पूर्वमन्त्री यादवले गरिदिए ५० पत्रकारको कोरोना बिमा

A+ A A-

नेपाल पत्रकार महासंघ धनुषाले जिल्लाका ५० पत्रकारको कोरोना बिमा गरेको छ । बिमाको लागि आवश्यक रकम भने पूर्वमन्त्री एवं संघीय सांसद मातृकाप्रसाद यादवले गरेका हुन् ।

कारोना महामारीको उच्च जोखिममा रहेर आम नागरिकको घरदैलोमा सूचना पुर्‍याउने अग्रमोर्चामा खटिएका पत्रकारका लागि कोरोना बिमा गरिएको हो ।

पूर्वमन्त्री यादवले पत्रकार महासंघका अध्यक्ष अनिल मिश्रलाई ५० पत्रकारको विवरणसहित बिहीबार रकम हस्तान्तरण गरेका थिए ।

बिमा गरिएका पत्रकारमा कोरोना संक्रमण देखिए १ लाख रूपैयाँ बिमा कम्पनीले उपलब्ध गराउने छ । दोस्रो चरणमा पत्रकार महासंघका अन्य सदस्य र जिल्लामा क्रियाशील पत्रकारको समेत बिमा गरिने महासंघले जनाएको छ ।

सांसद यादवले समाचार संकलनका क्रममा विभिन्न स्थानमा पुग्दा कोरोना जोखिम हुने भएकाले सानो सहयोगस्वरूप पत्रकारको बिमा गरिएको बताए । उनले भने, ‘कोरोना महामारीको समयमा समाचार संकलन गर्न जोखिम भएकाले पत्रकारलाई कोभिड–१९ पोजिटिभ देखिए राहत पुगोस् भनेर बिमा गरिएको हो ।’

उनले समाजलाई सुसूचित गराउन जोखिम मोलेर अग्रपंक्तिमा खटिने पत्रकारको सुरक्षालाई ध्यानमा राख्दै बिमा गराउन आर्थिक सहयोग प्रदान गरेको बताए ।

‘पत्रकारको सुरक्षालाई ध्यानमा राख्दै पाउँदै आएको सेवा सुविधालाई कटाएर बिमाका लागि रकम दिएका हौँ’, उनले भने, ‘यो महामारीको समयमा तपाइंहरूलाई यसले आफ्नो कर्तव्य पूरा गर्न थप हौसला मिल्छ भन्ने आशा गरेको छु ।’

सहयोग रकम बुझ्दै अध्यक्ष मिश्रले कार्यस्थलको जोखिमलाई ध्यानमा राख्दै पत्रकारको बिमा गराउन सहयोग गरेकाले पत्रकारलाई कार्यस्थलमा खटिन थप हौसला मिल्ने धारणा राखे ।