आर्थिक प्याकेजको माग गर्दै मुख्यमन्त्री राउतले लेखे प्रधानमन्त्रीलाई पत्र

आर्थिक प्याकेजको माग गर्दै मुख्यमन्त्री राउतले लेखे प्रधानमन्त्रीलाई पत्र

फाइल तस्वीर

A+ A A-

प्रदेश २ का मुख्यमन्त्री लालबाबु राउतले विशेष आर्थिक प्याकेज उपलब्ध गराउन संघीय सरकारसँग माग गरेका छन् ।

प्रधानमन्त्री केपी शर्मा ओलीलाई पत्र लेख्दै मुख्यमन्त्री राउतले कोरोना विरुद्धको लडाइका लागि प्रदेश २ लाई विशेष प्याकेज उपलब्ध गराउन माग गरेका हुन् ।

कारोना संक्रमण नियन्त्रणका लागि प्रदेश सरकारले प्रभावकारी ढंगले काम गर्न नसकेको भनेर आलोचना भइरहेका उनले संघीय सरकारसँग प्याकेज घोषणाको माग गरेका हुन् ।

आइसोलेसन वार्डमा राम्रो खानासमेत उपलब्ध नगराएको भनेर अहिले प्रदेश सरकारको कडा आलोचना भइरहेको छ ।

मुख्यमन्त्री राउतले भारतसँगको खुला सीमाना तथा त्यहाँ रोजगारी गर्दै आएका नागरिकको स्वदेश फिर्ताले प्रदेशमा कोरोनाको संक्रमण बढ्ने खतरा रहेको अवस्थामा हालको व्यवस्थापन अपुग देखिएकोले थप व्यवस्थापनका लागि विशेष प्याकेज उपलब्ध गराउन माग गरेको बताएका छन् ।

उनले समस्यामा परेका नागरिकलाई प्रदेश सरकारले स्थानीय तहको समन्वयमा २ चरणको राहत वितरण गरे पनि लकडाउन थपिँदै जाँदा प्रदेशको भौगोलिक अवस्था, जनसंख्या, मानव विकास सूचकाङ्क र सामाजिक विकासको अवस्था समेतका आधारमा प्रदेश सरकारले मात्र खाद्यान्न सहितको राहत उपलब्ध गराउन चुनौतीपूर्ण रहेकोले संघीय सरकारबाट ठोस कार्यक्रम ल्याउन आग्रह गरेको बताए ।

मुख्यमन्त्री राउतले कोरोना परीक्षणका लागि प्रदेश सरकारले ३ स्थानमा पीसीआर मेसिन सञ्चालन गरे पनि भीटीएम किटको अभावमा अपेक्षित परीक्षण गर्न नसकिएकोले संघ सरकारलाई छिटाे यी उपकरण र दक्ष जनशक्तिको माग गरेका छन् ।

यसका साथै उनले वैदेशिक रोजगारीमा रहेका प्रदेशका करिब १० लाख युवा स्वदेश फिर्ता हुन सक्ने सम्भावनालाई दृष्टिगत गर्दै प्रदेशमा युवा रोजगार कार्यक्रम, कृषि केन्द्रित विशेष योजनाका लागिसमेत विशेष आर्थिक प्याकेज उपलब्ध गराउन माग गरेका छन् ।