प्रदेश २ कोरोना राहत कोषबाट अस्पतालका लागि ५ करोड १३ लाख निकासा

A+ A A-

कोरोना महामारी नियन्त्रण तथा उपचारका लागि प्रदेश २ सरकारले स्थापना गरेको कोषबाट प्रदेशका विभिन्न अस्पताललाई हालसम्म ८ करोड २३ लाख २५ हजार रूपैयाँ रकम हस्तान्तरण गरिएको छ । प्रदेश सरकारले पछिल्लो चरणमा मात्र विभिन्न अस्पताललको लागि ५ करोड १३ लाख ७५ हजार रूपैयाँ निकासा गरेको छ ।

पछिल्लो चरणमा कोरोना भारइस संक्रमण रोकथाम नियन्त्रण तथा उपचार कोषबाट रकम पठाएको अस्पतालमा पर्साको पोखरिया अस्पताललाई औजार उपकरण खरिदमा १० लाख, जनशक्ति व्यवस्थापनमा १० लाख, कोभिड-१९ संक्रमित व्यक्ति एवं स्वास्थ्यकर्मीका लागि खाजा, खाना एवं पानी व्यवस्थापन गर्न १० लाख, औषधि खरिदमा ५ लाख र खानेपानी व्यवस्थापनमा २ लाख गरी ३७ लाख, रौतहटको गौर अस्पताल र मातहत रहेका कोभिड विशेष अस्पतालका लागि ५६ लाख रूपैयाँ पठाइएको छ ।

त्यस्तै, सर्लाहीको मलंगवा अस्पताल र मातहत रहेको कोभिड अस्पतालका लागि ४० लाख, सप्तरीको भारदह अस्पतालमा प्रिफ्याब भवन निर्माणका लागि १ करोड ७५ लाख, फर्निचर फिक्सचर तर्फ २५ लाख, शौचालय निर्माणतर्फ २५ लाख, अस्पताल रंगरोगनका लागि १० लाख, ल्याब सेटअपका लागि ५० लाख र इलेक्ट्रिफिकेशन, प्लम्बिङतर्फ ५ लाख गरी २ करोड ९० लाख रूपैयाँ पठाइएको प्रदेश सरकारले जनाएको छ ।

यता सिरहाको सिरहा अस्पताल र मातहत रहेको कोभिड अस्पतालका लागि ६५ लाख, र सप्तरीको गजेन्द्रनारायण सिंह सगरमाथा अस्पताल मातहत रहेको साईकृष्ण मेडिकल कलेज कोभिड-१९ लेभल १ अस्पतालमा आइसोलेसन कक्ष निर्माण गर्न नेपाली सेनाको भिमदल गणलाई २५ रूपैयाँ उपलब्ध गराइएको छ ।

रकम पठाइएको अस्पतालमा पर्साको पोखरिया र सप्तरीको भारदह अस्पताललाई प्रदेश सरकारले हालै ५० शय्याको अस्पतालमा स्तरोन्नती गर्ने निर्णय गरेको थियो ।

प्रदेश सरकारले यसअघि उपचार कोषबाट गजेन्द्र नारायण सिंह सगरमाथा अस्पताललाई १० लाख, सप्तरीको भारदह अस्पताललाई ३१ लाख, लहान अस्पताललाई १९ लाख ५० हजार, सिरहा अस्पताललाई १९ लाख ५० हजार, प्रादेशिक अस्पताल जनकपुरलाई ३१ लाख २५ हजार, जलेश्वर अस्पताललाई १९ लाख ५० हजार, मलंगवा अस्पताललाई १९ लाख ५० हजार, गौर अस्पताललाई १९ लाख ५० हजार, कलैया अस्पताललाई ३१ लाख २५ हजार, पोखरिया अस्पताल पर्सालाई ३१ लाख २५ हजार, र नारायणी अस्पताललाई विरगंज लाई खाद्यान्नको लागि २५ लाख तथा पीसीआर मेसिन संचालनको लागि ५० लाख गरी ३ करोड ९ लाख ५० हजार रूपैयाँ उपलब्ध गराएको थियो ।

प्रदेश सरकारले उपचार कोषको अतिरिक्त समाजिक विकास मन्त्रालयको बजेटबाट समेत विभिन्न अस्पताललाई रकम उपलब्ध गराएको छ । प्रदेश सरकारले बजेट उपलब्ध गराए पनि ८ जिल्लामै प्रभावकारीरूपमा काम अगाडि बढ्न नसकेको स्थानीयको गुनासो छ ।

प्रकाशित मिति: आइतबार, जेठ १८, २०७७ २२:१०