काेभिड-१९ सँग जुध्न दाता गुहार्दै मुख्यमन्त्री शाही

A+ A A-

कर्णाली प्रदेशका मुख्यमन्त्री महेन्द्रबहादुर शाहीले कोभिड–१९ को संकट व्यवस्थापनमा सहयोग गर्न विकास साझेदार संस्थाहरूलाई आग्रह गरेका छन् । संयुक्त राष्ट्रसंघीय निकायका प्रतिनिधिहरूसँग सहयोगका लागि मुख्यमन्त्री शाहीले आग्रह गरेका हुन् ।

मुख्यमन्त्री तथा मन्त्रिपरिषदको कार्यालयमा बुधबार भएको छलफलमा मुख्यमन्त्री शाहीले रोजगारीका लागि भारत गएका नागरिक फिर्ता भएसँगै कर्णाली प्रदेशमा कोभिड–१९ को संक्रमण बढेको बताउँदै सहयोगका लागि दाताहरूलाई आग्रह गरे ।

भारतबाट फर्किनेहरूको संख्या ३५ हजार पुगेको बताउँदै मुख्यमन्त्री शाहीले क्वारेन्टाइन व्यवस्थापन, आइसाेलेसन व्यवस्थापन र संक्रमण परीक्षणमा सरकारलाई समस्या परेको बताए ।

कर्णाली प्रदेशबाट झण्डै डेढ लाखको संख्यामा भारत र तेश्रो मुलुकहरूमा रोजगारीको लागि गएको बताउँदै मुख्यमन्त्री शाहीले अझै पनि १ लाखभन्दा बढी नागरिक कर्णाली फर्कने अनुमान रहेको बताए ।

ठूलो संख्यामा विदेशबाट फर्किएका नागरिकबाट संक्रमण रोक्न निकै चुनौतीपूर्ण रहेको भन्दै उनले विकास साझेदार संस्थाहरूको सहयोग आवश्यक रहेको बताए ।

कर्णाली प्रदेशमा स्थापना गरिएका दुइटा प्रयोगशाला २४ घण्टा सञ्चालन गर्दा पनि दैनिक ५ सय नमूना मात्र परीक्षण गर्न सकिने उनकाे भनाइ छ ।

‘महामारी रोकथाम र नियन्त्रणका लागि क्वारेन्टाइन र आइसाेलेसन व्यवस्था, पीसीआर प्रयोगशालाको स्थापना, परीक्षणका लागि आवश्यक किट र एम्बुलेन्समा सहयोग गरिदिनुपर्‍याे’, उनले भने, ‘कर्णाली प्रदेशका धेरैजसो नागरिक ३ महिनाका लागि मात्रै भारत जाने गरेका छन् । अहिले कोभिड–१९ ले निम्त्याएको परिस्थितिका कारण रित्तो हात फर्कनु परेको छ ।’

प्रदेश सरकारले रोजगारी गुमाएर फर्किएका अतिविपन्न नागरिकका लागि क्वारेन्टाइनमा रहनुपर्ने १४ दिनसम्मका लागि दैनिक निर्वाह भत्ता उपलब्ध गराउने निर्णय गरेको समेत उनले जानकारी दिए ।

विकास साझेदार संस्थाहरूसँगको छलफलमा मुख्यमन्त्री शाहीसहित प्रदेश सरकारका मन्त्रीहरू, प्रमुख सचिव, सचिवहरू र संयुक्त राष्ट्रसंघीय निकायका नेपाल प्रतिनिधिहरूको सहभागिता रहेको थियो ।

प्रकाशित मिति: बुधबार, जेठ २१, २०७७ १६:२५