सांसद र कांग्रेसलाई कोरोना नलाग्ने, नेकपालाई चैँ लाग्ने ?

A+ A A-

१० वैशाखमा सत्तारुढ दल नेपाल कम्युनिस्ट पार्टी (नेकपा) का २० जना स्थायी कमिटी सदस्यले स्थायी कमिटीको माग गर्दै अध्यक्षद्वयलाई हस्ताक्षर बुझाए ।

हस्ताक्षर बुझाएको १ महिना ११ दिन पूरा भएको छ । यो अवधिमा संसद बसेर सरकारको नीति तथा कार्यक्रम पारित भयो भने बजेट पेस भइसकेको छ ।

तर नेकपाको स्थायी कमिटीको बैठक भने अहिलेसम्म बस्न सकेको छैन । स्थायी कमिटीका सदस्यहरूले हरेक चार महिनामा बस्नुपर्ने स्थायी कमिटीको बैठक समयमा बस्नुपर्छ भन्दै हस्ताक्षर गरेर बुझाएका थिए ।

यसमा अर्को कारण थियो सरकारले ल्याएका दुई अध्यादेश । अध्यादेश पार्टीमा छलफल नै नगरी ल्याएको भन्दै विवाद भयो । यो विवाद सचिवालयबाट स्थायी कमिटीमा पनि पुगेको थियो । तर बहस भने अहिलेसम्म हुन पाएको छैन ।

नेकपाको विधानमा नै कमिटीका २५ प्रतिशत सदस्यहरुले लिखित माग गरेको खण्डमा केन्द्रीय कमिटीको बैठक एक महिना र मातहतका कमिटीको बैठक १५ दिनभित्र बोलाउनुपर्छ । तर, नेकपामा भने अहिले आफ्नै विधानविपरीत लिखित माग हुँदा पनि स्थायी कमिटीको बैठक बसेको छैन ।

लिखित रूपमा माग गरेको १५ दिनभित्र बैठक नबसेपछि १८ जना स्थायी कमिटी सदस्य दबाब दिन पार्टी कार्यालय धुम्बाराहीमा जम्मा भएर छलफल गरेका थिए ।

यी १८ जना मध्ये चार जनाले त्यही दिन अध्यक्ष प्रचण्डलाई भेटेर बैठकमा एजेण्डासहित बुझाएका थिए । तर पनि बैठक बसेन ।

सरकारले अध्यादेश ल्याएपछि नेकपामा विवाद बढेको थियो । उक्त अध्यादेश सरकारले फिर्ता लियो । अध्यादेश फिर्ता भए पनि विवाद भने सचिवालय हुँदै बाहिर छताछुल्ल छ ।

स्थायी कमिटी बैठक डाक्न लिखित माग गर्दा पनि नसुनेर नेतृत्वले तानाशाह प्रबृत्ति देखाएको स्थायी कमिटी सदस्य युवराज ज्ञवाली बताउँछन् ।

‘हाम्रो पार्टीको नेतृत्वले बैठक बस्ने, बसाल्ने परिपाटी नजरअन्दाज गरेको छ । यो परिपाटीले फाइदा गर्दैन’, ज्ञवाली भन्छन्, ‘कोरोना भाइरसको कारण देखाइएको छ । कोरोना महामारीका बीचमा नै संसद चल्ने हाम्रो स्थायी कमिटीको बैठक नबस्नु राम्रो होइन ।’

संसद सुरु भएको दिन नेकपाका अध्यक्ष पुष्पकमल दाहाल प्रचण्डले छिट्टै स्थायी कमिटीको बैठक बोलाउने बताएका थिए । उनले संसद भवन परिसरमा मिडियासँग प्रतिक्रिया दिँदै भनेका थिए, ‘छिट्टै नेकपाको स्थायी कमिटीको बैठक बोलाउनेछु ।’

