रिसोर्टमा युवतीको मृत्यु, हत्या आशंकामा प्रहरी जवान नियन्त्रणमा

A+ A A-

डडेल्धुरा सदरमुकाम नजिकै रहेको रातो गुराँस रिसोर्टमा १ युवती मृत भेटिएकी छिन् । प्रहरी जवान पदमा कार्यरत युवकसँगै रिसोर्टमा बास बसेकी उनको शंकास्पद मृत्यु भएपछि आफन्तले उनको हत्या भएको बताएका छन् ।

डडेल्धुराको अमरगढी नगरपालिका-७ सल्लागाँउकी अन्दाजी २१ वर्षीया निर्मला बोहरा बुधबार बिहान रिर्सोटमा मृत अवस्थामा फेला परेकी थिइन् ।

उनी अमरगढी नगरपालिका-८ मा रहेको रातो गुराँस रिसोर्टको बाथरुममा कपडा झुण्ड्याउने मसिनो ह्याङ्गरमा झुण्डिएको अवस्थामा फेला परेको प्रहरीले जनाएको छ । डडेल्धुराका प्रहरी प्रमुख प्रहरी नायव उपरीक्षक दधिराम न्यौपानेले बिहान रिसोर्टबाट जानकारी पाएपछि प्रहरी घटनास्थलमा पुगेको र घटनाको अनुसन्धान भइरहेको बताए ।

आफन्ताले हत्या भएको बताए पनि डीएसपी न्यौपानेले बोहरोको हत्या वा आत्महत्या हो भन्नेबारे अनुसन्धान जारी रहेको बताए । उनका अनुसार युवतीको शरीरमा बाहिरी पनि चोट देखिएको छ । शवलाई पोष्टमार्टम गर्नका लागि डडेल्धुरा अस्पतालमा राखिएको छ ।

जिल्लाको अजयमेरूत प्रहरी चौकीमा कार्यरत प्रहरी जवान रामदिन चौधरीसँगै रिसोर्टमा बास बसेकी युवतीको शंकास्पद मृत्यु भएपछि डडेल्धुरा तनावग्रस्त बनेको छ ।

बुधबार बिहान करिब ७ बजेतिर ती युवतीका नाममा होटलमा कोठा बुक गरेपछि युवती रिसोर्टको कोठामा पुगेको र युवती रिसोर्टमा पुगेको १५ मिनेटपछि ती प्रहरी जवान चौधरी युवतीको कोठामा पुगेको रिसोर्टका प्रवन्धक विष्णु भट्टले बताए।

प्रहरी जवान चौधरीले सरकारी रातो रंगको मोटरसाइकल प्रयोग गरेका थिए । घटनाका सन्दर्भमा प्रहरी नायव उपरीक्षक न्यौपानले शवको पोर्टमार्टम गर्नुपर्ने र पीडित पक्षले किटानी जाहेरी दर्ता गरेपछि थप अनुसन्धान गरिने बताए ।

मृतक युवतीसँगै रिसोर्टमा बास बसेका प्रहरी जवान चौधरीलाई नियन्त्रणमा लिइसकेको प्रहरी स्रोतले जनाएको छ । मृतक युवतीका आफन्तहरूले युवतीले घरबाट आफ्ना सबै लुगा कपडा लिएर मंगलबार नै निस्केको बताएका छन् ।

घटनामा संलग्न जो भए कारवाही हुन्छ

डीएसपी न्यौपानेले बिहीबार बिहान मात्रै शवको पोष्टमार्टम हुने जानकारी दिए । उनले घटनाको सुक्ष्म ढंगबाट अनुसन्धान भइरहेको जिकिर गरे ।

‘घटना स्थलबाट मुचुल्का उठाएर ल्याइसकेका छौं। अब शव परिक्षणपछि मात्रै घटनाबारे रहस्य खुुल्ने छ’ उनले भने, ‘हत्या रहेछ भने चाहे जो सुकै होस दोषीलाई कारबाही हुन्छ । पद, पेसा, धर्म केही हेरिँदैन । कानुनअनुसार कारबाही हुन्छ ।’

लकडाउनका बेला बन्द रहेको होटलमा भएको सो घटना निकै रहस्यमय भएको स्थानीय बताउँछन् । मृतक युवतीका आफन्तहरूले प्रहरी जवान चौधरीका नाममा किटानी जाहेरी दिने तयारी गरेका छन् ।

प्रकाशित मिति: बुधबार, जेठ १४, २०७७ २०:४९