शिक्षामा १ खर्ब ७१ अर्ब बजेट, के–के कार्यक्रम परे ?

A+ A A-

सरकारले आर्थिक वर्ष ०७७/०७८ का लागि शिक्षा, विज्ञान तथा प्रविधि मन्त्रालयलाई १ खर्ब ७१ अर्ब ७१ करोड बजेट छुट्याएको छ । सरकारले गत आर्थिक वर्षको भन्दा बढी बजेट छुट्याएको हो । गत आर्थिक वर्षमा १ खर्ब ६३ अर्ब बजेट छुट्याइएको थियो ।

कोरोना महामारीका कारण शैक्षिक क्षेत्र प्रभावित भएपछि भर्चुल शिक्षालाई जोड दिँदै सरकारले बजेट छुट्याएको छ ।

सरकारले मदन भण्डारी विज्ञान तथा प्रविधि विश्वविद्यालयको पूर्वाधार निर्माण र शैक्षिक कार्यक्रम सुरु गर्न १ अर्ब २५ करोड छुट्याएको छ ।

त्यस्तै निःशुल्क पाठ्यपुस्तक उपलब्ध गराउन २ अर्ब ७६ करोड बजेट विनियोजन गरेको छ । सरकारले विश्व विद्यालय अनुदान अयोगमार्फत दिइने अनुदानका लागि १७ अर्ब ४३ करोड छुट्याएको छ । सरकारले सेतो छडी र ब्रेललिपीको पाठ्यक्रम निशुल्क उपलब्ध गराउने घोषणा गरेको छ ।

प्राविधिक र व्यवसायिक शिक्षा तथा तालिम केन्द्रको सुदृढिकरणको लागि चार अर्ब ३४ करोड विनियोजन गरिएको छ ।
कृषि क्याम्पसमा स्नातक तहमा अध्ययनरत विद्यार्थीलाई इन्टर्नसीप गराउने तथा विभिन्न प्राविधिक विद्यालयमा अध्ययनरत विद्यार्थीलाई आयआर्जन गर्ने व्यवस्था मिलाउने बजेटमा उल्लेख गरिएको छ ।

पर्यटन विश्वविद्यालय स्थापनाका लागि सम्भाव्यता अध्ययन गरिने भएको छ । यो नयाँ कार्यक्रम हो । नेपाल पर्यटन क्षेत्रको हब भएकाले सरकारले पर्यटन विश्वविद्यालयमा जोड दिएको हो । माध्यमिक तहभन्दा माथिको पाठ्यक्रममा पर्यटन विषय समावेश गरिने भएको छ । त्यस्तै आगामी वर्ष साक्षर नेपाल घोषणा गरिने भएको छ ।

राष्ट्रपति शैक्षिक सुधार कार्यक्रममा ६ अर्ब बजेट विनियोजन गरिएको छ । आगामी आर्थिक वर्षमा एक हजार ८०० विद्यालय भवन, ३८ आंगिक क्याम्पस पुन निर्माणको लागि रकम व्यवस्था गरिने बजेटमा उल्लेख गरिएको छ ।

छात्रवृत्ति कार्यक्रमलाई एकीकृत रुपमा सञ्चालन गरि विपन्न र अपाङ्ग, सहिदका सन्तान र जेहन्दार विद्यार्थीलाई समेत गरि मुलुकभरका २६ लाख छात्रारछात्रका लागि २ अर्ब ७० करोड बिनियोजन गरिएको छ । १ हजार ८ सय स्कुल स्थापना गर्न रकमको व्यवस्था गरिने भएको छ । माध्यमिक तहका निजी स्कुलले एक सामुदायिक स्कुलको जिम्मेवारी लिनुपर्ने भएको छ । स्वयमसेवक शिक्षक परिचाल गर्न बजेट विनियोजन गरिने भएको छ ।

आगामी वर्ष कैलालीको गेटा मेडिकल कलेज सञ्चालनमा ल्याई सिकलसेल एनेमियाको अनुसन्धान गर्न र बर्दिबास(सुर्खेत मेडिकल कलेजको पूर्वाधार विकास गर्न १ अर्ब १७ करोड विनियोजन गरिएको छ । अर्थमन्त्री युवराज खतिवडाले बिहीबार संसदमा बजेट प्रस्तुत गरेका हुन् ।

प्रकाशित मिति: बिहीबार, जेठ १५, २०७७ १८:३५