क्वारेन्टाइनमा बसेका व्यक्तिको मोबाइल वडाध्यक्षले खोसेपछि...

फाइल तस्वीर

A+ A A-

खोटाङको हलेसी तुवाचुङ नगरपालिका-१० अर्खौलेका स्थानीयले वडाध्यक्ष ज्ञानबहादुर पुरीलाई क्वारेन्टाइनमा राखेका छन् ।

वडाध्यक्ष पुरी मंगलबार राती मादक पदार्थ सेवन गरेर क्वारेन्टाइनमा बसेकाहरूसँग सम्पर्कमा गएको फेला पारेपछि स्थानीय बासिन्दाले बुधबारदेखि क्वारेन्टाइनमा राखेका हुन् ।

मंगलबार दिउँसैदेखि मादक पदार्थ सेवन गरेका वडाध्यक्ष पुरीले झापाबाट आएर वडा कार्यालयले बनाएको क्वारेन्टाइनमा बसेका १ युवकको मोबाइलसमेत खोसेको स्थानीय बासिन्दाको आरोप छ ।

‘दैनिक मादक पदार्थ सेवन गरेर वडाध्यक्ष पुरीले मातेको झोँकमा मंगलबार राती क्वारेन्टाइनमा बसेकालाई हप्काउनुका साथै १ युवकको मोबाइलसमेत खोसेर लानुभएको छ’ एक स्थानीय बासिन्दाले भने, ‘क्वारेन्टाइनमा बसेकाहरूसँगको सम्पर्कमा जानुभएका वडाध्यक्ष पुरीबाट कोरोना भाइरसको सङ्क्रमण सर्ने खतरा भएकाले उनलाई नै क्वारेन्टाइनमा राखिएको हो ।’

वडाध्यक्ष पुरीले क्वारेन्टाइनमा खटिने स्वास्थ्यकर्मी तथा कर्मचारीलाई समेत हप्कीदप्की गरेको प्रत्यक्षदर्शीले बताएका छन् । अधिकांश समय मादक पदार्थ सेवन गरेर बस्ने उनले कार्यालयमा खटिएका कर्मचारीलाई आफ्नै घरमा आएर हाजिर गर्न लगाउने गरेको १ कर्मचारीले बताएका छन् । वडाध्यक्ष पुरीलाई बुधबारबाट १४ दिनसम्म क्वारेन्टाइनमा राखिने नगरप्रमुख इवन राईले बताए । ‘हामीले लागू गरेको नियम सबैलाई लागू हुन्छ’ उनले भने, ‘वडाध्यक्ष पुरीले नियम उलङ्घन गर्नुभएकाले उहाँलाई नगरपालिकाकै तर्फबाट १४ दिनसम्म क्वारेन्टिनमा राखिएको हो ।’

११ वडा कार्यालय रहेको नगरपालिकाको विभिन्न ठाउँमा निर्माण गरिएका क्वारेन्टाइनमा अहिले ९ जना रहेको नगरपालिकाको स्वास्थ्य सहसंयोजक प्रकाश घिमिरेले जानकारी दिए ।

क्वारेन्टाइनमा बस्ने व्यक्तिको उपचार तथा खानाको व्यवस्था नगरपालिकाले गर्ने गरेको जनाइएको छ । १ सङ्क्रमित युवक भेटिएको उक्त नगरपालिकामा १ सय १४ स्थानीय बासिन्दाको स्वाब संकलन गरेर पीसीआर परीक्षण गरिएको जनाइएको छ । रासस

प्रकाशित मिति: बिहीबार, जेठ २२, २०७७ ०९:२९