लकडाउन : हार्डवेयर व्यवसायीका गुनासै गुनासा

A+ A A-

उद्योगीको मनोमानीका कारण मारमा परेको गुनासो प्रदेश १ का हार्डवेयर व्यवसायीहरूले गरेका छन् । इटहरीमा आयोजित पत्रकार सम्मेलनमा व्यवसायीहरूले असामान्य अवस्था सिर्जना हुनासाथ उद्योगीहरूले कारोबारको नीति परिवर्तन गरेकाे, अस्वाभाविक मूल्यवृद्धि गरेकाे बताए ।

यही कारण ढुवानी लागत बढ्न गई समग्र वस्तुको लागत बढ्दा व्यवसायीमाथि कालो बजारीको आरोप लगाइएकाे भन्दै उनीहरूले गुनासाे गरेका हुन् ।

व्यवसायीले नभएर उद्योगीले नै समस्या सिर्जना गरेको उनीहरूकाे दाबी छ । हार्डवेयर, प्लाई तथा सेनेटरी व्यवसायी संघ, इटहरी, धरान हार्डवेयर संघ, विराटनगर हार्डवेयर संघ, इनरुवा हार्डवेयर संघले संयुक्त रूपमा विज्ञप्ति जारी गरी अनावश्यक र कृत्रिम अभाव सिर्जना गरी मूल्य बढाउँदा व्यवसाय नियमित रूपमा सञ्चालन गर्न नसक्ने व्यवसायीले बताए ।

सम्बन्धित कम्पनीहरूसँग पटकपटक अनुरोध गर्दा पनि सुनुवाइ नभए विकल्प रोज्ने व्यवसायीहरूकाे भनाइ छ ।

बैंक ग्यारेन्टी, ओडीसी चेक, पीडीसी चेक, लिखित र माैखिक सहमति भएकै आधारमा लकडाउन खुल्नासाथ कानुनी प्रावधानलाई आधार मान्दै वक्यौता अवधि एवं वक्यौता खाता समायोजन गर्नुपर्ने भनेर व्यवसायीलाई मानसिक, व्यक्तिगत, पारिवारिक तथा सामाजिक तनाव हुने गरी भुक्तानीका लागि दबाब सिर्जना नगर्न उद्योगीहरूसँग उनीहरूले माग पनि गरेका छन् ।

उद्योगीहरूले विनाकारण मूल्यवृद्धि गरेपछि यसको प्रत्यक्ष असर उपभोक्ता र हार्डवेयर व्यवसायीमा परेको बताउँदै मूल्यवृद्धिको चौतर्फी विरोध भइरहँदासमेत सरोकारवाला निकायबाट अनुगमन, छानविन तथा मूल्य नियन्त्रण गर्नेतर्फ कुनै कदम नचालिनु अर्को आश्चर्यको विषय बनेको हार्डवेयर, प्लाई तथा सेनेटरी व्यवसायी संघ इटहरीका अध्यक्ष भोलाप्रसाद निरौलाले बताए ।

विज्ञप्तिमा भनिएको छ, 'जब जब देशमा विषम परिस्थिति सिर्जना हुन्छ, तबतब उत्पादक उद्योगीहरूले पनि धमिलो पानीमा माछा मार्ने दाउमा रहेको जस्तो गतिविधिहरू गर्न खोजेको देख्दा हामी व्यवसायीको मानसपटलमा चाहिँ उद्योगीहरूले मानवीय संवेदना तथा सामाजिक उत्तरदायित्व भुल्दै गएको पो हो कि ? भन्ने प्रश्न घुमिरहेको हुन्छ, जसको जवाफ आजको मितिसम्म हामीले प्राप्त गर्न सकेका छैनौँ । सरकारले पनि हामीलाई व्यवसाय गर्न सहज वातावरण प्रदान गरोस् ।'

लकडाउनको अवस्थामा समेत उद्योगीले एकाएक मूल्यवृद्धि गर्नु आम उपभोक्तामाथि शोषण र अन्याय गरेको विराटनगर हार्डवेयर संघ विराटनगरका अध्यक्ष मुकुन्द दाहालले बताए ।

यस्तो अवस्थामा हार्डवेयर व्यवसायीका लागि सरकारले विशेष प्राथमिकता दिएर योजना तथा नीति ल्याउन जरुरी भएको व्यवसायी तारा कट्वालले बताए ।

लकडाउनको समयावधिभरको घरभाडा छुट गरिदिन तथा लकडाउन खुलेर व्यवसाय सञ्चालन भएपश्चात् ६० दिन पछिदेखि मात्र घरभाडा भुक्तानी दिने वातावरण निर्माण गर्न इनरुवा हार्डवेयर संघका अध्यक्ष पहलबहादुर कट्वालले अपिल गरे ।

पत्रकार सम्मेलनमा धरान हार्डवेयर संघका अध्यक्ष नवीन राजभण्डारीले घरबहाल कर, व्यावसायिक कर, सामाजिक सुरक्षा कर बुझाउने समय अघिल्लो आर्थिक वर्ष २०७७/७८ को पुस मसान्तसम्म उपलब्ध गराउने तथा उक्त समय सीमासम्म कुनै पनि हर्जाना तथा ब्याज नलगाउन स्थानीय, प्रदेश तथा संघीय सरकारसमक्ष माग गरे ।

लकडाउनको अवधिभर सवारी साधनका सबै प्रकारका कर छुट गर्ने तथा नवीकरण गर्नुपर्ने सवारीको हकमा नवीकरण गर्ने समय सीमा १ वर्ष थप गर्न तथा लाग्ने जरिमाना छुटगर्न स्थानीय, प्रदेश तथा संघीय सरकारसँग व्यवासायीहरूले माग गरेका छन् ।

त्यसैगरी, पूर्वका हार्डवेयर व्यवसायीहरूले वित्तीय संस्थाले ब्याज कम्तीमा ५५ घटाई कम्तीमा ३ वर्षसम्म स्थिर राख्न, लकडाउनको समयको ब्याजमा विशेष सहुलियत प्रदान गर्न, वक्यौता ब्याजका लागि ब्याज पुँजीकरणको व्यवस्था गर्न तथा पुनर्कर्जाको व्यवस्था गरी व्यवसायलाई चलायमान अवस्थामा ल्याउन नेपाल राष्ट्र बैंक तथा वित्तीय संस्थाहरूसँग माग गरेका छन् ।

प्रकाशित मिति: आइतबार, जेठ १८, २०७७ १२:४०