० लाख , राजेश अग्रवालले ६ लाख , हिरालाल केडिया, आत्माराम काबरा, मुरलीधर रुंगटा र अनिल रुंगटाले जनही ५/५ लाख रुपैयाँ सहयोग गरेका हुन् । अशोक बैद्यले २ लाख र चिरन्जीवी सरावगीले पनि १ लाख रुपैयाँ दिएका हुन् ।

यसअघि सोमबार बाराको सूर्य नेपाल प्रालिले पनि महानगरपालिकालाइ १५ लाख रुपैयाँ प्रदान गरेको थियो । पर्साको पटेर्वा सुगौली गाँउपालिकाले पनि कोषमा २५ लाख रुपैयाँ सहयोग गरेको छ । यसबाहेक वीरगन्जका सामुदायिक विद्यालय , विभिन्न संघसंस्थाले पनि महानगरको विपद व्यवस्थापन कोषमा कोषमा रकम उपलब्ध गराएका छन् ।

६ जेठमा महानगरपालिकाकाको समन्वयमा जिल्लाका सबै पालिकाका प्रमुख, प्रदेश सांसद, राजनीतीक दलका प्रमुख, उद्योगी व्यवसायीको सहभागितामा सर्वपक्षीय बैठक बसेको थियो । बैठकमा नगर प्रमुख सरावगीले कोभिड विरुद्धको लडाइमा महानगरलाई सहयोग गर्न आग्रह गरेका थिए ।

उनको आग्रहमा बैठकले जिल्लाका सबै पालिकाबाट गरी ५ करोड र उद्योग वाणिज्य संघ लगायत उद्योगी व्यवसायीबाट ५ करोड गरी १० करोड रुपैयाँको प्रकोप कोष स्थापना गर्ने निर्णय गरेको थियो ।

मंगलबारसम्म महानगरको प्रकोप व्यवस्थापन कोषमा २ करोड ५० लाख भन्दा बढी रकम जम्मा भइसकेको नगर प्रमुख सरावीले जानकारी दिए । उनका अनुसार कोषमा महानगरपालिका आफैले १ करोड रकम जम्मा गरेको छ । बाँकी डेढ करोड रुपैयाँ विभिन्न संघसंस्था र दाताबाट सहयोग स्वरुप प्राप्त भएको नगर प्रमुख सरावगीले जानकारी दिए ।

पर्साकै बहुदरमाइ नगरपालिकाले पनि बुधबार ५० लाख रुपैयाँ कोषमा सहयोग गर्ने प्रतिबद्धता जनाएको सरावगीले बताए । महानगरले पीसीआर मेसिन खरिदका लागि टेण्डर (बोलपत्र) आह्वान गरिसकेको जानकारी दिँदै सरावगीले भिटिएम किट खरिदको प्रक्रिया पनि भोलिदेखि सुरु गर्ने जानकारी दिए ।

वीरगन्जका मेयर सरावगीका अनुसार आफ्नो मेसिन जडान गरेपछि दैनिक दुई हजारदेखि तीन हजार परीक्षण गर्न सकिने छ । जिल्लालाई छिट्टोभन्दा छिट्टो ग्रिन जोनमा लगिएन भने अन्य गतिविधि गर्न नसकिने र लामो समयसम्म लकडाउनमा बस्नुपर्ने उनले बताए ।

‘पीसीआर मेसिन र त्यसमा लाग्ने सबै उपकरण समेत गरेर करिब ६५/७० लाख पर्छ, त्यसका लागि चाहिने रकम उद्योगी व्यपारीले दिएका छन्, सरावगीले भने, ‘मेसिन र किट खरिदपछि महानगरले नारायणी अस्पतालमै मेसिन उपलब्ध गराउँछ । त्यहीँबाट जेकजाचको काम हुन्छ ।’

नारायणी अस्पतालमा यसअघि नै संघीय सरकारले पठाएको पीसीआर मेसिनबाट कोरोनाको परीक्षण हुँदै आएको छ । अब महानगरपालिका आफैले अर्को मेसिन खरिद गरेपछि नारायणी अस्पतालमा २ वटा मेसिनबाट कोरोनाको परीक्षण हुनेछ ।
एउटा मात्र मेसिन मात्र हुँदा त्यसले आवश्यकता भएजतिको कोरोना परीक्षण हुन नसकेपछि जिल्लामा परीक्षणको दायरा बढाउन महानगरपालिका आफैले थप एउटा मेसिन खरिदका लागि अगाडि सरेको सरावगीले बताए ।

अब २ वटा मेसिन भएपछि परीक्षणको दायरा निश्चि बढ्छ, उनले भने, ’यदि पालिकाले सहयोग गरे भने जिल्लाका प्रत्येक नागरिकको परीक्षण गर्ने हाम्रो योजना छ । पीसीआर मेसिन र किट खरिद पछि कोषमा बाँकी रहने रकम वीरगन्जमा संचालित क्वारेन्टाइन र कोभिड १९ अस्पताल संचालन र व्यवस्थापनमा खर्च गरिने सरावगीले जानकारी दिए ।

पछिल्लो २४ घण्टामा प्रदेश २ मा ५४ जना व्यक्तिहरुमा कोरोना संक्रमणको पुष्टि भएको छ । यो सँगै यस प्रदेशमा संक्रमितको संख्या १ हजार ३ सय ७७ पुगेको छ । प्रदेश २ सबैभन्दा बढी प्रभावित क्षेत्रमा परेको छ । यसै प्रभावलाई ध्यानमा राखी प्रदेश २ सरकारले पनि थप ४ वटा कोरोना परीक्षण गर्न पीसीआर मेसिन खरिद गर्ने निर्णय गरेको छ ।

कोरोना महामारी नियन्त्रणका लागि प्रदेश २ का मुख्यमन्त्री लालबाबु राउत नेतृत्वको निर्देशक समितिको बैठकले थप ४ पीसीआर मेसिन खरिद गर्ने निर्णय गरको हो ।

मेसिन सञ्चालनमा रहेको जनकपुरधाम, वीरगञ्ज र राजविराजको ल्याबमा १/१ र रौतटहको गौर अस्पतालमा नयाँ ल्याब सेटअप गर्ने गरी ४ वटा पीसीआर मेसिन खरिद गर्ने निर्णय गरेको बताइएको छ ।

प्रकाशित मिति: मंगलबार, जेठ २७, २०७७ १९:२७