लकडाउनका कारण रोकिएका २ सय २७ शब चार्टर्ड उडानमार्फत् ल्याइने

A+ A A-

सरकारले कोरोना भाइरस संक्रमणका त्रासका कारण अन्तर्राष्ट्रिय उडान बन्द हुँदा विदेशमा रोकिएका शव ल्याउने निर्णय गरेको छ ।

नेपाली श्रमिकलाई ल्याउन चार्टर्ड उडान भएका बेला विभिन्न देशमा रोकिएका शव ल्याउने निर्णय सरकारले गरिएको हो । लकडाउनको अवधिमा कोरोना संक्रमणसहित अन्य कारणले खाडीका ६ देश मलेसिया, दक्षिण कोरियालगायतका देशमा कार्यरत २ सय २७ जना नेपालीको ज्यान गएको वैदेशिक रोजगार प्रवर्द्धन बोर्डका कार्यकारी निर्देशक राजन श्रेष्ठले जानकारी दिए ।

कोभिड-१९ का कारण उत्पन्न असहज परिस्थितिमा नेपाल ल्याउनै पर्ने अवस्थामा रहेका नेपालीलाई स्वदेश आउन सहजीकरण गर्ने आदेश २०७७ मा 'जहाज चार्टर्ड भएका बेला अलपत्र शव पनि ल्याउने व्यवस्था परराष्ट्र मन्त्रालय र श्रम रोजगार तथा सामाजिक सुरक्षा मन्त्रालयले मिलाउनुपर्ने' उल्लेख छ । उक्त आदेशअनुसार शव ल्याउन लाग्ने खर्च सम्बन्धित रोजगारदाताले व्यर्होनु पर्नेछ । शव ल्याउँदा लाग्ने खर्च वैदेशिक रोजगार कल्याणकारी कोषबाट रकम चलाउन सकिने भनिएको छ ।

कुन देशमा कति शव

बोर्डले सार्वजनिक तथ्यांक अनुसार लकडाउनको अवधिमा सबैभन्दा धेरै साउदीमा ५८ जना नेपालीले ज्यान गुमाएका छन् । जसमध्ये ४ जनाको कोरोनाको कारण ज्यान गएको हो भने बाँकीको अन्य कारणले ज्यान गएको बोर्डले जनाएको छ । साउदीमा ज्यान गुमाउने ११ जनाका परिवारले उतै अन्त्येष्टिका लागि अनुमति दिएका छन् । अहिले साउदीमा ४७ वटा शव रोकिएको छ ।

मलेसियमा यो अवधिमा ५१ जना नेपालीको विभिन्न कारणले ज्यान गएको छ । जसमध्ये ४ जनाका परिवारले उतै अन्त्येष्टिका लागि अनुमति दिएका छन् । मलेसियामा ४८ वटा शव रोकिएका छन् । कतारमा ३७ जनाको ज्यान गएको बोर्डको तथ्यांक छ । जसमध्ये १० जनाका परिवारले उतै अन्त्येष्टिका लागि अनुमति दिएका छन् । अब कतारमा २७ वटा शव रोकिएका छन् । जसमध्ये कतारमा ४ जना नेपालीको कोरोनाको कारण ज्यान गएको हो ।

यस्तै, युएईमा यो अवधिमा ४८ जनाको ज्यान कोरोनासहित विभिन्न कारणले ज्यान गएको छ । जसमध्ये ३६ जनाको परिवारले उतै सदगतका लागि अनुमति दिएका छन् भने अब यूएईमा १२ वटा शव व्यवस्थापन गर्न बाँकी छ । युएईमा ज्यान गुमाउनेमध्ये ९ जनाको कोरोनाको कारण ज्यान गएको बोर्डले जनाएको छ ।

कुवेतमा ११ जनाको ज्यान गएको छ । कुवेतमा ज्यान गुमाएका मृतकका आफन्त कसैले पनि अहिलेसम्म उतै अन्त्येष्टिका लागि अनुमति दिएका छैनन् । ११ वटै शव व्यवस्थापन गर्न बाँकी छ । बहराइनमा यो अवधिमा ५ जनाको ज्यान गएको छ जसमध्ये २ जनाका परिवारले उतै अन्त्येष्टिका लागि अनुमित दिएका छन् । अब तीन वटा शव बाँकी छ ।

दक्षिण कोरियामा यो अवधिमा ज्यान गुमाउने चारै जनाको शव उतै अन्त्येष्टिका लागि अनुमति आएको बोर्डले जनाएको छ । यो अवधिमा ओमानमा १ र अन्य विभिन्न देशमा ११ जनाको ज्यान गएको छ । विभिन्न देशमा ज्यान गुमाउने ११ मध्ये ८ जनाका परिवारले गन्तव्य देशमै अन्त्येष्टिका लागि अनुमति दिएका छन् ।

वैदेशिक रोजगार बोर्डले वैदेशिक रोजगारीको क्रममा विदेशमा मृत्यु भएका नेपालीको शव मृतकको घर घरसम्म निःशुल्क पुर्‍याउँदै आएको छ । कोरोनाको महामारीका कारण मृतकका आफन्त शव बुझ्न काठमाडौं आउन सक्ने अवस्था नभएकोले परिवारसँग समन्वय गरेर विमानस्थलबाट घरसम्म शव पुर्‍याइने बोर्डले बोर्डले जनाएको छ ।