निर्मला मृत्यु प्रकरणः दोषीलाई कारवाही गर्न महिला संघको माग

A+ A A-

नेपाल महिला संघ डडेल्धुराले रातो गुँरास रिसोर्टमा मृत फेला परेकी युवतीको घटनाबारे सत्यतथ्य छानबिन गर्न माग गरेको छ । रिसोर्टमा अमरगढी नगरपालिका-७ की २१ वर्षीया युवती निर्मला बोहराको रहस्यमय मृत्यु भएको भन्दै बिहीबार महिला संघले दोषीलाई कारवाही गर्न जिल्ला प्रशासन कार्यालयमा ज्ञापनपत्र बुझाएको हो ।

महिला संघकी अध्यक्ष कमला बिष्टद्वारा हस्ताक्षिरित ज्ञापनपत्रमा घटनाबारे आफूहरूको ध्यानाकर्षण भएको र लकडाउनका बेला यस्ता घटना हुने महिलामाथि हिंसा भएको उल्लेख गरिएको छ । ‘डडेल्धराको सदरमुकाम अवस्थित रातो गुँरास रिसोर्टमा अमरगढी नगरपालिका–७ अन्दाजी २१ वर्षकी निर्मला बोहराको रहस्यमय मृत्युको घटनाप्रति नेपाल महिला संघ डडेल्धुराको गम्भीर ध्यानाकर्षण भएको छ’ ज्ञापनपत्रमा भनिएको छ, ‘उक्त संकास्पद घटनाबाट एउटा महिलाको निर्मम भएर हिँडडुल र कारोवार गर्ने व्यक्तिगत स्वतन्त्रता माथि त गम्भीर प्रश्न उठाएको छ नै साथै वर्तमान आधुनिक समाजमा पनि महिला हिंसाका घटना न्यूनीकरण हुन नसकेको सामाजिक चुनौतीलाई पनि उजागर गराएको छ ।’

त्यस्तै, कोरोना रोकथाम तथा नियन्त्रणका लागि देशभर सरकारले लकडाउन घोषणा गरेको परिस्थितिमा लकडाउन उल्लघंन हुनु र जिल्लाका विभिन्न स्थानमा मदिराजन्य पदार्थको बिक्रीवितरण एवं सेवनका घटनाहरू बढेका भन्दै महिला संघले ज्ञापनपत्रमा लेखेको छ, ‘यो बिषम परिस्थतिमा राज्यले घोषणा गरेको लकडाउनलाई पूर्ण पालना गराउन र अनाधिकृत रुपमा बढ्दै गएको मदिरा समस्याका सम्बन्धमा पूर्ण समवेदनशील हुनु हामी जिल्ला प्रशासन कार्यालय डडेल्धुराको ध्यानानकर्षण गराउन चहान्छौँ ।’

साथै, संघले निर्मला मृत्यु प्रकरणमा घटनाको सत्यतथ्य छानबिन गरेर दोषीलार्ई यथाशीघ्र कानुनी दायरामा ल्याउन माग गरेको छ । ‘घटनाको सत्यतथ्य छानबिन गरि चाँडो कानुनको कठघेरामा उभ्याई महिला अधिकारको प्रत्याभूति गराउन र समाजमा महिला हिंसाका घटना न्यूनीकरण गर्नका लागि अविलम्ब अग्रसरता लिएर आम जनमानसलाई आश्वस्त तुल्याउन हामी प्रशासन समक्ष जोडदार माग गर्दछौँ’ ज्ञापनपत्रमा उल्लेख छ ।

बुधबार विहान अमरगढी-७ मा रहेको रातो गुराँस रिसोर्टमा बोहरा मृत अवस्था फेला परेकी थिइन् । डडेल्धुराका प्रहरी नायव उपरीक्षक दधिराम न्यौपानेले बोहराको हत्या वा आत्महत्या हो भन्नेबारे अनुसन्धान जारी रहेको बताएका छन् । उनका अनुसार शवको पोष्टमार्टम रिपोर्टपछि मात्रै घटनाको रहस्य खुल्ने छ ।