कोरोना संक्रमणबाट निको हुनेको संख्या २९ लाख नाघ्यो

A+ A A-

विश्वभर कोरोना संक्रमणबाट निको हुनेको संख्या २९ लाख नाघेको छ । यो भाइरसबाट सबैभन्दा बढी अमेरिकामा मुक्त भएका छन् । त्यहाँ संक्रमितको १८ लाख ५९ हजार संख्यामध्ये ६ लाख १५ हजार ४ सय व्यक्ति निको भएका छन् ।

त्यस्तै, ब्राजिलमा कोरोना जितेर घर फर्कंनेको संख्या २ लाख ११ हजार पुगेको छ । त्यहाँ अहिलेसम्म ५ लाख २९ हजार व्यक्ति कोरोनाबाट प्रभावित भएका छन् ।

स्पेनमा यो भाइरसबाट मुक्त भएर झण्डै १ लाख ९७ हजार व्यक्ति घर फर्किएका छन् । त्यहाँ अहिलेसम्म २ लाख ८६ हजार व्यक्तिमा कोरोना संक्रमण पुष्टि भएको छ ।

रूसमा झण्डै १ लाख ७६ हजार व्यक्तिले कोरोना जितेका छन् । त्यहाँ ४ लाख १४ हजार व्यक्ति कोरोनाबाट प्रभावित छन् ।

जर्मनीमा कोरोनाबाट निको हुनेको संख्या १ लाख ६६ हजार नाघेको छ । जर्मनीमा १ लाख ८३ हजार ७ सय व्यक्तिमा याे भाइरस पुष्टि भएको छ । २ लाख ३३ हजार संक्रमित रहेको इटालीमा १ लाख ५८ हजार व्यक्ति उपचारपछि घर फर्किएका छन् ।

त्यस्तै, टर्कीमा १ लाख २९ हजार, इरानमा १ लाख २१ हजार, भारतमा ९५ हजार ७ सय, चीनमा ७८ हजार, फ्रान्स, पेरुमा समान साढे ६८ हजार, मेक्सिकोमा साढे ६७ हजार, साउदी अरबमा ६४ हजार, क्यानडामा ४९ हजार, कतारमा साढे ३३ हजार, स्विटजरल्याण्डमा २८ हजार, पाकिस्तानमा २६ हजार, सिंगापुरमा २२ हजार व्यक्ति कोरोना मुक्त भएका छन् ।

अन्य देशमा पनि कोरोना जितेर घर फर्कंनेको संख्या बढिरहेको छ । नेपालमा १ हजार ८ सय ११ व्यक्तिमध्ये २ सय २१ संक्रमण मुक्त भएका छन् ।

विश्वका २१५ देशमा फैलिसकेको कोरोनाबाट मंगलबार बिहानसम्म ६३ लाख ६५ हजार व्यक्ति प्रभावित भएका छन् । जसमध्ये ३ लाख ७७ व्यक्तिको मृत्यु भएको छ ।