कपटपूर्ण तरिकाले बजेटमार्फत् एमसीसी आयो : पूर्वमन्त्री मण्डल

A+ A A-

पूर्वमन्त्री तथा नेपाल कम्युनिस्ट पार्टी (नेकपा) का सांसद शिवकुमार मण्डलले सरकारले एमसीसी पारित गराउन छलकपट गरिरहेको आरोप लगाएका छन् । नेकपा केन्द्रीय सदस्यसमेत रहेका सांसद मण्डले शिलापत्रसँगको कुराकानीमा सरकारले षड्यन्त्रपूर्वक ढंगले संसदमा एमसीसी ल्याउन खोजेको आरोप लगाएका हुन् ।

‘जुन विषय संसदबाट पारित नै भएको छैन, त्यसका लागि यति धेरै बजेट विनियोजन भएको छ । षड्यन्त्रपूर्वक ढंगबाट बजेट र कपटपूर्ण विधिबाट एमसीसी आयो,’ उनले भने, ‘यो सरकारको अत्यन्त निन्दनीय र गैरजिम्मेवार क्रियाकलाप हो ।’

उनले नेकपा केन्द्रीय कमिटीले एमसीसी अध्ययनपश्चात् छानबिन समिति बनाएको बताउँदै पास नै गर्नुपर्ने भए पनि परिमार्जिनसहित हुनुपर्ने पार्टीको अडान रहेकाले पार्टीलाई नै सरकारले छक्याएर एकलौटी रूपमा बजेटमार्फत एमसीसी ल्याएर सरकार कुनै शक्तिकेन्द्रको मतियार बन्न लागेको आरोप लगाए ।

‘नेकपा केन्द्रीय कमिटीको बैठकमै यो विषय गम्भीर रूपले उठेको विषय हो । कमरेड झलनाथ खनालको संयोजकत्वमा गठित अध्ययन कार्यादलले दिएको निष्कर्षविपरीत एमसीसीको परियोजना षड्यन्त्रपूर्वक लागू गर्न खोजिएको छ । राष्ट्रहितविपरीत हुने यस्ता कार्य कुनै हालतमा मान्य हुँदैन । केन्द्रीय कमिटीले विगतदेखि उठाएको विषयलाई छलद्वारा पास गर्न खोजिएको छ,’ उनले भने, ‘एमसीसी राष्ट्रहितविपरीत भएको थप पुष्टि भएको छ, सरकार कुनै न कुनै शक्तिकेन्द्रको मतियार बन्नु हुँदैन । गल्ती सच्याउनुपर्छ ।’

उनले पार्टीले बनाएको कार्यदलले एमसीसीका विषयमा छलफल गरेर धारणा नबनाईकन विपक्षीको उक्साहट र वैदेशिक शक्तिकेन्द्रको इशारामा सरकार चल्न खोजेको दाबी गरे । ‘कार्यदलको सुभावअनुसार पार्टीले आधिकारिक धारणा नै नबनाईकन, कांग्रेसको उक्साहट र वैदेशिक शक्तिकेन्द्रको इशारामा सरकारले बजेटमार्फत एमसीसी छिराउन खोजेको छ,’ उनले भने, ‘सरकारको यस्तो गतिविधि निन्दनीय हो । यस्ता खाले गतिविधि सरकारले नगरोस् ।’