हावाहुरी पीडितलाई प्रदेश ३ सरकारले १ करोड सहयोग गर्ने

A+ A A-

दुईदिन अगाडी आइतबार साँझ आएको हावाहुरीका कारण विपदमा परेको प्रदेश २ को बारा र पर्सा जिल्लाका प्रभावितहरुलाई प्रदेश ३ सरकारले १ करोड सहयोग गर्ने भएको छ ।

प्रदेश ३ सरकारले सो जिल्लाका प्रभावितलाई आवास निर्माणमा सहयोग गर्न एक करोड सहयोग गर्ने निर्णय गरेको हो । मंगलबार विहान बसेको मन्त्रिपरिषद बैठकले १ करोड सहयोग गर्ने निर्णय गरेको सरकारका प्रवक्ता समेत रहेका आर्थिक मामिला तथा योजना मन्त्री कैलाशप्रसाद ढुंगेलले बताए । प्रदेश ३ सरकारले उक्त रकम प्रदेश २ सरकारमार्फत सहयोग गर्नेछ । ‘प्रदेश २ सरकारको खातामा पैसा हालिदिने छौ’ आर्थिक मामिला तथा योजनामन्त्री ढुंगेलले भने ।

यसैगरी, प्रदेशसभा ३ ले बारा र पर्साका हावाहुरी प्रभावितलाई ३ दिन बराबरको तलब सहयोग गर्ने निर्णय गरेको पनि छ । आज नै बसेको कार्यव्यवस्था परामर्श समितिको बैठकले यस्तो निर्णय गरेको हो । कार्यव्यवस्था परामर्श समितिका १०९ सदस्यबाट ३ दिनको तलब सहयोग गर्ने निर्णय गरेको समितिका सदस्य रहेका कांग्रेस सचेतक छिरिङ दोर्जे लामाले जानकारी दिए । सभामुख सानुकुमार श्रेष्ठको अध्यक्षतामा बसेको बैठकको यो निर्णय मंगलबार दिउसो बस्ने प्रदेश सभामा जानकारी गराइने छ । कार्यव्यवस्था परामर्श समिति सदस्यहरुको तलबबाट सीधै काटेर रकम सहयोग गरिने तयारी गरेको जनाएको छ।

सोमबारको प्रदेश सभा बैठकको विशेष समयमा बोल्दै अधिकांश सदस्यले घटनाप्रति दुख व्यक्त गरेका छन् । प्रदेश सभा र सरकारले सहयोग गर्नुपर्ने धारणा उनीहरुको धारणा छ । यसअघि प्रदेश ३ का मुख्यमन्त्री डोरमणि पौडेलले सोमबार नै बारा जिल्लामा पुगेका प्रभावितहरुलाई आफ्नो प्रदेशले सक्दो सहयोग गर्ने वचन दिएका थिए ।

‘मैले तत्कालको राहत तथा पीडित जनताको पुनस्र्थापनाका लागि दिर्घकालिन व्यबस्थापनमा पनि सहयोग गर्ने प्रतिवद्धता हिजै दिएर आएको थिए’ मुख्यमन्त्री पौडेलले भने ‘साहै्र दर्दनाक अवस्था छ, अन्य प्रदेशले पनि सहयोग गरेर जनजीवनमाथि उठाउनु जरुरी छ ।’