'घर बस्ने कर्मचारीलाई पूरै तलब दिँदा काममा आउनेको मनोबल घट्छ'

A+ A A-

नेपाल उद्योग वाणिज्य महासंघका वरिष्ठ उपाध्यक्ष शेखर गोल्छाले सरकारले उद्योग व्यवसायमा परेको समस्या र समाधानको उपायमा ध्यान नुपर्‍याएको गुनासो गरेका छन् । निजी क्षेत्रले माग गरेको राहतको कार्यक्रमको लागि सरकारले आगामी आर्थिक वर्षको बजेट पर्खन आग्रह गरेको अवस्थामा बजेट पछि सरकारले नसुनेको गुनासो निजी क्षेत्रको छ ।

वरिष्ठ उपाध्यक्ष गोल्छाले घरमा बस्ने श्रमिकको लागि ५० प्रतिशत र काममा आउनेको लागि पुरै तलब दिने उद्योगी व्यवसायीहरुको प्रस्तावलाई सरकारले वेवास्ता गरेको बताएका छन् । 'हाम्रो प्रस्तावलाई बेवास्ता गर्दै समाजिक सुरक्षा कोषमा भुक्तानी गर्नुपर्ने ३१ प्रतिशत रकम पछि तिर्न मिल्ने गरी सरकारले तिर्ने व्यवस्थातर्फ देखिएकोले गरेकोले उद्योगीको समस्यामा सरकार गम्भीर नभएको देखिन्छ' न्युज एजेन्सीसँगको कुराकानीमा गोल्छाले भने 'घरमै बस्ने र श्रमिकलाई पूरै तलब दिदा काममा आउने श्रमिकको मनोबल घट्छ ।'

त्यस्तै उनले उद्योगलाई प्रतिष्पर्धी बनाउन विद्युतमा छुट दिनुपर्नेमा नदिएको, स्टिमुलस प्याकेजमा बुझाउन नसकेको, निर्यातमा सहुलियत नदिएको, आयकर छुटमा केही बढी क्षति भएका पर्यटन लगायतका क्षेत्रमा केही छुट दिएपनि सबै प्रकारका उद्योगलाई नसमेटिएको बताए । कोरोना भाइरस (कोभिड १९)को रोकथाम तथा नियन्त्रणका लागि लकडाउन भएपछि अर्थतन्त्रमा परेको असर र उद्योग व्यवसायिका समस्यालाई सम्बोधन गर्ने गरी बजेट नआएको उनको भनाई रहेको छ ।

पुनर्कर्जाको आकार १ खर्ब पुर्‍याउने, पुनर्कर्जामा साना तथा मझौला उद्योगी व्यवसायीलाई पहुँच दिने, बैंकको ब्याजदर ५ प्रतिशतमा झार्नुपर्ने, कर्जालाई पुनर्तालिकीकरण गर्नुपर्ने लगायतमा माग निजी क्षेत्रबाट राखिएको तर बजेटले पुनर्कर्जा १ खर्ब पुर्‍याउने बाहेकका माग सम्बोधन नगरेको उनले बताए ।

गोल्छाले सरकारले उद्योगीलाई कुनै सहयोग पनि नगर्ने र लकडाउन पनि लम्ब्याइरहने हो भने सबैभन्दा बढी समस्या आउने बताए । उनले लकडाउन रहिरहँदासम्म अर्थतन्त्र चलायमान हुन नसक्ने भएकाले तत्काल लकडाउन खोल्न आग्रहसमेत गरे । ‘जब सम्म लकडाउन रहन्छ अर्थतन्त्र चलायमान हुन पनि सक्दैन् । अहिले सरकारले ४२ वटा उद्योग खोल्ने भनेर कुरा पनि गरेको छ तर त्यसमा जुन नियमहरू ल्याएको छ त्यसमा पनि व्यावहारिक कठिनाइले गर्दाखेरी खुल्न सकिरहेको छैन् । हामीले के भन्छौं भने लकडाउन कुनै समस्याको समाधान नै होइन’ उनले भने ।