संविधान संशोधनको विषयमा कांग्रेसविरुद्ध सत्तादेखि विदेशी सञ्चार माध्यमको प्रोपोगान्डाः प्रवक्ता शर्मा

संविधान संशोधनको विषयमा कांग्रेसविरुद्ध सत्तादेखि विदेशी सञ्चार माध्यमको प्रोपोगान्डाः प्रवक्ता शर्मा

फाइल तस्वीर

A+ A A-

नेपाली कांग्रेसले संसदको कार्यसूचीबाट संशोधन प्रस्ताव हटाइएको बिषयमा कांग्रेसलाई जोड्नु निन्दनीय र आपत्तिजनक रहेको बताएको छ । पार्टी प्रवक्ता विश्वप्रकाश शर्माले आज साँझ विज्ञप्ति जारी गर्दै प्रतिनिधिसभाको आजको बैठकको कार्यसूचीबाट ‘नेपालको संविधानलाई संशोधन गर्न बनेको बिधेयक’ हटाइएको बिषय र त्यसमा कांग्रेसलाई जोडेर प्रेषित गरिएका समाचारप्रति पार्टीको ध्यान गम्भीरतापूर्वक आकृष्ट भएको बताएका छन् ।

‘प्रधानमन्त्रीले हिजो जेठ १३ गते बोलाउनु भएको सर्वदलीय बैठकमा नेपाली कांग्रेसले लिपुलेकमा भारतले बनाएको सडकप्रतिको आफ्नो प्रष्ट विरोध र नेपाल सरकारले हालै सार्वजनिक गरेको नेपालको नक्साप्रतिको आफ्नो समर्थन प्रष्ट भाषामा प्रस्तुत गरिसकेको छ’ विज्ञप्तिमा भनिनएको छ, ‘यस्तो पृष्ठभूमिमा संविधान संशोधनको प्रस्तावप्रति पार्टी केन्द्रीय समितिकै बैठकबाट संस्थागत निर्णय लिइने पूर्व घोषणा सर्वदलीय बैठकमा जानकारी गराइएको बिषयलाई ‘कांग्रेसले समय मागेको’भन्ने ढंगले उच्च तहबाट सम्प्रेषण गरिनु र आज संसदको कार्यसूचीबाट संशोधन विधेयक हटाएर त्यसको दोष नेपाली कांग्रेसलाई थोपर्न खोज्नु नियोजित, निन्दनीय र आपत्तिजनक छ ।’

कांग्रेसले संविधान संशोधन जस्तो बिषयमा राष्ट्रिय सहमतिको स्थिति बनाएर जाँदा त्यसले राष्ट्रिय एकतालाई अझ मजबुत बनाउन सकिने धारणामा पार्टी प्रष्ट रहेको समेत बताएको छ । कांग्रेसले सर्वदलीय बैठकमा प्रधानमन्त्री स्वयंले सर्वसम्मतिको अपेक्षा प्रस्तुत गरेको उल्लेख गरेको छ ।

‘तर संसदको प्रक्रियालाई अन्य कुनै कारणले मुल्तबीमा राख्ने र दोष अरुलाई लगाउने प्रवृत्ति गम्भीर र खेदजनक छ,’ कांग्रेसले विज्ञप्तिमा भनेको छ, ‘गोयबल्स शैलीका प्रोपोगान्डाहरू स्वदेशको सत्तादेखि विदेशको संचारमाध्यम जो कोहीबाट जुनरूपमा भएको होस् त्यसप्रति सजग रहँदै कुनै पनि खाले भ्रमबाट मुक्त रहन नेपाली कांग्रेस समस्त नेपाली दिदिबहिनी-दाजुभाइमा हार्दिक अपील गर्दछ ।’