कोरोनामा नयाँ नियमः संक्रमित जति घरमा, उच्च लक्षण देखिए मात्र अस्पताल

A+ A A-

अब कोरोना भाइरस (कोभिड– १९) का संक्रमितको संख्या बढे घरमै राख्ने तयारी सरकारले गरेको छ । पछिल्लो पटक संक्रमितको संख्या २ हजार नाघेसँगै सरकारले लक्षण र स्वास्थ्य अवस्था हेरेर उपचार गर्ने तयारी गरेको हो । अब कोरोना पोजिटिभ देखिएका सबैलाई अस्पतालमा राखिने छैन ।

हाल नेपालमा कोरोना संक्रमितको संख्या २ हजार ९९ पुगेको छ भने मृत्यु हुनेको संख्या ८ पुगेको छ । निको भएर २ सय ६६ जना घर फर्किएका छन् । पहिलो चरणमा २ हजारलाई अस्पतालमै राखेर उपचार गर्ने सरकारको योजना थियो ।

स्वास्थ्य मन्त्रालयका सह–प्रवक्ता समीरकुमार अधिकारीका अनुसार कोरोना पोजिटिभ देखिएका तर लक्षण नदेखिएकालाई घरमै राख्ने सरकारको तयारी छ । अधिकारीले भने, ‘संक्रमितलाई घरमा छुट्टै कोठामा राख्ने र फोनबाटै उनीहरूले डाक्टरसँग परामर्श गर्नेछन् । आवश्यक परेमा मात्र अस्पताल ल्याइनेछ ।’

‘सरकारले संख्या बढेमा कसरी उपचार गर्ने भनेर कार्यदिशा बनाएको छ,’ स्वास्थ्य मन्त्रालयका सह–प्रवक्ता समीरकुमार अधिकारीले भने, ‘त्यहीअनुसार उपचार गर्ने हो ।’

‘अन्तर्राष्ट्रिय मान्यता पनि सामान्य संक्रमितलाई घरमै राखेर उपचार गर्ने छ,’ उनले भने, ‘संक्रमितको संख्या बढे यहाँ पनि त्यसै गर्ने हो ।’

कार्यदिशाअनुसार संक्रमितको संख्या ५ हजार नाघेपछि सामान्य लक्षण देखिएकालाई पनि घरमै राखिनेछ । सबै संक्रमितका लागि अस्पतालमा बेड नपुग्ने भएकाले लक्षण नभएका र सामान्य लक्षण भएकालाई घरमै राखिनेछ ।

२६ हजार ९ सय ३० वटा बेड छन् । जसमा आईसीयू बेड १५ सय ९५ वटा रहेका छन् । भेन्टिलेटर ८ सय ४० वटा छन् । आईसीयू सुविधा भएका अस्पतालको संख्या १ सय ९४ छ । आइसोलेसन बेड ३ हजार ७६ वटा छन् । कोरोनाका हब अस्पताल २५ वटा तोकिएको छ । कोभिड क्लिनिक १ सय ११ वटा छन् भने पहिलो लेबलमा १३, दोस्रोमा १२ र तेस्रोमा ३ वटा अस्पताल छन् ।

संक्रमितको संख्या बढे क्वारेन्टाइनमा पनि पोजिटिभ देखिएकालाई राख्ने सरकारको योजना छ । क्वारेन्टाइनमा बसेकालाई घरमा राख्ने र क्वारेन्टाइनमा आइसोलेसन बनाउने, अक्सिजन र भेन्टिलेटर जोडेर संक्रमितको उपचार गर्ने गरी सरकारले तयारी थालेको छ ।

जनस्वास्थ्यविद्हरूले पनि सबै संक्रमितलाई अस्पताल राख्नु नपर्ने बताएका छन् ।

‘यो अवधिसम्म व्यवस्थापन गरिसक्नुपर्ने हो,’ इपिडिमियोलोजी तथा सरुवा रोग नियन्त्रण महाशाखाका पूर्वनिर्देशक डा. बाबुराम मरासिनीले भने, ‘व्यवस्थापनमा सरकार चुकेको छ ।’

इपिडिमियोलोजी तथा सरूवा रोग नियन्त्रण महाशाखाका पूर्वनिर्देशक डा. बाबुराम मरासिनीले सरकारले यो अवधिसम्म सबै तयारी सकिसक्नुपर्ने बताए ।

‘संक्रमित बढ्दै गएमा अहिलेको संरचनाले धान्न सक्दैन,’ उनले भने, ‘२ महिनाको अविधिमा कोरोना फोकस अस्पताल नै बनाउन सकिन्थ्यो । सरकार चुकेको छ ।’

महामारीले हामीलाई काम गर्न समय दिएको भए पनि सदुपयोग गर्न नसकिएको उनले बताए । ‘हामीले समयको सदुपयोग गर्न सकेनौँ,’ उनले भने, ‘यसले भोलि ठूलो संकट निम्त्याउने खतरा छ ।’

डा. पदम सिम्खडाले सामान्य संक्रमितलाई घरमै राख्नुपर्ने बताए । ‘सामान्य संक्रमितलाई घरमै राख्ने हो,’ डा. पदम सिम्खडाले भने, ‘यो संख्या अझ बढ्दै जान्छ । सबैलाई अस्पताल राख्न सम्भव हुँदैन । अहिलेको भौतिक संरचनाले धान्न पनि सक्दैन ।

प्रकाशित मिति: मंगलबार, जेठ २०, २०७७ १८:४७