आगलागीबाट कार्यालय ध्वस्त भएपछि विद्यालयमा गाउँपालिका

A+ A A-

मकवानपुरको उत्तरी क्षेत्रस्थित कैलाश गाउँपालिका कार्यालय आगलागीबाट ध्वस्त भएपछि विद्यालयको भवनबाट सेवा सुरु गरेको छ ।

आगलागीका कारण प्रशासनिक भवन पूर्णरूपमा जलेपछि गाउँपालिकाले स्थानीय भवानी माध्यमिक विद्यालयको भवनबाट प्रशासनिक कार्य सुचारु गरेको छ । गत जेठ १५ गते कैलाश गाउँपालिका–३ कालिकाटारस्थित प्रशासनिक भवनमा आगलागी भएको थियो । आगलागीबाट १८ कोठे भवनसहित सबै भौतिक सामग्री जलेर नष्ट भएको थियो ।

चट्याङका कारण सौर्य ऊर्जा प्रणालीमा समस्या आएपछि विद्युतीय सटका कारण आगलागी भएको गाउँपालिकाको प्रारम्भिक अनुमान छ । कार्यालय जल्दा ४ करोडको क्षति भएको अनुमान गरिएको छ । आगलागीको विषयमा अनुसन्धान गर्न उपाध्यक्ष सुकुमाया थिङको संयोजकत्वमा ७ सदस्यीय समिति गठन भई छानबिन थालिएको गाउँपालिकाले जनाएको छ ।

गाउँपालिकाका अनुसार अन्य विकल्प नहुँदासम्म विद्यालय भवनबाटै प्रशासनिक सेवा सुचारु गरिने भएको छ । विद्यालयबाट नजिकै रहेको वडा नं. ३ को कार्यालयमा अध्यक्ष र उपाध्यक्षको कार्यकक्ष निर्माण गर्ने निर्णय कार्यपालिका बैठकले गरेको छ । बैठकले ३५ लाख लागतमा नयाँ अस्थायी टहरो निर्माण गर्ने निर्णय गरेको गाउँपालिकाले जनाएको छ ।

निष्पक्ष छानबिन हुनेमा शंका छ : कांग्रेस

गाउँपालिकामा आगलागी भएको विषयमा गठित छानबिन समितिमाथि नेपाली कांग्रेस प्रतिनिधिसभा २ (ख) क्षेत्रीय समिति मकवानपुरले शंका व्यक्त गरेको छ ।

गाउँपालिकाले गठन गरेको छानबिन समितिमा नेकपामा आवद्ध भएका मात्रै सदस्य रहेको भन्दै आगलागीको सत्यतथ्य खुल्नेमा शंका रहेको कांग्रेस क्षेत्रीय समितिले मंगलबार जारी गरेको विज्ञप्तिमार्फत आरोप लगाएको छ । ‘यस समिति एकपक्षीयरूपमा मात्रै गठन गरिएको ध्यानाकर्षण भएको छ' कांग्रेस क्षेत्रीय समितिले भन्यो ।

कांग्रेस क्षेत्रीय सभापति लोकबहादुर मुक्तानद्वारा जारी विज्ञप्तीमा गाउँपालिकामा रहेका विभिन्न राजनीतिक दल तथा सम्बन्धित निकाय सम्मिलित विश्वसनीय उच्चस्तरीय छानबिन समिति तत्काल गठन गर्न उल्लेख छ ।

प्रकाशित मिति: मंगलबार, जेठ २०, २०७७ १७:२१