जनकपुरका सम्पूर्ण पसल दिउँसो १२ बजेसम्म खोलिने

A+ A A-

प्रदेश २ को अस्थायी राजधानी जनकपुरधाममा ७३ दिनपछि आज (शुक्रबार) देखि लकडाउन खुकुलो बनाउने निर्णय गरिएको छ । जनकपुरधामका सम्पूर्ण पसल दिउँसो १२ बजेसम्म खोलिने निर्णय भएको बैठकका सहभागि चेम्बर अफ कमर्स जनकपुरधामका वरिष्ठ उपाध्यक्ष सरोज मिश्रले बताए ।

जिल्ला सुरक्षा समिति, जिल्ला समन्वय समिति जनकपुरधाम उद्योग वाणिज्य संघ र धनुषा चेम्बर अफ कमर्सका पदाधिकारी बजार सहजीकरणका लागि बसेको संयुक्त बैठकबाट औषधि पसलबाहेकका सम्पूर्ण पसल दिउँसो १२ बजेसम्म खोल्ने निर्णय गरिएको हो । पसल बन्द गरेर दिनको १ बजेसम्म सम्पूर्ण व्यवसायीलाई आ–आफ्नो गन्तव्यसम्म पुगिहाल्नसमेत आग्रह गरिएको छ ।

प्रत्येक व्यवसायीले आ–आफ्नो प्रतिष्ठानअगाडि अनिवार्य रूपमा सेनिटाइजर, साबुनपानी, मास्क, ग्लोब्स र सोसल डिस्टेन्सको व्यवस्था गर्ने र सतर्कतापूर्वक व्यवसाय सञ्चालन गर्दै सुरक्षा निकायलाई समेत सहयोग गरिदिन प्रमुख जिल्ला अधिकारी कोषहरि निरौलाले अनुरोध गरेका छन् ।

सैलून, ब्यूटीपार्लर, सिनेमाहल, होटल र रेस्टुरेन्टहरूको हकमा हाललाई कुनै निर्णय नभएको र यथाशीघ्र यस क्लस्टर तर्फ पनि बिचार गरिने सहमति भएको चेम्बर अफ कमर्स जनकपुरधामका वरिष्ठ उपाध्यक्ष मिश्रले बताए ।

जिल्ला प्रशासन कार्यालयसँग आफूहरूले लकडाउनलाई खुकुलो पार्दै दिउँसो १२ बजेसम्म पसल खोल्ने सहमति गरेको जनकपुरधाम उद्योग वाणिज्य संघका वरिष्ठ उपाध्यक्ष जितेन्द्रप्रसाद साहले बताए ।

पछिल्ला केही दिनयता बिहान फाटफुट रूपमा बजार खुल्ने गरेको भए पनि प्रहरीले बन्द गराउने गरेको थियो । यसै क्रममा प्रहरीले बिहीबार बजार बन्द गराउने क्रममा जानकी चोकका एक व्यापारीलाई कुटपिटसमेत गरेका थिए । प्रजिअ निरौलाले यसबाहेक जबर्जस्ती पसल खोलेमा कानूनबमोजिम कारबाही गरिने चेतावनी दिएका छन् ।

प्रकाशित मिति: शुक्रबार, जेठ २३, २०७७ १२:५०