आहा ! साउँद गाउँ जाने बाटो

A+ A A-

डडेल्धुराको अमरगढी नगरपालिका-३ का बसन्त साउँद नजिकै रहेको घटाल माध्यमिक विद्यालय कक्षा १० मा अध्ययनरत छन् । उनलाई १ वर्ष अगाडि घरबाट विद्यालय जाने भनेपछि निकै चिन्ता लाग्थ्यो । स्कुल पुग्न १०/१५ मिनेट लाग्ने भए पनि उनी घरबाट निस्किन आनाकानी गर्दथे ।

स्कुलमा पढ्नुपर्छ भन्ने चिन्ताभन्दा पनि पनि साउँदलाई घरबाट विद्यालयसम्म पुग्ने बाटोको समस्या थियो ।

वर्षा सुरू भएपछि बाटो हिलाम्मे र हिउँद लागेपछि धुलाम्मे हुने गरेको कारण बसन्त मात्रै होइन सिङ्गो गाउँ नै निकै समस्यामा थियो ।

जेठ सुरूसँगै स्थानीयले खेतमा रोपाइँको लागि विउ छर्ने गरेको कारण खेतको बीचमा रहेको बाटोमा हिलो मात्रै हुन्थ्यो । यो समयमा बसन्तको घरको आँगन हुँदै स्कुलसम्म पुग्ने बाटो हिलाम्य हुन्थ्यो । तर, अहिले स्थानीय तहमा जनप्रतिनिधि आइसकेपछि भने बाटोको अवस्था फेरिएको छ । घरबाट बाहिर जाँदा जुत्ता हातमा बोकेर र आधा बाटोसम्म हाफ पाइन्ट लगाएर हिँड्ने गरेका यहाँका स्थानीयको दैनिकी नै फेरिएको छ ।

बाटोमा ग्राभेल हुन नसक्दा बाटोकै कारण नियमित पठनपाठनबाट आफूहरू वञ्चित हुने गरेको भएपनि अहिले भने आफूहरू नियमित स्कुल गहिरहेको बसन्तले बताए ।

खेती किसानीको समय र बर्खामा बाटोका कारण पठनपाठनमा बाधा पुग्ने भए पनि अहिले भने त्यो समस्या समस्या समाधान भएको उनले बताए । ‘पहिले त हिँड्न नै समस्या हुन्थ्यो । तर, बाटोमा ग्राभेल भइसकेपछि २ पांग्रे गाडी घरमै पुग्छन् । निकै सहज भएको छ ।’ बसन्तले भने ।

अहिले बाहिरबाट यहाँ आउने र छिमेकी गाउँका स्थानीयले समेत बाटोको प्रशंसा गरिरहेका स्थानीय बताउँछन् । विगतमा पानी परेको समयमा यहाँको माटो चिप्लो हुुने भएका कारण आवतजावतका क्रममा लडेर घाइते हुने जस्ता समस्या भए पनि अहिले त्यो समस्या समाधान भएको अर्र्का स्थानीय दिपक साउँदले बताए ।

‘बुबाबाजेको पालादेखि बाटो हिलाम्मे थियो । धेरै वर्ष हामीहरूले पनि दुःख भोग्याैँ’, उनले भने, ‘अहिले जनप्रतिनिधि आएपछि हिलाम्मे बाटो ग्राभेल भयो । हाम्रो गाउँको बाटो देखेर अन्य गाउँका स्थानीयले पनि यस्तै बाटो बनाउन पाए हुन्थ्यो भन्छन् ।’

साउँद गाउँ जाने नमुना बाटो निर्माणका लागि अघिल्लो वर्ष वडाबाट ३ लाख ५० लाख र यस बर्ष डेढ लाख गरी हालसम्म साढे ५ लाख रूपैयाँ खर्च भएको अमरगढी नगरपालिका-३ का वडाध्यक्ष गोविन्द बोहराले जानकारी दिए । ‘हिलाम्मे बाटोका कारण स्थानीयमा पर्न गएको समस्यालाई मध्येनजर गर्दै बाटोको लागि बजेट विनियोजन गरेका थियौँ’ उनले भने, ‘अलि बजेट अभावमा निर्माण रोकिएको छ । ४०/५० हजार बजेट थपेर त्यो बाटो पूर्णरूपमा निर्माण गर्छौँ ।’

बाटो साउँद गाउँ जाने भए पनि जमिन अर्कोको भएको कारण सुरूको १ वर्ष जग्गा धनीसँग सहमति जुटाउनमै गएकोले निर्माणमा केही ढिलाई भएको वडाध्यक्ष बोहराले जानकारी दिए ।

प्रकाशित मिति: आइतबार, जेठ १८, २०७७ ११:००