डडेल्धुरा र बैतडीका २ सय ३५ जनाको पीसीआर रिपोर्ट नेगेटिभ

A+ A A-

डडेल्धुरा र बैतडीमा कोरोना संक्रमित युवकको सम्पर्कमा आएका २ सय ३५ जनाको पीसीआर रिपोर्ट नेगेटिभ आएको छ । धनगढी प्रयोगशालामा गरिएको परीक्षणमा उनीहरू सबैको रिपोर्ट नेगेटिभ आएको हो ।

डडेल्धुरामा पहिलो पटक गत शुक्रबार सरकारी कर्मचारीमा कोरोना संक्रमण देखिएपछि संक्रमित युवकको सम्पर्कमा आएका ३६ जना र अन्य १ सय जना क्वारेन्टाइनमा बसेकाहरूको स्वाब संकलन गरी गरिएको थियो । जिल्ला परशुराम नगरपालिका-१० का २८ वर्षीय ती युवकमा शुक्रबार कोरोनाको संक्रमण रहेको पुष्टि भएको थियो ।

उनको सम्पर्कमा आएका १५ जना परिवारका सदस्य, ५ जना पत्रकार, १० जना चिकित्सक तथा स्वास्थ्यकर्मी र होटल सञ्चालकसहित ६ जनाको शनिबार थ्रोट स्वाब संकलन गरी कोरोना परीक्षण गर्दा रिपोर्ट नगेटिभ आएको स्वास्थ्य कार्यालयका भेक्टर कन्ट्रोलर सुपरभाइजर तथा कोभिड-१९ डडेल्धुराका सम्पर्क व्यक्ति हरिप्रसाद भट्टले जानकारी दिए ।

भागेश्वर गाउँपालिका बगरकोटमा अजयमेरु र भागेश्वर गाउँपालिकाको क्वारेन्टाइनमा बसिरहेको ६४ जना, अमरगढी र नवदुर्गाको क्वारेन्टाइनमा बसेका ३० जनाको पनि कोरोना परीक्षण रिपोर्ट नेगेटिभ आएको उनले बताएका छन् ।

यस्तै, बैतडीमा कोरोना संक्रमितको सम्पर्कमा रहेका र आरडीटी पोजिटिभ देखिएका ८ प्रहरीसहित सबै ९९ जनाको पीसीआर रिपोर्ट नेगेटिभ आएको छ ।

पीसीआर रिपोर्ट नेगेभिट आउनेमा जिल्ला न्यायाधीशसहित अदालतका कर्मचारी, प्रमुख जिल्ला अधिकारीसहित प्रशासनका कर्मचारी, जिल्ला प्रहरी कार्यालयका प्रहरी नायब उपरीक्षकसहित प्रहरी, जिल्ला अस्पतालका चिकित्सकसहित स्वास्थ्यकर्मी, संक्रमितका आफन्त र संक्रमितसँगै थुनामा रहेका रहेका छन् ।

जिल्ला प्रहरी कार्यालयको हिरासतमा रहेका रहेका शिवनाथ गाउँपालिका-२ का २२ बर्षीय युवकमा ९ जेठमा कोरोना संक्रमणको पुष्टि भएको थियो । हिरासतमा रहेका ती युवकमा कोरोना पुष्टि भएससँगै कन्ट्राक्ट ट्रेसिङ गरि प्रत्यक्ष सम्पर्कमा रहेकाको स्वाब संकलन गरेर पीसीआर परीक्षण गरिएको स्वास्थ्य कार्यालय बैतडीका प्रमुख योगेशप्रसाद भट्टले जानकारी दिए ।

कर्तव्य ज्यान मुद्धामा १५ वैशाखदेखि प्रहरी हिरासतमा रहेका ती युवक त्यसअघि भारतबाट फर्किएका थिए । हिरासतमा रहेका ती युवकमा संक्रमण पुष्टि भएपछि प्रहरी कार्यालय पनि सिल गरिएको थियो ।

प्रकाशित मिति: शनिबार, जेठ १७, २०७७ ०८:४३