प्रहरी नै अपराधकर्ममा, ५ महिनामा २०७ बिरुद्ध उजुरी

A+ A A-

१० साउनमा कञ्चनपुर भीमदत्त नगरपालिका–२ की १३ वर्षीया निर्मला पन्तको बलात्कारपछि हत्या भयो । बलात्कार र हत्या प्रकरणमा प्रहरीबाटै अनुसन्धानमा लापरबाही भएको भन्दै तल्कालीन कञ्चनपुर जिल्ला प्रहरी प्रमुख डिल्लीराज विष्ट (प्रहरी उपरीक्षक) र प्रहरी निरीक्षक जगदीश भट्टलाई निलम्बन गरियो । १२ जना प्रहरी अझै निलम्बनमा छन् ।

३३ किलो सुन तस्करी र सनम शाक्य हत्या प्रकरणमा बहालवाला प्रहरी वरिष्ठ उपरीक्षक (एसएसपी) दिवेश लोहनीदेखि अवकाशप्राप्त प्रहरी नायब महानिरीक्षक (डीआईजी)समेत मुछिए ।

जनताको सुरक्षाका लागि खटिएका प्रहरी विभिन्न आपराधिक घटनामा समेत संलग्न हुने गरेको उदाहरण हुन यी । शान्ति सुरक्षामा खटिएका प्रहरी कर्मचारीविरुद्ध प्रहरीमै सामान्य देखि जघन्य अपराधमा संलग्न रहेको गोप्य उजुरी पर्ने क्रम बढेको छ ।

उजुरी बढ्दै गएपछि प्रहरी प्रधान कार्यालयले उजुरी छानबिन शाखा नै सञ्चालनमा ल्याउनु परेको छ । आर्थिक वर्ष २३०७३/०७४ मा प्रहरीविरुद्ध ३ सय २३ उजुरी परेका थिए । आव २०७४/०७५ मा यो संख्या बढेर ५ सय २२ मा पुग्यो ।

चालू आव २०७५/०७६ को पाँच महिनामा मात्रै प्रहरीबिरुद्ध २०७ उजुरी परेका छन् । तीन आर्थिक बर्षमा १ हजार ४४ उजुरी परेका छन् । यसरी परेको उजुरीका आधारमा आव २०७३÷०७४ मा ९७ जनालाई कारबाही गरिएको छ ।

२०७४/०७५ मा ७२ जनालाई विभागीय र केहीलाई सामान्य कारबाही गरिएको प्रहरीले राखेको तथ्यांकले देखाउछ । चालू आर्थिक बर्षमा १०२ जना पेशागत आचरण र आपराधिक गतिविधिमा संलग्न रहेको अभियोगमा कारबाहीमा परिसकेको प्रहरी प्रवक्ता उत्तमकुमार सुवेदी बताउँछन् ।

प्रहरीविरुद्ध उजुरी आउनेमा प्रहरी आचरणविपरीत काम गरेका, भ्रष्टाचार र अन्य प्रहरीसँग सम्बन्धित नरहेका विषयमा समेत रहेको प्रवक्ता सुवेदीले बताए । तीन आर्थिक बर्षमा कुल २ सय ३६ जनालाई विभागीय कारबाही गरिएको र अन्यलाई सचेत गराइएको प्रवक्ता सुवेदीको भनाइ छ । विभागीय कारबाहीअन्तर्गत पदोन्नति रोक्का, तलब वृद्धमा रोक्का, स्केलमा घटुवा, निलम्बनदेखि नोकरीबाटै हटाइने सुवेदीले बताए ।

हबल्दार र जवानबिरुद्ध बढी उजुरी

प्रहरी जवानदेखि वरिष्ठ प्रहरी उपरीक्षकबिरुद्ध सबैभन्दा बढी मौखिक र इमेलमार्फत उजुरी आउने गरेका छन् । यसमध्ये सबैभन्दा बढी प्रहरी जवान र प्रहरी हबल्दारविरुद्ध उजुरी पर्ने गरेको छ ।

जुनियर प्रहरी कर्मचारीमा नियम कानुनसम्बन्धी ज्ञानको कमी र कसैको प्रलोभनमा फस्ने र प्रहरीको आचरणविपरीत काम गर्ने हुँदा उनीहरूविरुद्ध उजुरी बढी हुने गरेको एसएसपी सुवेदीको भनाइ छ ।
प्रहरी प्रधान कार्यालयले ल्यान्डलाइन नम्बर ०१४४१००७९, मोबाइल नम्बर ९८५१२९३००० र इमेल [email protected] मार्फत प्रहरीमाथिको उजुरी सुन्ने गरेको छ ।

प्रकाशित मिति: बुधबार, चैत २०, २०७५ २३:४३