सामान्य विवादमा छुरा प्रहार गरी साथीको हत्या, ३ जना पक्राउ

A+ A A-

सुनसरीको इटहरी २० तरहराका एक युवाको हत्या गरि फरार रहेका ३ जनालाई प्रहरीले पक्राउ गरेको छ । ईलाका प्रहरी कार्यालय इटहरीको टोलीले तरहराका २८ वर्षीय राजन राईको हत्या गरि फरार रहेका ३ जनालाई खनार क्षेत्रबाट प्रहरीले पक्राउ गरेको हो ।

पक्राउ पर्नेहरूमा मुख्य अभियुक्त प्रज्वल तामाङसहित सहयोगी अभिषेक पौडेल र अभिषेक गिरी रहेका छन् । सामान्य विवादको क्रममा ३ जना मिलेर राजनको हत्या गरेको प्रारम्भिक अनुसन्धानबाट खुलेको इलाका प्रहरी कार्यालय इटहरीका डिएसपी धर्मराज भण्डारीले जानकारी दिए ।

आइतबार राति तरहरामा उनीहरूले राईलाई छुरा प्रहर गरी गम्भीर घाइते बनाएका थिए । तरहरामा उपचार हुन नसकेपछि उनलाई धरानस्थित बीपी कोइराला स्वास्थ्य विज्ञान प्रतिष्ठान लगिएकोमा बाटोमा नै मृत्यु भएको चिकित्सकले घोषणा गरेका थिए ।

बेलायतमा बस्दै आएका मृतक राई लकडाउनको कारणले फर्कन पाएका थिएनन् । राईलाई प्रज्वल तामाङले छुरा प्रहार गरेको प्रहरीले जनाएको छ । केसी र पौडेल पनि उनको साथमा थिए ।

प्रहरीका अुनसार घटनाका दिन इटहरी २० निवासी अमित घिमिरेको घरमा तामाङसँग सामान्य विवाद भएको थियो । सोही कारण अभिषेक गिरी र अभिषेक पौडेलसमेत मिलेर राई र घिमिरेलाई घेरा हाली काठको लाठ्ठीले कुटपिट गरेको प्रहरीले जनाएको छ ।

कुटपिटकै क्रममा तामाङले आफूसँग भएको फलामको धारिलो हतियारले राईको पेट र छातीमा प्रहार गरेका थिए । त्ययसपछि बाटोमै ढलेका राईलाई अमित घिमिरे र अनिल घिमिरेसमेतले उठाएर उपचारका लागि तत्कालै तरहराको नितान्त पोलिक्लिनिकमा लगेका थिए ।

प्रकाशित मिति: मंगलबार, जेठ २०, २०७७ १४:४८