लकडाउनका बेला नेपालको करिब १ खर्ब १० अर्बको अन्तर्राष्ट्रिय व्यापार

A+ A A-

सरकारले लकडाउन लागू गरेपछि नेपालको अन्तर्राष्ट्रिय व्यापारमा ५७ प्रतिशत गिरावट आएको छ । गत वर्षको चैत महिनाको तुलनामा चालू वर्षको चैत महिनामा ४९ प्रतिशत न्यून भएकोमा वैशाख महिनामा गत वर्षको सोही अवधिको तुलनामा ६४ प्रतिशत कम भएको छ ।

सरकारले भन्सार नाका सञ्चालनमा अवरोध नभएको बताए पनि देशभित्र उद्योग व्यवसाय सञ्चालन गर्न नसेको र भन्सारमा समेत श्रमिकको अभावको कारणले गर्दा व्यापारमा समस्या देखिएको थियो । भन्सार विभागका अनुसार जेठ महिनामा थप व्यापार वृद्धि भएको छ ।

चैत र वैशाख महिनामा मात्रै १ खर्ब रुपैयाँबराबरको विदेशी सामानको आयात भएको छ । गत वर्ष सोही अवधिमा २ खर्ब २८ अर्ब रुपैयाँको यस्तो सामान आयात भएको थियो ।

त्यस्तै, निर्यात व्यापार पनि घटेको छ । गत वर्षको चैत र वैशाख महिनामा १७ अर्ब रुपैयाँ सामान विदेशी बजारमा पुगेकोमा चालू आर्थिक वर्षको चैत र वैशाख महिनामा ८ अर्ब रुपैयाँ बराबरको मात्रै सामान निर्यात भएको भन्सार विभागले जनाएको छ ।

फागुनमा मात्रै १ खर्ब ३० अर्बको व्यापार

चालू आर्थिक वर्षको पहिलो महिनादेखि गत वर्षको तुलनामा कम व्यापार भएकोमा कात्तिकपछि भने निरन्तर वृद्धि भएको थियो । फागुन महिनामा मात्रै गत वर्षको सोही अवधिको तुलनामा करिब १० अर्ब रुपैयाँ बढीको अन्तर्राष्ट्रिय व्यापार भएको छ ।

गत वर्ष फागुन महिनामा आयात र निर्यात गरिक करिब १ खर्ब २० अर्ब रुपैयाँको व्यापार भएकोमा चालू वर्षको फागुनमा १ खर्ब ३० अर्ब रुपैयाँ पुगेको थियो । जसमा आयात व्यापार १२ खर्ब २० अर्ब ५० करोड रहेको छ भने निर्यात व्यापार करिब १० अर्ब रुपैयाँको रहेको छ । फागुनमा रकमको हिसाबले अहिलेसम्मकै सबै भन्दा बढी सामानको निर्यात भएको थियो ।

भन्सार राजस्व लक्ष्य ५७ प्रतिशत पूरा

यस वर्षको भन्सार राज्स्व करिब ५ खर्ब रुपैयाँ उठाउने लक्ष्य अर्थ मन्त्रालयले निर्धारण गरेकोमा १० महिनाको अवधिमा जम्मा ५७ प्रतिशत मात्रै राजस्व उठेको भन्सार विभागले जनाएको छ । विभागका महानिर्देशक सुनमन दाहाले लकडाउनको कारण व्यापारमा कमी आएसँगै राज्स्व लक्ष्य पुर्‍याउन समस्या परेको बताए ।

भन्सार विभागले अधिकतम ३ खर्ब रुपैयाँ राजस्व उठ्ने अनुमान गरेको छ । जम्मा ४ खर्ब ७५ अर्ब रुपैयाँको भन्सार राजस्व उठ्ने अनुमान गरिएकोमा वैशाख मसान्तसम्ममा २ खर्ब ७३ अर्ब रुपैयाँको राजस्व उठेकोको भन्सार विभागको तथ्यांक रहेको छ ।

प्रकाशित मिति: शुक्रबार, जेठ २३, २०७७ १६:२७