कोरोना जितेर घर फर्किए पत्रकार रमण

A+ A A-

कोरोना संक्रमण भएपछि प्रादेशिक अस्पताल जनकपुरधामको आइसोलेसनमा उपचार गराइ रहेका पत्रकार वीरेन्द्र रमण आज डिस्चार्ज भएका छन् ।

रमणलाई नेपाल पत्रकार महासंघ धनुषाका अध्यक्ष अनिल मिश्र र महासंघका प्रदेश सचिव किरण कर्णले आइसोलेसन वार्डमा पुगेर माला र अबिर लगाएर स्वागत गरेको थए ।

प्रदेश २ का ४ जना पत्रकारलाई कोरोना संक्रमण भएको थियो । रमणसहित ३ जनाको रिपोट निगेटिभ आएपछि घर फर्किसकेका छन् भने १ जना उपचार गराई रहेका छन् । यसअघि नारायणी अस्पतालबाट नेपाल पत्रकार महासंघ पर्साका अध्यक्ष श्याम बन्जारा र अनलाइन खबरका पर्सा समाचारदाता सुरेश बिडारी घर फर्किसकेका छन् ।

आइसोलेसन वार्डको अवस्था एकदमै खराब रहेको डिस्चार्जपछि पत्रकार रमणले बताए । प्रदेश सरकारसँग आबद्ध रहेको प्रादेशिक अस्पताल जनकपुरधामको खाना र नास्ताको कडा आलोचना हुन थालेपछि सानो पाइला नामक गैरसरकारी संस्थाले निःशुल्क खाना र नास्ता खुवाउने कार्य सुरू गरेको छ ।

प्रदेश २ मा हालसम्म ४ सय संक्रमित रहेका छन् । जसमध्ये ९३ जना उपचार गराई घर फर्किसकेको छ भने प्रदेशमा १ जनाको मृत्यु भएको छ । प्रदेश सरकार, स्थानीय तह, स्थानीयको सहकार्य र समन्वयमा हालसम्म १६ हजार ९ सय १४ बेड क्षमताको ३ सय १ वटा क्वारेन्टाइन, ८ वटै जिल्लामा गरी ६ सय ४५ बेड क्षमताको आइसोलेसन कक्षको निर्माण गरी उपचार गर्दै आएको छ ।