पश्चिमी नाका गड्डाचौकीमा फहराइयो नेपालको झण्डा

A+ A A-

नेपाल प्रवेशको पश्चिमी सीमा नाका गड्डाचौकीमा राष्ट्रिय झण्डा फहराइएको छ । १३ औँ गणतन्त्र दिवसको अवसरमा बिहीबार नेपालका सबै ७७ जिल्लाको प्रतिनिधित्व हुने गरी पश्चिमी नाकामा झण्डोत्तोलन गरिएको छ ।

नेपाल र नेपालीको पहिचानका लागि भीमदत्त नगरपालिकाले पश्चिमी सीमा नाकामा ७७ फिटको स्तम्भमा नेपाली झण्डा फहराएको हो । भीमदत्तका नगर नगर प्रमुख सुरेन्द्र विष्ट, नगर उप प्रमुख सुशिला चन्द सिह, र प्रमुख जिल्ला अधिकारी नूरहरि प्रसाद खतिवडा झण्डोत्तोलन गरे ।

कार्यक्रमका प्रजिअ खतिवडाले पश्चिमी नाकामा राखिएको झण्डाले राष्ट्रको प्रतिनिधित्व गरिएको बताए । ‘आज गणतन्त्र दिवसको दिन फहराएको यो राष्ट्रिय झण्डाले सिंगो राष्ट्रको प्रतिनिधित्तव गर्छ’ उनले भने, ‘यो झण्डा हाम्रो मान, सम्मान र प्रतिष्ठा र गौरव हो ।’

विदेशिएकाले देशको माया राम्ररी अनुभूति गर्न सक्ने उल्लेख गर्दै प्रमुख जिल्ला अधिकारी खतिवडाले विदेशबाट घर फर्किएकाहरूले झण्डाको फेदमा बसेर थकाई मेट्न सक्ने बताए ।

कार्यक्रममा भीमदत्त नगरपालिकाका नगर प्रमुख सुरेन्द्र विष्टले पश्चिमी नाकामा फहराएको झण्डाबाट नेपाल र नेपालीको पहिचानलाई विश्वभर थप बलियो बनाउन सहयोग पुग्ने बताए ।

‘माटो जन्मभूमि बिस्र्यौ भने मुलुक बन्न सक्दैन, त्यसका लागि सबै हामीमा इच्छा र प्रतिवद्धता चाहिन्छ’उनले भने, ‘त्यसैले यो झण्डाले विश्वभर एकताको सन्देश दिन्छ, राष्ट्रयताको सन्देश दिन्छ, राष्ट्रियता र पहिचानलाई सृदृढ बनाउन थप सहयोग पुग्छ ।’

कोरोना महामारीका कारण झण्डोत्तोलन कार्यक्रमलाई समान्य रुपमा गरिएको उल्लेख गर्दै नगर प्रमुख विष्टले यो कार्यबाट देशभर भावानात्मक एकताको सन्देश प्रवाह भएको बताए ।

भीमदत्त नगरपालिकाका नगर उपप्रमुख सुशिला चन्द सिंहले कार्यक्रम स्वागत मन्तव्य राख्दै पश्चिमी नाकामा राष्ट्रिय झण्डा फहरिन सबैका लागि गौरव भएको बताइन् ।

‘आज ऐतिहासिक दिनमा झण्डा फहराइएको छ, झण्डा फहराउन सान र गौरबको कुरा हो’ नगर उपप्रमुख चन्दले भनिन् । कार्यक्रममा जिल्ला प्रहरी कार्यालयका प्रहरी उपरीक्षक मुकुन्द मरासिनी, सशस्त्र प्रहरी उपरीक्षक वीरबहादुर शाहु, सहायक प्रमुख जिल्ला अधिकारी गोकर्ण उपाध्यय, भीनपा १८ का अध्यक्ष एवम् नगर प्रवक्ता हिमाल बहादुर चन्द, कार्यपालिका सदस्य गीता ओली, भीनपाका प्रमु्ख प्रशासकीय अधिकृत पुस्कर प्रसाद भट्ट लगायत जनप्रतिनिधि, सुरक्षाकर्मी, स्थानीय सहभागी भएका छन् ।