जटही नाकामा सयौँ व्यक्ति, कोरोना संक्रमणको उच्च जोखिम [फोटोफिचर]

A+ A A-

धनुषाको जटही नाका बन्द गरेपछि लकडाउनले अलपत्र परेका नागरिकको अवस्था झन् कष्टपूर्ण बनेको छ । सीमा अलपत्र व्यक्तिले सामाजिक दूरीको कुनै पालना गरेका देखिँदैनन् । सयाैँ व्यक्ति त्यतिकै सीमा क्षेत्रमा बसिरहेका छन् ।

नेपालका विभिन्न स्थानमा काम गर्ने भारतीय नागरिक आफ्नो देश फर्कंन चाहन्छन् । भारतमा काम गर्नेहरू नेपाल आउन चाहन्छन् । धनुषाको जटही नाकामा जाने आउनेलाई दुबै तर्फका सुरक्षाकर्मीले केही दिनदेखि रोकिरहेका छन् । जटही सीमाको अवस्था अहिले तनावपूर्ण रहेको छ ।

नेपाल प्रहरीभन्दा भारतीय एसएसबीले आफूहरूलाई समस्या दिइरहेको भारतीय नागरिक मोहम्मद हसनले बताए । काठमाडौंमा काम गर्ने हसन ३ दिनदेखि जटहीमा बसेका छन् । हसनको घर भारतको दरभंगा हो । उनीसँगै काठमाडौंबाट २० जना दरभंगा जानका लागि सीमामा बसिरहेका छन् । विहारको विभिन्न स्थान जानका लागि ८ सय जना भन्दा बढी छन् । पश्चिम बंगाल, झारखण्ड जानेहरू पनि छन् ।

सीमामा अलपत्र नागरिकमा महिला र बालबालिकाको संख्या पनि धेरै छ । भारतीय एसएसबीले सीमामा कुटपिट पनि गरेको अलपत्र व्यक्तिहरूले बताएका छन् । दुबैतर्फ भिड बढी रहेको छ । तर, उनीहरूको उद्धारका लागि कुनै निकायले गम्भीरता देखाइरहेका छैनन् । तत्काल समस्या समाधान गरेनन् भने स्थिति अझै जटिल हुने नेपाल–भारत सीमा संवाद समूहका संयोजक एवं राजपाका महासचिव राजीब झाले वताए । यो समस्या तत्काल समाधान गर्न धनुषाका प्रमुख जिल्ला अधिकारीसँग भेटेरै नेपाल–भारत खुला सीमा संवाद समूहले माग गरेको छ ।

सीमामा त्यतिकै राख्दा १ नेपाली नागरिकको ३ दिनअघि मृत्यु भएको थियो । भोकले मृत्यु भएपछि जटहीका निमार्ण व्यवसायी एवं समाजसेवी राजु चौधरीले ३ दिनदेखि सीमामै निःशुल्क भोजनको व्यवस्था गरेको छ । उनले बिहान र राती २ पटक १/१ हजार व्यक्तिलाई खुवाइरहेका छन् । खाना खुवाउने कार्यमा सशस्त्र प्रहरीले पनि सहयोग हरेको छ ।