सुदूरपश्चिम सरकारको नीति तथा कार्यक्रम बहुमतले पारित

A+ A A-

सुदूरपश्चिम सरकारको नीति तथा कार्यक्रम पारित भएको छ । प्रदेशसभाको बैठकले आर्थिक वर्ष २०७७/७८ को नीति तथा कार्यक्रमलाई बहुमतले स्वीकृत गरेको हो ।

सुदूरपश्चिम प्रदेश सरकारले यही जेठ १९ गते आगामी आर्थिक वर्षको नीति तथा कार्यक्रम प्रदेशसभामा प्रस्तुत गरेको थियो । शुक्रबारको बैठकमा मुख्यमन्त्री त्रिलोचन भट्टले नीति तथा कार्यक्रममाथिको छलफलमा उठेका प्रश्नहरूको जवाफ दिँदै उपयुक्त सुझावलाई नीति तथा कार्यक्रम र बजेटमा समेट्ने प्रतिबद्धता व्यक्त गरे ।

मुख्यमन्त्री भट्टले यस वर्ष स्वास्थ्य क्षेत्रलाई पहिलो प्राथमिकतामा राखेको बताएका छन् । सुदूर पश्चिम प्रदेश सभाको छैठौं अधिबेशनको दशौं बैठकमा सरकारले संसदमा ल्याएको आर्थिक वर्ष ०७७/७८ को वार्षिक नीति तथा कार्यक्रममा संसदमा उठेका टिप्पणीमाथि सम्बोधन गर्दै मुख्यमन्त्री भट्टले प्रदेश सरकारले यस वर्ष स्वास्थ्य क्षेत्रलाई पहिलो प्राथमिकतामा राखेको बताए ।

'यस वर्ष हामी अस्पतालको स्तरोन्नति गर्छौं । शैया थप्छौँ', उनले भने, '३ वटा ट्रमा सेन्टर बनाउछौँ । क्यान्सर अस्पताल बनाउछौँ ।' उनले समयमै भारतमा रहेका नेपालीको उद्धार हुन नसकेका कारण समस्या उत्पन्न भएको बताए ।

'२ महिना पहिले भारतमा रहेका नेपालीहरुको उद्धार हुन सकेको भए त्यतिबेला त्यहाँ रोग फैलिइसकेको थिएन, नेपालीहरू संक्रमित भइसकेका थिएनन', मुख्य मन्त्री भट्टले भने, 'ढिलो उद्दार हुदा एकातिर उनीहरू बेखर्ची भएर आएका छन् । अर्कोतिर संक्रमित भएर आएका छन् ।'

मुख्यमन्त्री भट्टले हालसम्म कार्यान्वयनमा आउन नसकेको सय करोड बजेट रहेको स्वरोजगारमार्फत प्रवासबाट आएका मजदुरलाई बिना धितो कर्जा दिएर स्वरोजगार र उद्यमशील बनाउने बताए ।

मुख्यमन्त्री भट्टले भ्रूण हत्या रोक्न र छोरीमाथि हुने विभेद कम गर्न छोरी जन्मिनेबित्तिकै बीमाको व्यवस्था गरिने, महिला हिंसा न्यूनीकरणका लागि पनि बजेटमा विशेष योजना राखिने बताए ।

उनले कोभिड १९ (कोरोना भाईरस) को रोकथाम र नियन्त्रणसँगै सुदूरपश्चिमका जनतालाई गुणस्तरीय स्वास्थ्य सेवा उपलब्ध गराउन सरकारले स्वास्थ्य क्षेत्रलाई पहिलो प्राथमिकतामा राखेको बताए ।

मुख्यमन्त्री भट्टले प्रदेश सरकार अहिलेसम्म सुस्त गतिमा रहेपनि अव दर्गुर्ने बताए । 'विभिन्न कारणले अहिलेसम्म ढिलासुस्ती भयो । प्रदेश सरकारले धेरै काम गर्न सकेन', मुख्यमन्त्री भट्टले भने, 'अब प्रदेश सरकार दगर्नु छ ।'

प्रकाशित मिति: शुक्रबार, जेठ २३, २०७७ १८:४६