कोरोना रोकथाममा गण्डकी प्रदेशको अग्रणी भूमिका : मुख्यमन्त्री गुरुङ

फाइल फोटो

A+ A A-

गण्डकी प्रदेशका मुख्यमन्त्री पृथ्वीसुब्बा गुरुङले प्रदेश सरकारको सक्रिय भूमिका कारण कोरोना भाइरसले विक्राल रूप लिन नसकेको बताएका छन् । उनले कोरोनाका रोकथामका लागि गण्डकी प्रदेश सरकारले अग्रणी भूमिका खेलेको समेत दाबी गरे ।

गण्डकी सरकारको नीति तथा कार्यक्रममाथि उठेका प्रनको जवाफ दिँदै मुख्यमन्त्री गुरुङले गण्डकी प्रदेश सरकारले चैत्र ७ गते नै प्रदेश लकडाउन गर्ने निर्णय गरेको स्मरण गर्दै त्यसपछि मात्र संघीय सरकारले निर्णय गरेको बताए । प्रदेश सरकारले केही गरेन भन्ने सांसदलाई लक्षित गर्दै उनले राम्राकामको प्रशंसा गर्न आग्रह गरे ।

मुख्यमन्त्री गुरुङले जनताको ज्यान बचाउनु राज्यको पहिलो दायित्व भएको बताउँदै कोरोनो भाइरसको महामारी फैलँदै गएमा सरकारले निजी अस्पताललाई पनि लिन सक्ने बताए । उनले हाललाई पोखरामा पोखरा स्वास्थ्य विज्ञान प्रतिष्ठानलाई मात्र कोरोनको उपचार गर्ने अस्पतालका रुपमा विकास गरिएको बताए ।

‘संक्रमित बढ्दै गएको अबस्थामा मणिपाल, जिएमसी लगायतका अन्य नीजि अस्पताल पनि प्रयोग गरिने छ’ उनले भने ‘अस्पताल दिन्न । काम गर्दिन भन्न मिल्दैन । जनताको ज्यान बचाउनु राज्यको दायित्व हो, संकटका बेला नाइनास्ती गरे कारबाही हुन्छ ।’

मुख्यमन्त्री गुरुङले पश्चिमाञ्चल क्षेत्रीय अस्पताललाई आवश्यक परे पूरै अस्पताललाई कोरोना उपचार अस्पतालमा रुपान्तरण गर्ने बताए । ‘संक्रमितको संख्या बढेको अबस्थामा ४ सय बेड नै लिनु पर्ने हुन सक्छ’ उनले भने ‘त्योभन्दा बढी चाहिएको अवस्थामा हामीसँग अन्य विकल्प छन् । मणिपाल, गण्डकी मेडिकल कलेललगायतका निजी अस्पताल पनि लिन पर्ने हुन सक्छ ।’

मुख्यमन्त्री गुरुङले गण्डकी प्रदेशमा कोरोना संक्रमितको संख्या वृद्धि भएकाले थप १ पीसीआर मेसिन खरिद गर्ने निर्णण गरेको बताए । उनले हाल प्रदेशमा हाल २ वटा पीसीआर मेसिनबाट दैनिक ५ नमुना परीक्षण गर्ने क्षमता रहेकोमा नयाँ खरिद गरेपछि दैनिक ७ सय नमुना परीक्षण गर्न सकिने बताए ।

कोभिड-१९ को प्रभाव बढेपछि पोखरामा प्रदेश प्रयोगशाला स्थापना भएको बताउँदै साउनसम्म मुलुकबाहिरबाट ३० हजार मान्छे प्रदेशमा आउने अनुमान रहेको उनले बताए । उनले भने, ‘ती सबैको पिसिआर टेस्ट गर्नुपर्छ । महिनामा १० हजारको टेस्ट गर्न सक्नुपर्छ ।

प्रदेशमा हाल ६ सय भीटीएम मौज्दात रहेको र २६ हजार खरिद गर्न १० दिने सूचना जारी गरेको जानकारी उनले दिए । उनले भने, ‘केन्द्रको भर परेका छैनौं । हामीले चाहिने बेलामा पाएका छैनौं । हाम्रो तयारी हामी आफैंले गरेका छौं । क्षमता अनुसार काम गरेका छौं ।’

मुख्यमन्त्री गुरुङले प्रदेशको हिमाली जिल्ला मुस्ताङ र मनाङमा कस्तुरी मृगको व्यावसायिक पालन आगामी आर्थिक वर्षबाटै सुरु गरिने बताए । उनले कस्तुरीको व्यवसायिक फार्म यसै बर्ष सुरु गर्ने जानकारी दिएं । ‘कस्तुरी मृगको बिना निकै महङ्गोमा बिक्री हुन्छ । छिमेकी मुलुक चीनमा कस्तुरीको व्यवसायिक पालन भइरहेको छ’ ‘मनाङ र मुस्ताङमा यसको फार्म सम्भव भएकाले मैले चिनियाँ कम्पनीसँग कुरा गरेको छु ।’

प्रकाशित मिति: बिहीबार, जेठ २२, २०७७ १८:१२