व्यापारीमाथि कुटपिट गर्ने प्रहरीलाई कारवाही

A+ A A-

जनकपुरधामका व्यापारी कुटपिट गर्ने २ जना प्रहरीलाई प्रदेश प्रहरी कार्यालय तानिएको छ । घटनाबारे छानबिन गर्न दुवै प्रहरीलाई प्रदेश प्रहरी कार्यालय तानिएको २ नम्बर प्रदेशका प्रहरी प्रमुख डीआइजी धीरजप्रताप सिंहले जानकारी दिए ।

प्रदेश प्रहरी कार्यालय तानिनेमा जिल्ला प्रहरी कार्यालय धनुषामा कार्यरत प्रहरी सहायक निरीक्षक (असई) मेरुलाल गुप्ता र जवान दीपक यादव रहेका छन् । लकडाउन उल्लंघन गरी जनकपुरधामको जानकी चोकमा पसल खोलेको भन्दै गीता गिफ्ट हाउस सञ्चालन गर्दै आएका व्यापारी श्याम चौधरी र उनका बुबा झगरू चौधरीलाई प्रहरीले बिहीबार कुटेको भिडियो सार्वजनिक भएको थियो ।

घटनाबारे थप अनुसन्धान गर्न प्रदेश प्रहरी कार्यालयका प्रवक्तासमेत रहेका प्रहरी उपरीक्षक जयराज सापकोटाको नेतृत्वमा छानबिन समिति गठन गरिएको डीआईजी सिंहले बताए । ‘लकडाउन पालना गराउने क्रममा २ जना प्रहरीबाट सामान्य त्रुटि भएको प्रारम्भिक अनुसन्धानबाट देखिएको छ,’ सिंहले भने, ‘थप अनुसन्धानका लागि समिति बनाएका छौँ ।’

बजार बन्द गराउन खटिएका प्रहरीका १ जना सइलाई बिहीबार जनकपुरधाममा स्थानीय १ युवकले कुटपिट गरेका थिए ।

जानकी मन्दिर आसपासका पसल बन्द गराउन खटिएका बेला जानकी प्रहरी चौकीका इन्चाजमाथि हातपातसमेत भएको थियो ।

जनकपुरधामका व्यापारीले बिहीबारदेखि पसल खोल्न सुरू गरेका छन् । दिउँसो १२ बजे पसल बन्द गर्न खटिएको अवस्थामा स्थानीय व्यापारीले विरोध गरेका थिए ।

लकडाउन कार्यान्वयनमा खटिएका प्रहरीले बजार बन्द गर्ने आदेश माथिको भएकाले पसल खोल्न दिन नमिल्ने बताइरहँदा उनीमाथि १ व्यापारीले मुक्का प्रहार गरेका थिए । त्यसपछि प्रहरी आक्रोशित भएको प्रत्यक्षदर्शीले बताएका छन् । प्रहरीमाथि हातपात गर्ने युवालाई प्रहरीले तत्कालै पक्राउ गरेको थियो ।

प्रकाशित मिति: बिहीबार, जेठ २२, २०७७ १९:३९