डडेल्धुरामा निर्मला मृत्यु प्रकरणः यस्तो छ घटनाको नालीबेली

A+ A A-

डडेल्धुरा सदरमुकाम नजिकै रहेको रातो गुरास रिसोर्टमा १ युवतीको शंकास्पद मृत्यु भएको छ । प्रहरी जवान पदमा कार्यरत युवाकसँगै होटलमा बास बसेकी उनको शंकास्पद मृत्यु भएपछि आफन्तजनले उनको हत्या भएको बताएका छन् ।

डडेल्धुराको अमरगढी नगरपालिका-७ सल्लागाँउ घर घएकी अन्दाजी २१ वर्षीया निर्मला बोहरा बुधबार बिहान रिसोर्टमा मृत अवस्थामा फेला परेकी हुन् ।

उनी होटेलको बाथरुममा कपडा झुण्ड्याउने मसिनो ह्याङ्गरमा झुण्डिएको अवस्थामा फेला परेको प्रहरीले जनाएको छ । अहिले प्रहरीले घटनाको अनुसन्धान गरिरहेको छ ।

कसरी भयो घटना ?

बोहरा बुधबार विहान ७ बजेतिर रातो गुँरास रिसोर्टमा आइन् । र, उनले आफ्नो नाममा रूम बुक गरिन् । रिसोर्टमा आएर ति युवतीले मलाई फ्रेस हुनु छ मेरो मान्छे आइरहेकोले चमडा जानुपर्ने भएकाले कोठा चाहियो भनिन् ।

बोहरा काफल खानको लागि दिनहुँ जसो त्यसक्षेत्रमा आइरहने भएकाले रिसोर्टमा उनको चिनजान थियो । चिनजान भएकै कारणले आधा १ घण्टाका लागि कोठा मागेकोले उनलाई रिसोर्टले कोठा दियो ।

बुधबार विहान करिब ७ बजेतिर ती युवतीका नाममा होटलमा कोठा बुक गरेपछि युवती होटलको कोठामा पुगेकी थिइन् । उनले होटेल बुक गरेको १५ मिनेटपछि १ युवक सरकारी बाइक ल्याएर रिसोर्टमा आए ।

युवक रिसोर्टमा आएपछि रिसोर्टका म्यानेजर विष्णु भट्टले बोहरालाई को हो ? भनेर सोध्दा ‘मेरो ब्वाइफ्रेन्ड हो म उसँग आज बिहे गर्छु’ भनेर जवाफ दिइन् । बिहान १०/११ जति बजिसकेको थियो । खाना खाने समय भएकाले रिसोर्टका म्यानेजर भट्टले १ जना होटेलमा काम गर्ने मान्छेलाई पठाए ।

भित्र कुराकानी जस्तो आवाज आइरहेको थियो । भित्रबाट केटा मान्छेले कोठा खोलेन । भित्र केटाकेटीको छलफल भइरहेकोले बुक गरेको कोठामा जानु उपयुक्त नभएकोले नगएको रिसोर्टका म्यानेजर भट्टले बताए ।

करिव १२ बजेतिर खानाको अडर गर्न जाँदा कोठा खुल्ला रहेको र बाथरुममा युवती मृत अबस्थामा फेला परेकी थिइन् । उनी होटेलको बाथरूममा पानी तताउन प्रयोग हुने मल्टीप्लगको तारले बाथरुममा लुगा राख्ने ह्याङगरमा झुण्डिएको अबस्थामा फेला परेकी थिइन् ।

रिसोर्टका कर्मचारीले उनलाई मृत देखेपछि प्रहरीलाई खबर गरेका थिए । मृतक युवतीका आफन्तहरूका अनुसार ती युवती घरबाट आफ्ना सबै लुगा लिएर मंगलबार नै निस्केकी थिइन् । ति युवकले युवतीको आमासँग पनि फोनमा कुराकानी गर्ने गरेको पनि पाइएको छ ।

स्थानीय भन्छन्, ‘आत्महत्या होइन् हत्या हो’

मृतक बोहराका आफन्तहरूले भने बोहराले आत्महत्या नगरेको भएर उनको हत्या भएको आरोप लगाएका छन् । मृतक युवतीका आफन्त खडक बोहराले घटनाको प्रकृति हेर्दा आफै आत्महत्या गरेको नभएर हत्या गरेको जस्तो देखिएको बताए ।

जिल्लाको अजयमेरुस्थित प्रहरी चौकीमा कार्यरत प्रहरी जवान रामदिन चौधरी मंगलबार मृतक बोहरालाई फोन गरेर बेलुका बोलाएको आफन्त खडकले बताए । रिसोर्टमा बुधबार विहान आएको भए पनि निर्मला मंगलबार साँझ नै घरबाट चौधरीसँग भागेको उनको भनाइ छ ।

पीडितले ति प्रहरी जवान चौधरीको नाममा मुद्वा दर्ता गर्ने बताएका छन् । बुधबार दिउँसो मृतक बोहराका आफन्तहरूले घटनाको सत्यतथ्य छानविन हुनुपर्ने भन्दै रिसोर्ट घेराउ समेत गरेका थिए ।

लकडाउनका कारण अहीले होटेलहरू बन्द रहेका समयमा पनि रिसोर्ट खुला रहनुले रिसोर्टले लकडाउन उल्लंघन गरेको स्थानीयको भनाइ छ । लकडाउनको मौका छोपेर रिसोर्टमा जुवातास खेलाउने गरिएको समेत स्थानीयको आरोप छ । तर, रिसोर्टका म्यानेजर भट्टले भने आरोप झुटो भएको बताए । ‘रिसोर्ट बन्द थियो। पहराका रुपमा २/४ जना स्टापहरु मात्र रिसोर्टमा बसेका थिए । जुवातास खेलाउने त कुरै भएन’ उनले भने ।

प्रहरी जवान चौधरी प्रहरीको नियन्त्रणमा

मृतक युवतीको हत्यामा संलग्न भएको आशंका गरिएका प्रहरी जवान रामदिन चौधरीलाई प्रहरीले नियन्त्रणमा लिएको छ । मृतक युवतीसँगै रिसोर्टमा बसेका प्रहरी जवानलाई नियन्त्रणमा लिइएको प्रहरी स्रोतले जनाएको छ ।

प्रहरी जवानले सरकारी रातो रङको मोटोरसाइकल प्रयोग गरेका थिए । मृतकको शव अहिले डडेल्धुरा अस्पतालमा राखिएको प्रहरी निरीक्षक विरेन्द्र बोहराले जानकारी दिए । उनकासार मृतकको शव बिहीबार पोष्टमार्टम गरिने छ ।

डिएसपी भन्छन्, ‘घटनामा संलग्न कसैलाई छोडिन्न्’

डडेल्धुराका प्रहरी नाबय उपरीक्षक दधिराम न्यौपानेले मृतक युवतीको हत्यामा संलग्न जो कोही भए पनि कारवाही गरिने बताए । उनले घटनाको सुक्ष्म ढंगबाट अनुसन्धान भइरहेको जिकिर गरे ।

‘घटना स्थलबाट मुचुल्का उठाएर ल्याइसकेका छौँ । अब शव परिक्षणपछि मात्रै घटनाबारे रहस्य खुुल्ने छ’, उनले भने, ‘हत्या रहेछ भने चाहे जो सुकै होस दोषीलाई कारवाही हुन्छ । पद, पेसा, धर्म केही हेरिँदैन । कानुनअनुसार कारवाही हुन्छ ।’

प्रकाशित मिति: बुधबार, जेठ १४, २०७७ २२:१९