हेटौंडाको आन्तरिक आय २२ करोड

A+ A A-

हेटौंडा उपमहानगरपालिकाले चालु आर्थिक वर्षको हालसम्म २२ करोड ६० लाख रूपैयाँ आम्दानी गर्न सफल भएको छ । आन्तरिक आयमा गत वर्षको तुलनामा चालु आर्थिक वर्षको अन्त्यसम्म १० करोड रुपियाँले बृद्धि हुने अनुमान गरिएको छ ।

उपमहानगरपालिकाका उपप्रमुख मिना लामाद्धारा आज चौथो नगरसभामा प्रस्तुत बजेटबाट कार्यक्रम मार्फत आन्तरिक आम्दानीमा बृद्धी भएको सार्वजनिक गरिएको हो । साविकको बजेटमा बृद्धि एक अर्ब ७७ करोड पुगेको छ । चालु बर्षको अन्त्य सम्ममा उपमहानगरपालिकाको आम्दानी भने एक अर्ब ८७ करोड रुपैयाँ हुने अनुमान गरिएको उपप्रमुख लामाले बताइन् ।

यो रकम चालु आर्थिक वर्षमा स्वीकृत भएको रकमभन्दा १५ प्रतिशत बढी हो । नदिजन्य पदार्थ, विज्ञापन कर, पुर्वाधार मर्मत सम्भार, सार्वजनिक शौचालय, सिमेन्ट निकासी करलगायतका क्षेत्रबाट बढी राजस्व संकलन भएको लामाले बताइन् । चालु आर्थिक बर्षको यो अवधिसम्ममा भौतिक पुर्वाधारका ३ सय ८९ वटा योजानहरु सम्झौता भएर सञ्चालनमा आएको छ ।

जसमध्यमा २ सय ५ वटा योजानहरु सम्पन्न भएर एक सय ८४ वटा योजनाहरु निर्माणाधिन अवस्थामा सञ्चालनमा आएको उपप्रमुख लामाद्धारा प्रस्तुत कार्यक्रममा उल्लेख गरिएको छ । प्रदेश ३ सरकारद्धारा हस्तान्तरित ६ करोड ८५ लाख रुपैयाँ बराबरका १५ वटा योजनाहरु सञ्चालन भईरहेका छन् । संघीय सरकारसँगको समझदारीमा ६ करोड २१ लाखका पाँचवटा आयोजनाहरु सञ्चालनमा रहेका छन् ।

उपमहानगरपालिकाले चालु आर्थिक वर्षमा ठूला आयोजनाका रूपमा कर्रा करिडोर, बस टर्मिनल, सपिङ महल, भवन निर्माण सम्बन्धी मापदण्ड, सभागृह, भ्यूटावर निर्माण लगायतका काम गर्ने योजना बनाएको छ ।

उपमहानगरपालिकाको चौथो नगरसभा बैठकमा बोल्दै मेयर हरिबहादुर महतले सबै योजनाहरु सम्पन्न गरेर अन्य नगरभन्दा पहिलो हुनका लागि आफुहरु लागिपरेको दाबी गरे । अझैपनि नगरलाई धेरै योजना पूरा गर्नका लागि बजेट आवश्यक रहेको मेयर महतले बताए ।

प्रकाशित मिति: बिहीबार, चैत २१, २०७५ ०४:५०