सिरहामा एसपीका सुरक्षा गार्ड र ड्राइभरमा कोरोना संक्रमण

A+ A A-

जिल्ला प्रहरी कार्यालय सिरहामा कार्यरत २ जना सुरक्षाकर्मीमा कोरोना संक्रमण पुष्टि भएको छ । ती दुबै जना प्रहरी उपरीक्षक उमाप्रसाद चतुर्वेदीसँगै रहँदै आएका थिए ।

एउटा सुरक्षा गार्ड तथा अर्को उनकै ड्राइभरमा कोरोना संक्रमण पाइएको जिल्ला प्रहरीले जनाएको छ ।प्रहरी उपरीक्षक चतुर्वेदीका पीएसओको रुपमा कार्यरत रहेका सुरक्षा गार्ड तथा एसपीको गाडी चलाउने ड्राइभर रहेका अर्का प्रहरीमासमेत कोरोना संक्रमण पोजिटिभ पाइएको हो ।

चतुर्वेदीले आफ्नो पीएसओ र ड्राइभरलाई संक्रमण देखिएको पुष्टि गरेका छन् । उनले भने, ‘आज बुधबार उहाँहरूमा कोरोनाको संक्रमण पुष्टि भएपछि मैले आफूलाई पनि आफ्नो निवासमा आइसोलेट गरेको छु । अहिले निवासमा नै बसेर फोनमार्फत जिल्लाको शान्ति सुरक्षा व्यवस्था संचालन गर्दै छु ।’

सप्तरीका गर्भवतीको पीसीआर रिपोर्ट नेगेटिभ

कञ्चनरुपमा मंगलबार मृत्यु भएकी गर्भवतीको पीसीआर रिपोर्ट नेगेटिभ आएको छ । कञ्चनरुप नगरपालिका-११ गोरपारकी २४ वर्षीया गर्भवती ममतादेवी माझीको पीसीआर रिपोर्ट नेगेटिभ आएको वीपी कोइराला स्वास्थ्य विज्ञान प्रतिष्ठान धरानले जनाएको छ ।

कोरोनाको संक्रमणले मृत्यु भएको आशंकापछि त्रसित जनजीवन रिपोर्ट नेगेटिभको खबर आएसँगै सामान्य बन्दै गएको स्थानीयले बताएका छन् । उच्च ज्वरो, खोकी, पखाला र श्वासप्रश्वासमा समस्या देखिएपछि कोरोना आशंकामा मृतकको स्वाब संकलन गरी मंगलबार प्रतिष्ठान पठाइएको थियो ।

मृतक महिलाको पीसीआर परीक्षणको रिपोर्ट नआउँदै मंगलबार शव व्यवस्थापन गरिएको थियो । कोरोना संक्रमित हुन सक्ने सम्भावनाका कारण छिटो शव व्यवस्थापन गर्नुपर्ने भएकाले मंगलबारनै ‘शव व्यवस्थापनसम्बन्धी संक्षिप्त कार्यविधि २०७६’ अनुसार दाहसंस्कार गरिएको थियो ।

मृतकको स्वाब धरान पठाएपछि उनको प्रत्यक्ष सम्पर्कमा आएका चिकित्सक, परिवारका सदस्य र दाहसंस्कारमा संलग्न व्यक्ति सेल्फ क्वारेन्टाइनमा बसेका थिए ।

१० दिनदेखि अत्यधिक ज्वरो, खोकी र श्वासप्रश्वासमा समस्या देखिएकी १८ साताकी गर्भवतीको घरमै मृत्यु भएको थियो ।