इन्डोनेसियामा ९ हप्तापछि खुले मस्जिद, विश्वभर जनजीवन सहज बन्दै

A+ A A-

इन्डोनेसियाको राजधानी जकार्तामा मुस्लिम समुदायले ९ हप्तापछि पहिलो पटक मस्जिदमा सामूहिक प्रार्थना गरेका छन् । कोरोना भाइरसका कारण बन्द गरिएका मस्जिद पुनः खुला गरिएको हो ।

प्रार्थनामा सहभागी हुन चाहने व्यक्तिको मस्जिदको ढोकामा शरीरको तापक्रम लिनुका साथै हातमा स्यानिटाइजर लगाइएको थियो । प्रहरी र सेनाले सहभागी व्यक्तिले सामाजिक दूरी कायम गरे नगरेको तथा मास्क लगाए नलगाएको अनुमगन गरेका थिए ।

प्रार्थना गर्दा आवश्यक पर्ने सरसामान आफैँ ल्याउनु पर्ने तथा हात मिलाउन वा अंगालो मार्न निषेध गर्नुका साथै एक अर्काबीच कम्तीमा ३ फिटको दूरी कायम गर्न भनिएको छ । इन्डोनेसियामा कोरोना भाइरसबाट हालसम्म २८ हजार ८१८ जना संक्रमित भएका र १ हजार ७२१ जनाको मृत्यु भएको छ ।

राष्ट्रपति जोको विडोडोले कोरोना भाइरसबाट सुरक्षित रहँदै मुलुकको अर्थतन्त्रलाई सही ठाउँमा ल्याउने प्रतिबद्धता व्यक्त गरेका छन् । सरकारले स्वास्थ्य नियमको परिपालना गराउन ३ लाख ४० हजार सुरक्षाकर्मी परिचालन गरेको छ । इन्डोनेसियामा जुलाईको अन्त्यदेखि प्रतिबन्ध पूर्णरूपमा हटाउने तयारी भइरहेको छ ।

प्राग – चेक गणतन्त्रले छिमेकी मुलुक अस्ट्रिया, जर्मनी र हङ्गेरीबाट हुने यात्रा प्रतिबन्ध पूरै हटाएको छ । प्रधानमन्त्री आन्द्रेज बाबिसले तीन मुलुकमा रहेका तर कोरोना भाइरस नेगेटिभ रहेका चेक नागरिकलाई स्वदेश फर्कन अनुमति दिइएको बताए । चेक गणतन्त्र र स्लोभाकियाले बिहीबार साझा सीमामा लागू सबै प्रतिबन्ध रद्द गरेका छन् ।

प्रधानमन्त्री बाबिसले सीमा खुला गरेसँगै पर्यटन र व्यापार क्षेत्रले पुनर्जीवन प्राप्त गर्ने विश्वास व्यक्त गरे । कोरोना भाइरस महामारीका कारण चेक गणतन्त्रको अर्थतन्त्रमा ठूलो नोक्सानी भएको थियो ।

वेलिङ्टन – फिजीले कोरोना भाइरसबाट आफू मुक्त भएको घोषणा गरेको छ । यहाँका सबै १८ जना संक्रमित व्यक्ति निको भएर डिस्चार्ज भएका छन् । प्रधानमन्त्री फ्रान्क बाइनीमारामाले शुक्रबार आफ्नो मुलुकमा भेटिएका सबै कोरोना संक्रमित निको भइसकेको बताए ।

करिब ९ लाख जनसंख्या रहेको फिजीमा गत अप्रिलमा केही निश्चित क्षेत्रमा लकडाउन गर्नुका साथै सीमा क्षेत्रमा आवातजावतमा प्रतिबन्ध लगाइएको थियो ।

मनिला - फिलिपिन्सका राष्ट्रपति रोड्रिगो डुटेर्टेले कोरोना भाइरसका कारण उत्पन्न परिस्थितिको सामना गर्न फिलिपिनी नागरिकले गरेको सहयोगका लागि आभार व्यक्त गरेका छन् ।

उनले क्वारेन्टाइनमा देखिएका समस्याबारे सोधिएका प्रश्नको जवाफ दिँदै महामारीका बीच कुनै गरिब परिवारले आवश्यक सहयोग नपाएको पाइए सम्बन्धित अधिकारीमाथि कडा कारबाही गरिने चेतावनी दिए ।

टेलिभिजनमा सम्बोधन गर्दै राष्ट्रपति डुटेर्टेले कोरोना संक्रमित भएर ज्यान गुमाएका ३२ जना स्वास्थ्यकर्मीका परिवारले राहत नपाएको गुनासोप्रति रोष प्रकट गरे । अधिकारीले फिलिपिन्समा बेरोजगारी करिब १७.७ प्रतिशत पुगेको बताएका छन् ।

फिलिपिन्समा २० हजार ३८२ जनामा कोरोना भाइरसको संक्रमण देखिएको र करिब १ हजारको मृत्यु भएको छ ।

संयुक्तराष्ट्र संघ – संयुक्तराष्ट्र संघले कोरोना भाइरस महामारीका कारण माली र अफ्रिकाको साहेल क्षेत्रमा गम्भीर मानवीय तथा सुरक्षा चुनौती खडा भएको जनाएको छ ।

राष्ट्रसंघका महासचिव एन्टोनियो गुटेरेसले सुरक्षा परिषदमा बुझाएको १ प्रतिवेदनमा अल–कायदा र इस्लामिक स्टेट समूहसँग आबद्ध आतंकवादीका कारण शान्ति सुरक्षामा गम्भीर खतरा उत्पन्न भएको उल्लेख गरेका छन् ।

उनका अनुसार आतंककारीले नागरिकमाथि आक्रमण गर्ने खतरा छ । मालीको सेना र अन्तर्राष्ट्रिय फौजलाई उत्तरी र मध्य मालीमा तैनाथ गरिएको भए पनि उत्तरी मालीमा मुख्य रूपमा खतरा उत्पन्न भएको उनको भनाइ छ ।

राष्ट्रसंघका अनुसार अल–कायदा र इस्लामिक स्टेटका लडाकूबीच पनि ठाउँठाउँमा भिडन्त भएका छन् । मालीमा करिब ३५ लाख मानिस खाद्य असुरक्षाबाट पीडित भएका छन् ।

सियोलः दक्षिण कोरियामा विगत २४ घण्टाको अवधिमा ३९ जना नयाँ कोरोना भाइरस संक्रमित व्यक्ति भेटिएका छन् । कोरिया रोग नियन्त्रण तथा रोकथाम केन्द्र (केसीडीसी) का अनुसार पछिल्लो विवरणसहित देशभर कूल संक्रमितको संख्या ११ हजार ६६८ पुगेको छ भने २७३ जनाको मृत्यु भएको छ ।

पछिल्लो पटक भेटिएका व्यक्ति सियोल महानगरको घनाबस्ती क्षेत्रका बासिन्दा हुन् । दक्षिण कोरियामा सामाजिक दूरी समेतका कडा नियममा सहजता तुल्याएसँगै नयाँ संक्रमित भेटिएका छन् । तर नयाँ संक्रमितको संख्या ठूलो मात्रामा वृद्धि भएको छैन । - रासस

प्रकाशित मिति: शुक्रबार, जेठ २३, २०७७ १४:३३