प्रदेश २ : स्वास्थ्य र सुरक्षाकर्मीसहित ८३ जनामा कोरोना पुष्टि, संक्रमितको संख्या हजार नाघ्यो

प्रदेश २ : स्वास्थ्य र सुरक्षाकर्मीसहित ८३ जनामा कोरोना पुष्टि, संक्रमितको संख्या हजार नाघ्यो

A+ A A-

प्रदेश २ मा कोरोना संक्रमितको संख्या १ हजार नाघेको छ । शनिबार ८३ जना थपिएसँगै प्रदेश २ मा कोरोना संक्रमितको संख्या १ हजारभन्दा बढी भएको हो ।

८३ जना थपिएसँगै प्रदेश २ मा कोरोना संक्रमितको संख्या १ हजार ६६ पुगेको छ । शनिबार सबैभन्दा बढी महोत्तरीमा ३५ जनामा संक्रमण पुष्टि भएको सामाजिक विकास मन्त्रालयले जनाएको छ ।

धनुषामा ८ जनामा संक्रमण पुष्टि भएकामध्ये १ जना प्रहरीसमेत रहेको बताइएको छ । जनकपुरधाम उपमहानगरपालिका–२० देवपुरा रुपैठास्थित क्वारेन्टिनमा खटिएका १ जना प्रहरीमा समेत कोरोना पुष्टि भएको छ । संक्रमित प्रहरी क्वारेन्टिन अनुगमनमा आउनेजाने गरेको बताइएको छ ।

यसैगरी, सोही क्वारेन्टिनमा खटिएका २ जना स्वास्थ्यकर्मीमा समेत संक्रमण पुष्टि भएको छ । ५/६ दिनअघि क्वारेन्टिनमा खटिएका दुवै स्वास्थ्यकर्मीमा संक्रमण पुष्टि भएको हो ।

यता, महोत्तरी जिल्लामा जलेश्वर क्वारेण्टाइनका १७ जना पुरुष, मटिहानी क्वारेण्टाइनका ७ जना पुरुष, एकडारा क्वारेन्टाइनका ६ जना पुरुष, गौशाला क्वारेन्टाइनका २ जना पुरुष तथा सोही क्वारेन्टाईनका १ जना महिलामा कोरोना संक्रमणको पुष्टि भएको छ ।

उनीहरूमध्ये गौशला क्वारेन्टाइनका २२ वर्षीय १ जना महिला संक्रमण पुष्टि भएको छ भने अन्य क्वारेन्टाइनमा ११ देखि ४४ वर्ष उमेर समूहका ३४ जना पुरुष संक्रमण देखिएको मन्त्रालयले जनाएको छ ।

राष्ट्रिय प्रयोगशाला टेकु काठमाडौंबाट प्राप्त विवरणअनुसार सर्लाही जिल्लामा रामनगर गाउँपालिकाका १६ जना, मलंगवा नगरपालिकाका ८ जना र ईश्वरपुर नगरपालिकाका ३ जना पुरुषमा कोरोना संक्रमणको पुष्टि भएको छ । उनीहरू १६ देखि ३६ वर्ष उमेर समूहका रहेको बुझिएको छ ।

रौतहट जिल्ला ईशनाथ नगरपालिकामा सञ्चालित क्वारेन्टाइनमा रहेको ४ जना पुरुष र २ जना महिलामा समेत कोरोना संक्रमणको पुष्टि भएको छ ।

उपचारको अवस्था

प्रदेश २ मा हालसम्म १ सय ५९ जना कोरोना संक्रमित व्यक्तिहरू उपचारपश्चात निको भएर घर फर्किएको सामाजिक विकास मन्त्रालयले जनाएको छ ।

धनुषाको जनकपुरधामस्थित प्रादेशिक अस्पतालअन्तर्गतको कोभिड विशेष अस्पतालमा १० जना, लक्ष्मिनिया गाउँपालिका स्थित सिटीईभीटी पोलिटेक्निक इन्स्च्यिुटको आइसोलेशनमा ७३, सप्तरीको राजविराज स्थित अस्पतालमा ६८, सिरहाको कोभिड अस्पतालमा २२, महेन्द्र गेनाई अस्पतालमा २६, सर्लाहीको मलंगवास्थित अस्पतालमा ८२, कविलासीमा ३६ जनाको आइसोलेशन कक्षमा उपचार भइरहेको छ ।

त्यसैगरी, महोत्तरीको जलेश्वर स्थित अस्पतालमा ३७, बाराको कलैया अस्पतालमा ३३, पर्साको गण्डक अस्पतालमा २९ र रौतहटको चन्द्रनिगाहपुरमा २५, गौरमा ३५, राजपुर फरहदवामा २५, देवाही गोनाहीमा ८४ र गरुडा स्थित अस्पतालमा ७६ जनाको कोरोना संक्रमितको आइसोलेशन कक्षमा उपचार भइरहेको छ ।

प्रदेशमा हालसम्म २१ हजार १६ जनाको पीसीआर परिक्षण गरिएकोमा १ हजार ६६ जनाको पोजेटिभ र ११ हजार २ सयको निगेटिभ रिपोर्ट आएको छ भने ८ हजार ७ सय ५० को रिपोर्ट आउन बाँकी रहेको छ ।

प्रकाशित मिति: शनिबार, जेठ २४, २०७७ १८:०९