डडेल्धुराका युवकले जिते कोरोना, आज डिस्चार्ज हुँदै

A+ A A-

डडेल्धुराका कोरोना संक्रमित युवकले कोरोनालाई जितेका छन् । जिल्लाको भित्री मधेसमा पर्ने परशुराम नगरपालिका-१० का २८ वर्षीय युवकले कोरोना जितेका हुन् ।

धनगढीस्थित सेती प्रादेशिक अस्पतालको प्रयोगशालामा गरिएको परीक्षणमा २ पटक रिपोर्ट नेगेटिभ आएपछि उनलाई आज डिस्चार्ज गर्न लागिएको हो ।

ती युवकको २ पटक कोरोना रिपोर्ट नेगेटिभ आएपछि उनलाई डिस्चार्ज गर्न लागिएको डडेल्धुरा अस्पतालका निमित्त मेडिकल सुपरिटेन्डेन्ट डा. जगदीशचन्द्र विष्टले जानकारी दिए ।

‘उहाँको २ पटक नमुना परीक्षण गर्दा नेगेटिभ देखिएपछि डिस्चार्ज गर्न लागेका छौँ’, उनले भने, ‘सम्भवत आज उहाँ कोनोना जितेर घर जानुहुन्छ होला ।’

सरकारी कर्मचारीसमेत रहेका ती युवकमा ९ जेठमा कोरोनाको संक्रमण पुष्टि भएको थियो । डडेल्धुरा अस्पतालको आइसोलेसनमा उपचाररत युवकले १० दिनमै कोरोना जितेका हुन् । उनको आन्तरिक ट्राभल हिस्ट्री मात्रै रहेको छ ।

यो सँगै सुदूरपश्चिममा कोरोनाको संक्रमणबाट मुक्त हुनेको संख्या ६ पुगेको छ । यसअघि यहाँका ५ जना कोरोना जितेर घर फर्किसकेका छन् ।

सुदूरपश्चिम प्रदेशमा गत चैत १४ गते पहिलो कोरोना संक्रमित फेला परेका थिए । धनगढी उपमहानगरपालिका ५ का ३४ वर्षीय पुरुषमा कोरोना पुष्टि भएको थियो । उनी यूएईको दुबईबाट फर्किएका थिए । त्यसपछि २२ चैतमा थप ३ जनामा कोरोना पुष्टि भएको थियो।

धनगढी उपमहानगरपालिका-५ की ३४ वर्षीया महिला, कैलाली लम्कीका २१ वर्षीय युवक र कञ्चनपुरको वेदकोट नगरपालिकाका ४१ वर्षीय युवकमा कोरोना पुष्टि भएको थियो । लम्कीका २१ वर्षीय युवक भारतबाट फर्किएका थिए ।

१ वैशाखमा लम्की चुहा नगरपालिका-१ की ६५ वर्षीया वृद्धामा पनि कोरोना पुष्टि भएको थियो । उनी वीरगञ्जबाट कैलाली आएकी थिइन्। उनीहरू पाँचै जना सेती प्रादेशिक अस्पतालमा उपचारपछि निको भएर घर फर्किसकेका छन् ।

कोभिड–१९ लाई जित्दै अस्पतालबाट घर फर्किनेमा ३ पुरुष र २ महिला छन् । घर फर्किने ३ कैलालीका हुन् भने अर्का १ व्यक्ति कञ्चनपुरका हुन् ।

सुदूरपश्चिममा सोमबारसम्म कोरोना संक्रमितको संख्या २७ छ । जसमध्ये ६ जना निको भएका छन् भने १ जनाको कोरोनाबाट मृत्यु भएको छ । बाजुराको बूढीगंगा नगरपालिका–१ की २ वर्षीया बालिकाको आइतबार मृत्यु भएको थियो ।

प्रकाशित मिति: सोमबार, जेठ १९, २०७७ १०:४७