तर अहिलेसम्म स्थायी कमिटी बैठकको अत्तोपत्तो नभएको ज्ञवाली बताउँछन् ।

संसदको दुवै सदनमा ८ सय ८४ जना सांसदहरू छन् । यी सांसदहरू जम्मा भएर संसद सुरु भएको पनि आज २० दिन नाघेकोे छ । तर, नेकपाको ४४ जनाको स्थायी कमिटी बैठक भने बस्न सकेको छैन । नेतृत्वलाई बैठक छल्ने बहाना कोरोना भाइरस बनेको एक स्थायी कमिटी सदस्यले बताए ।

सल्लाह गरेर डाक्ने भनेका हुन् । तर, अहिलेसम्म केही भएको छैन । बीचबीचमा बोलाउन भने पनि अध्यक्षद्वयले नै यसमा चासो नदेखाएकाले स्थायी कमिटीको बैठक बस्न नसकेको अर्का स्थायी कमिटी सदस्य मणि थापा बताउँछन् ।

उनले भने, ‘यतिका दिन भयो, बैठक माग गरेको पनि तर अध्यक्षद्वयले नै यसमा चासो नदिँदा बैठक बसेको छैन । हामीले पार्टी विधि विधानमा चलाऊँ भन्दा यस्तो बेवास्ता गर्दा पार्टी र सरकार दुवैलाई घाटा भएको छ ।’

नेकपाका स्थायी कमिटी सदस्यहरूले बैठक माग गरेपछि २५ वैशाखमा बैठक बोलाएको थियो । तर, २४ गते बसेको सचिवालयको बैठकमा अध्यक्ष तथा प्रधानमन्त्री केपी शर्मा ओली स्वास्थ्यको कारण देखाएर बीचमा नै बैठक छोडेर गएपछि स्थायी कमिटीको बैठक पनि अनिश्चित बनेको थियो ।

पुनः ३१ वैशाखमा बैठक बस्ने भनेर तय भएको थियो । तर ३१ गते ११ बजे बस्ने भनेको बैठक एकाबिहानै स्थगित भएको थियो । उक्त दिन स्थायी कमिटी सदस्य भीम रावलको सुरक्षामा खटेका तर लामो समय बिदामा बसेका सुरक्षागार्डलाई कोराना भाइरस पोजिटिभ देखिएपछि बैठक स्थगित गरेको भन्ने कुरा पनि बाहिर आयो । तर, यसको आधिकारिक पुष्टि भने कुनै नेताले गरेनन् ।

कोरोनाका कारणले स्थायी कमिटी बैठक स्थगित भएको मान्न नेकपाका नेताहरू तयार छैनन् । नेपाली कांग्रेसले पनि केन्द्रीय कार्यसमितिको बैठक बसालिसकेको छ ।

‘संसद चल्न हुने, का‌ंग्रेस बैठक बस्न हुने, उनीहरूलाई काेराेना नलाग्ने तर नेकपा स्थायी कमिटी बैठक बस्न नहुने भन्ने हुँदैन, यो बहानाबाजी मात्र हो, स्थायी कमिटी सदस्य ज्ञवाली भन्छन् ।

ज्ञवालीका अनुसार सचिवालयका कुनै पनि सदस्य स्थायी कमिटीमा आएर बहस गर्न तयार नभएकै कारण बैठक छायाँमा परेको हो ।

नेकपामा पार्टी नेतृत्व र सरकारको नेतृत्व गरिरहेका नेताहरूप्रति असन्तुष्ट छन् । सरकारले नीति तथा कार्यक्रम र बजेट पार्टीको स्थायी कमिटीमा छलफल नै नगरी ल्याएको छ ।

जसका कारण धेरै नेताहरू असन्तुष्टि रहेको एक स्थायी कमिटी सदस्यले बताए । नेकपाका ४४ जना स्थायी कमिटीका सदस्यहरुलाई बस्न कुनै समस्या नहुँदा पनि बैठक नडाक्नुमा नेतृत्वको नियत नै बैठकबाट भाग्ने रहेको अर्का एक स्थायी कमिटी सदस्य बताउँछन् ।

प्रकाशित मिति: बिहीबार, जेठ २२, २०७७ १५:३३