इस्लामी शिक्षालाई आधुनिक शिक्षासँग जोड्नुपर्छः राउत

A+ A A-

मुख्यमन्त्री लालबाबु राउतले मुस्लिम समुदायको बालबालिकालाई इस्लामिक शिक्षाका साथै आधुनिक शिक्षासँग समेत जोडनु पर्ने आवश्यकता माथि जोड दिएका छन् ।

महोत्तरी जिल्लाको मटिहानी नगरपालिका वडा नं. ४ मझौरा स्थित मदरसा खदिजतुल कुबरा गल्र्स स्कुलको सातौ शैक्षिक वार्षिक प्रतियोगिता समारोहलाई सम्बोधन गर्दै मुख्यमन्त्री राउतले आधुनिक युगसँग प्रतिस्पर्धा गर्न समेत आधुनिक शिक्षालाई जोडनुपर्ने आवश्यकता रहेको बताए ।

मुलुकभरिको मदरसाहरुले आफु खुसी पाठ्यक्रम लागु गरेको तथा राज्य समेत मदरसा शिक्षालाई मान्यता नदिएको हुँदा लाखौ मुस्लिम युवा युवतीहरु राज्यबाट उपेक्षित भै रहेको उल्लेख गर्दै मुख्यमन्त्री राउतले ती समस्याहरुको अन्त्यको लागि प्रदेश सरकारले मदरसा शिक्षा बोर्ड गठन गर्न लागेको उल्लेख गरे ।

प्रदेश सरकार छोरीहरुलाई शिक्षा दिनेकुरामा गम्भीर रहेको उल्लेख गर्दै मुख्यमन्त्री राउतले प्रदेश सरकारको बेटी पढाउ बेटी बचाउ अभियान सञ्चालन गरिरहेको जानकारी दिए । उनले सरकारी जागिरमा ५० प्रतिशत आरक्षण जस्ता व्यवस्थाहरु गरिसकेको उल्लेख गरे ।

मुलुककै इतिहासमा पहिलो पटक प्रदेश सरकारले महिलाहरुको लागि ५० प्रतिशत आरक्षण गरेको जानकारी दिदै उनले यसको परिणाम एक दुई वर्ष भित्रै समाजमा देखिन थाल्ने दाबी गरे ।

मुलुकमा पछि पारिएका मुस्लिम, दलित तथा महिलाहरुको हक अधिकार सुनिश्चित गर्न प्रदेश सरकार क्रमवद्ध ऐन कानूनहरु ल्याउन लागेको उनको कथन थियोृ ।

स्कुल व्यवस्थापन समितिका अध्यक्ष मौलाना अब्दुल अजिजको अध्यक्षतामा भएको उक्त कार्यक्रममा संघीय सरकारका स्वास्थ्य राज्यमन्त्री डा. सुरेन्द्र यादवले प्रदेश सरकारले चालि रहेको कदमहरु सराहनीय रहेको उल्लेख गरे ।

कार्यक्रममा प्रदेश सभा सदस्य जैलुन राइन, मटिहानी नगरपालिकाका मेयर हरिप्रसाद मण्डल सहितका वक्ताहरुले सम्बोधन गरेका थिए ।

प्रकाशित मिति: बिहीबार, चैत २१, २०७५ ०१:३३