सरोकारवालाको आँखा छलेर महाभारत वनलाई आरक्ष बनाउने तयारी

A+ A A-

वर्षौँदेखि डडेल्धुराको महाभारत वन क्षेत्रलाई संरक्षित वन क्षेत्र बनाउन लाखौँ खर्च गरिसकेको डिभिजन वन कार्यालयले सरोकारवालाको आँखा छल्दै आरक्ष बनाउने तयारी थालेको छ ।

महाभारत वनक्षेत्रलाई वन ऐनअनुसार संरक्षित क्षेत्र घोषणा गर्न २०६८ मा कार्ययोजना स्वीकृत गरिसकेको र २५ असार २०७१ मा राजपत्रमा सूचना प्रकाशित गर्न वन विभागले सिफारिस गरिसकेको महाभारत संरक्षित वन क्षेत्रका नाममा वर्षेनी लाखौँ रकम खर्च भइरहेको छ ।

२०७१ सालमै महाभारत संरक्षण परिषद्को तदर्थ समिति गठन गरिएकोमा हाल सो समिति निस्कृय छ । जनचेतनामूलक कार्यक्रमका नाममा गोष्ठी र अन्तरक्रिया गर्न वर्षेनी लाखौँ रकम खर्च गरिरहेको डिभिजन वन कार्यालय डडेल्धुराले पछिल्लो समयमा सबै सरोकारवालाको आँखा छलेर महाभारत वन क्षेत्रलाई आरक्षका रुपमा विकास गर्न भित्रभित्रै लविङ गरिरहेको छ ।

गत आर्थिक बर्षमा महाभारत वन संरक्षणका नाममा ३ लाख बजेट विनियोजन भएको र रातो गँुरास रिसोर्टमा गोष्ठी सम्पन्न गरिएको डिभिजन वन कार्यालय डडेल्धुराले जनाएको छ ।

चालू आर्थिक वर्षमा समेत १० लाख विनियोजित बजेटमध्ये सव डिभिजनस्तरीय गोष्ठी र जिल्लास्तरीय गोष्ठीका साथै प्रचारप्रसार सामग्री निर्माणमा खर्च भइसकेको डिभिजन वन अधिकृत विष्णुप्रसाद आचार्यले बताए ।

उनले २०६८ देखि हालसम्म २४ लाख २० हजार रुपैयाँ महाभारत वन संरक्षणका लागि खर्च भइसकेको जानकारी दिए । ‘कार्ययोजना स्वीकृत भएर वन विभागले राजपत्रमा सूचना प्रकाशनका लागि सिफारिस गरिसकेको ८ बर्ष बितिसक्यो’ उनले भने, ‘तर, राजनीतिक पहुँच नहुँदा डडेल्धुराको महाभारत वन क्षेत्रलाई संरक्षित वनका रुपमा विकास गर्न सकिएको छैन ।’

डिभिजन वन कार्यालयले लाखौँ रुपैयाँ खर्च गरेर जनचेतनामूलक कार्यक्रम सम्पन्न गरेको दाबी गरे पनि महाभारत वन क्षेत्र वर्षेनी वन अतिक्रमण र विनाशको चपेटामा पर्ने गरेको छ ।

संरक्षित वन क्षेत्रका नाममा औचित्यहीन खर्च भइरहे पनि महाभारत वनक्षेत्र विनास हुँदा डडेल्धुराको जनजीवन प्रभावित बन्न थालेको सामुदायिक वन उपभोक्ता महासंघ डडेल्धुराकी अध्यक्ष कमला बिष्ट बताउँछिन् ।

लामो समयदेखि संरक्षित वन क्षेत्रका रुपमा बजेट खर्च गरिरहे पनि पछिल्लो समयमा महाभारत वन क्षेत्रमा पाटेबाघ देखिएको भन्दै डिभिजन वन अधिकृत आचार्यले महाभारत वन क्षेत्रलाई संरक्षित वनका रुपमा नभई आरक्षका रुपमा विकास गरिनुपर्ने भन्दै भित्रभित्रै लविङ सुरू गरेको सरोकारवाला बताउँछन् ।

आरक्षका रुपमा महाभारत वन क्षेत्रको विकास गर्न प्रयाप्त सम्भाव्यता रहेको आचार्यले बताए । सोमबारमात्रै डिभिजन वन कार्यालय डडेल्धुराले जिल्ला समन्वय समितिको सभाकक्षमा महाभारत संरक्षित वनसम्बन्धी जिल्लास्तरीय गोष्ठी सम्पन्न गरेको छ ।

प्रकाशित मिति: सोमबार, जेठ २६, २०७७ २१:०१