ग्राहक आउँदा तर्सिन्छु, नआउँदा पिरोलिन्छु....

A+ A A-

सरकारले कर अनिवार्य तिर्नका लागि व्यवसायीलाई दबाब दिएसंगै विहिबारबाट सबै पसल तथा उद्योगहरु खोलिएका छन् । बुधबार नै नेपाल राष्ट्रिय वणिज्य महासंघ लगायतका विभिन्न संघसंस्थाले व्यापार व्यवसाय सूचारु गर्न निर्देशन दिए संगै व्यपारिहरुले पसल खोलेका हुन् ।

तर पसल खोल्ने व्यपारीहरु नै गुनासोको पोको बोकेर बसेका छन् । व्यापारी सुरक्षित हुने उपाय विनानै पसल खोलेर बस्नुपरेको वाध्यताले पिरोलिन थालेका छन् ।

भक्तपुर घर भई न्युरोडमा कपडा व्यवसाय गर्दै आएका राम पौडेल पसल खोल्ने निणर्य ‘खाँउ भने दिनभरीको शिकार नखाउँ भने कान्छा बा को अनुहार’ भने जस्तै भएको वताउँछन् ।

उनि भन्छन् ‘खोल्न त भनियो न लगाउन पिपिई दिइएको छ न त सुरक्षाका लागि कुनै कदम चालिएको छ । विहान खोल्ने वित्तिकै ८ जना जति ग्राहक आए, ग्राहक आउँदा अत्तालिन्छ मन कता भागौँ जस्तो हुन्छ ? कसरी बेच्न सकिन्छ यसरी ?’

उनि ग्राहकको चाप बढ्दै जाँदा कोरोनाको जोखिम झन बढेको बताउँछन् । उनि पसल बन्द गरेरै बस्ने मनसायमा भए पनि कर तिर्नै पर्ने बाध्यता भए पछि पसल खोल्नु परेको बताउँछन् ।

त्यसो त जोरपाटि क्षेत्रमा पनि अहिले धमाधम पसलहरु खुला गरिएका छन् । पसलखुला भएपछि मानिसको भिडपनि बढ्दै गएको छ ।

भिडभाड बढेपनि व्यवसाय कसरी संञ्चालन गर्ने भने निश्चित मापदण्ड तयार नगरी खोलिदा ज्यानको बाजि थापेर आउनु परेको अर्का एक व्यवसायी वताउँछन् ।

उनि भन्छन् व्यवसाय खोल्नुपर्छ त्यसमा हामी सहमत छौँ तर संघ भनाउँदाहरुले खै मापदण्ड तयार गरेका ? खै सुरक्षाका सामाग्री हामिलाई दिएको ? उनि प्रश्न गर्छन् । यता सरकार पनि हाम्रै घाटि निमोठ्ने ? सटर भाडा तिर्न नसकेको समयमा कर कसरी तिर्ने ?

उनि व्यवसायीलाई खाए खा नखाए घिच भने जस्तो व्यवहार गरेको वताउँछन् ।

त्यसो त अहिले न्युरोड, बौद्ध, असन बालाजु मात्रै नभएर भित्रि उपत्यका तिर पनि पसलहरु धमाधम खुलेका छन् । संघले ११ बजेसम्म खुलाउने भनिएपनि भित्रि एरियाका पसलहरुमा दिउँसोको समयमा पनि चहलपहल बाक्लै छ ।

भक्तपुर पूरानो ठिमीमा किराना पसल सञ्चालन गर्दै आएका निरज महर्जन पनि पसल खोल्ने वित्तिकै घरबेटिले घर खालि गर भनेको सुनाउँछन् ।

निर्देशन अनुरुपनै खोलिए पनि त्यसको नकारात्मक प्रभाव बारे नसोचि खोल्दा झन घर न घाट को हुने संभावाना बढेको बताउँछन् ।

उनि भन्छन्, ‘सकारको यो व्यवसायी मार्ने कदमको जति विरोध गरे पनि पुग्दैन । तर कमसेकम महासंघले पनि कुनै निश्चित मापदण्ड बनाएर पसलेहरुलाई पिपिई वितरण गरि शूरुमा कसरी संचालन गर्ने भन्ने शिक्षा दिएर गर्नुपर्ने हो । यसरी हचुवाका भरमा कसरी सुरक्षित हुने हामि व्यवसायी ?’

ग्राहक नै भगवान हुने व्यापारीलाई अहिले ग्राहक आउँदा पनि डर नआउँदा पनि चिन्ताले पिरोल्ने गरेको व्यवासायीहरु बताउँछन् ।

प्रकाशित मिति: बिहीबार, जेठ २२, २०७७ १३:०७