कोरोना परीक्षण नगरी क्वारेन्टाइनमा राख्दा झापामा संक्रमणको उच्च जोखिम

A+ A A-

भारतबाट पूर्वको सीमा नाका काँकडभिट्टास्थित मेची पुलसम्म आएका नेपालीलाई आरडीटी, पीसीआर र ज्वरोसमेत जाँच नगरी विभिन्न क्वारेन्टाइन र होल्डिङ एरियामा राख्दा झापामा कोरोना संक्रमणको उच्च जोखिम बढेको छ ।

पूर्वी सीमा नाकाबाट नेपाल आउने भीड बढेसँगै मेचीनगर, अर्जुनधारा, बिर्तामोड, शिवसताक्षी, दमक लगायतका क्षेत्रमा कोरोना संक्रमणको उच्च जोखिम बढेको हो । कोरोनाको जाँच नै नगरी दिनैपिच्छे नेपाल आउने र भारत जाने मानिसको संख्या बढेसँगै जोखिम बढेको सिमावर्ती क्षेत्रका बासिन्दाको दुःखेसो छ ।

भारतसँगै सीमा जोडिएको भद्रपुर नगरपालिका, कचनकवल, बाह्रदशी र झापा गाउँपालिकामा संक्रमण देखिसकेको छ । पछिल्लो समय भारतबाट आएर झापाका क्वारेन्टाइनमा बसेका नागरिकलाई कोरोना संक्रमणको पुष्टि हुदै आएको अवस्थामा काँकडभिट्टा र अन्य नाकामार्फत् नेपाल भित्रने सर्वसाधारणको सामान्य स्वास्थ्य परीक्षणसमेत गरिएको छैन ।

ठूलो संख्यामा नेपाली भित्र्दा र आवश्यक स्वास्थ्य सामग्री नहुँदा स्वास्थ्य परीक्षण गर्न नसकिएकाले जोखिमसमेत बढेको मेचीनगर नगरपालिकाका विमल आचार्यले बताए ।

पछिल्लो १ हप्ताको अवधिमा मात्रै पूर्वी नाका काँकडभिट्टा हुँदै झण्डै २ हजार ७ सय नेपाली नागरिक नेपाल भित्रिएका छन् । उनीहरूमध्ये १ हजार ३ सय जना झापाकै र बाँकी अन्य जिल्लाका रहेका छन् । झापा बाहेकका अन्य जिल्लाका नागरिकलाई सम्बन्धित जिल्लासँग समन्वय गरी सदरमुकामसम्म पुर्याउने व्यवस्था मिलाइएको छ । उनीहरूलाई जिल्ला प्रशासन कार्यालयबाट ५ मिनेटमा सवारी तथा नागरिकको पास इमेलमार्फत् प्रहरीलाई पठाएर सम्बन्धित जिल्लाको क्वारेन्टाइनमा पठाउने गरिएको झापाका सहायक प्रमुख जिल्ला अधिकारी राजकुमार राईले जानकारी दिए ।

यस्तै, भारत गएकाहरू काँकडभिट्टा बाहेक झापाकै भद्रपुर, केचना, झापा, गौरीगञ्ज लगायतका स्थानबाट समेत लुकिछिपी नेपाल प्रवेश गर्ने क्रम रोकिएको छैन । हालसम्म झापामा १ सय ७ जनामा कोरोना भाइरसको संक्रमण पुष्टि भइसकेको छ ।

कचनकवल गाउँपालिकामा मात्रै भारतबाट आएर क्वारेन्टाइनमा बसेका मध्ये १ सय जनामा संक्रमण पुष्टि भइसकेको छ ।

त्यस्तै, केही दिन अघिमात्रै भारतबाटै आएर भद्रपुर नगरपालिकाको क्वारेन्टाइनमा बसेका अर्का एकजनामा समेत संक्रमण पुष्टि भएको छ ।

प्रकाशित मिति: आइतबार, जेठ १८, २०७७ २१:५५