संसदीय समितिमार्फत रुकुम हत्याकाण्ड छानविन गर्न सांसद बराइलीको माग

A+ A A-

नेपाल कम्युनिस्ट पार्टी (नेकपा) की सांसद उमिता बराइलीले रुकुम हत्याकाण्डको संसदिय समितिमार्फत छानविन गर्न माग गरेकी छन् । बिहीबार प्रदेश-१ प्रदेशसभा बैठकको शून्य समयमा बोल्दै सांसद बराइलीले सो घटनाको संददीय समितिमार्फत छानविन गर्न संघीय सरकारसँग माग गरेकी हुन् ।

उनले मुलुकमा गणतन्त्र आइसके पनि दलित समुदायले न्यायको अनुभूति गर्न नपाएको भन्दै सरकारको ध्यानाकर्षणसमेत गराइन् । सांसद बराइलीले एक नम्बर प्रदेशमा पनि दलित समुदायमाथि अन्तरजातीय विवाहका नाममा जेल हाल्ने, बहिष्कार गर्ने र यातना दिने कार्य भइरहेकाले सरकारलाई गम्भीर बन्न आग्रह गरिन् । उनले समाजमा कानुनअनुसार उमेर नपुगे पनि विवाह गर्ने गराउने काम भइहरेको बताउँदै जात नमिलेकै आधारमा उमेरहदको बहाना बनाएर जेल हाल्ने र यातना दिनेजस्ता काम भइरहेको आरोप लगाइन् ।

सांसद बराइलीले जातकै कारण प्रेमी र उनका साथीहरूलाई सांघातिक आक्रमण गरेर हत्या गर्नु अति नै क्रुर अमानवीय घटना भन्दै दोषीलाई कडा कारबाहीको मागसमेत गरिन् ।

समाजवादी पार्टीका सांसद जयराम यादवले गणतन्त्र आइसक्दा पनि दलित समुदायमाथि जातीय विभेद भइरहनु अमानवीय कार्य भएको बताए । उनले पश्चिम रुकुममा भएको आपराधिक घटनासँगै सबै खाले जातीय विभेदको अन्त्य गराउन सरकारसँग माग गरे ।

सांसद लीला सुब्बाले गणतन्त्रमा अझै पनि दलित र महिलाहरूमाथि हिंसा भइरहेको बताउँदै त्यसको अन्त्य गराउनुपर्नेमा जोड दिइन् । कांग्रेस संसदीय दलका उपनेता हिमाल कार्की र सचेतक सूयर्माराज राईले रुकुमको आपराधिक घटना अत्यन्तै क्रुर र अमानविय भएकाले दोषीलाई कडाभन्दा कडा कारबाही हुनुपर्ने माग गरे ।

रुकुमको चौरजहारीकी सुष्मा ठकुरी र जाजरकोटका नवराज विश्वकर्माले अन्तरजातीय विवाह गर्न लागेको थाहा पाएर १० जेठमा केटी पक्षले प्रेमी नवराज र उनका साथीलाई कुटपिट गरेर हत्या गरेका थिए । नवराजसहित ४ जनाको शव भेरी नदीमा मृत अवस्थामा फेला परिसकेको छ । अझै २ जना बेपत्ता रहेकाले खोजी कार्य जारी रहेको जनाइएको छ ।

प्रकाशित मिति: बिहीबार, जेठ १५, २०७७ १५:३६