कैलालीमा आइसोलेसन वार्ड भरिएपछि कोरोना संक्रमित राख्न समस्या

फाइल तस्वीर

A+ A A-

धनगढी स्थित सेती प्रादेशिक अस्पताल र टीकापुर अस्पतालमा रहेका आइसोलेसन वार्ड भरिएपछि बिरामी राख्न समस्या भएको छ ।

अस्पतालका अनुसार आइसोलेसन वार्ड भरिएपछि थप सङ्क्रमित राख्न समस्या भएको हो । जिल्लाका यी दुवै अस्पतालमा रहेका आइसोलेसन वार्डमा सङ्क्रमित बिरामी भरिएपछि समस्या भएको छ ।

मंगलबार कैलालीका १० जनामा कोरोना पुष्टि भएपछि सङ्क्रमितलाई राख्न आइसोलेसन वार्डमा शय्या अभाव भएको सेती प्रादेशिक अस्पतालले जनाएको छ । सेती अस्पतालसँग २४ शय्या र टीकापुर अस्पतालमा १२ शय्याको आइसोलेसन वार्ड छ । सेतीमा बिरामीको संख्या २५ पुगिसकेको छ । अझै गौरीगङ्गाका ५ सङ्क्रमितलाई पनि सेती अस्पताल लैजाने तयारी भएको छ ।

अस्पतालका मेसु डा. हेमराज पाण्डेले श्यया अभाव भएकाले बिरामीलाई कहाँ राखेर उपचार गर्ने भन्ने समस्या भएको बताए । ‘सङ्क्रमित दैनिक थपिन थालेका छन्’, पाण्डेले भने, ‘अब बिरामी कहाँ राखेर उपचार गर्ने भन्ने विकल्प खोजिनुपर्छ ।’ टीकापुर अस्पतालमा १२ शय्याको आइसोलेसन वार्ड छ । यहाँ १३ जनाको उपचार भइरहेको छ । टीकापुरमा मंगलबार ४ जनामा सङ्क्रमण देखिएपछि १ जनालाई शय्या अभाव हुँदा अस्पतालका अन्य वार्डमा रहेको शय्या प्रयोग गरेर बिरामी राख्नुपरेको अस्पतालले जनाएको छ ।

जिल्ला स्वास्थ्य कार्यालय कैलालीका प्रमुख लालबहादुर धामीले दुवै अस्पताल भरिएकाले अब अन्य ठाउँमा पनि विकल्प खोजी गरी बिरामी राख्ने व्यवस्था गर्न आवश्यक रहेको बताए । सेती अस्पतालमा ५० शय्याको कोरोना अस्पताल निर्माणपछि हस्तान्तरण भइसकेको छ तर उपकरण जडान बाँकी रहेकाले सञ्चालनमा आउन सकेको छैन । ‘यो अस्पताल सञ्चालनमा आएपछि केही राहत हुन्छ’, धामीले भने, ‘त्यसबाहेक अन्य अस्पताललाई पनि तयारी अवस्थामा राख्न जरुरी छ ।’ रासस