धनगढी उपमहानगरका मेयर कार्यकर्ता खटाएर रानाथारू भाषाको इतिहास लेखाउँदै

A+ A A-

धनगढी उपमहानगरपालिका मेयर नृपबहादुर वडले आफ्ना कार्यकर्ता लगाएर रानाथारूको भाषा लेखन कार्य सुरू गरेका छन् ।

उममहानगरपालिकाले आर्थिक सहयोग गरेर पूर्वसांसद प्यारे लाल राना, जीवन राना, वडा नम्बर ७ अध्यक्ष सीताराम राना र भक्तराज रानाको समूह बनाएर रानाथारू समुदायसँग सम्बन्धित रानाथारू भाषा लेखनको काम भइरहेको रानाथारू समाजका १ केन्द्रीय सदस्यले जानकारी दिए ।

राना थारूहरूको बढी बसोबास भएका जिल्ला कैलाली, कञ्चनपुर हुन् । पछिल्लो समयमा रानाथारू समुदायलाई नेपालको आदिवासी समुदायमा सुचिकृत गर्न लामो संर्घष गरेको संस्था नेपाल रानाथारू समाजलाई नै वाइपास गरेर भाषा लेखन कार्य सुरू गरेकाले समाजले विरोध जनाएको छ ।

एक केन्द्रीय सदस्यले भने, ‘हाम्रो साझा संस्थाले लामो संघर्ष गरेर रानाथारु समुदायलाई नेपालको आदिवासी समुदायमा सुचिकृत गर्‍यो । तर, अहिले भाषा लेख्नको लागि समाजलाई वाइपास गरेर उपमहानगरपालिकाको पैसामा कार्यकर्ता पाल्ने काम भएको छ । संस्थासँग कुनै सरसल्लाह नै नगरी लेखेको भाषा आफूहरूलाई मान्य हुँदैन ।’

समग्र रानाथारू समुदायको प्रत्यक्ष सरोकारसँग जोडिने यस्ता महत्वपूर्ण विषयमा सम्पूर्ण रानाथारूको मूल संस्था नेपाल रानाथारू समाजलाई समेत बाइपास गर्ने गरी निहीत स्वार्थ पूरा गर्ने गरी यस्तो काम भइरहेको संस्थाले आरोप लगाएको छ ।

यस्ता कार्यलाई तत्काल सच्याउनु धनगढ़ी उपमहानगरपालिका लगायत व्यक्तिहरूलाई अनुरोधसमेत गरिएको ती केन्द्रीय सदस्यले जानकारी दिए । यदि समाजको यो अनुरोधलाई लत्याएर यसप्रकारको गतिविधि भएमा नेपाल रानाथारू समाज कदापि स्वीकार नगर्ने उनले बताए ।

सामाजिक कामहरू सबै मिलेर सहकार्यमा हुँदा समुदायलाई लाभ हुने तर समाजलाई नै गुमराहमा राखी गरिने कार्यले समाजलाई नकारात्मक सन्देश दिनेसमेत उनले बताए ।

प्रकाशित मिति: मंगलबार, जेठ १३, २०७७ २१:५४