रुकुम 'हत्याकाण्ड' मानवताविरुद्धको बर्बर र नृशंस अपराध : साझा पार्टी

फाइल तस्वीर

A+ A A-

साझा पार्टीले रुकुम पश्चिममा आफ्नी प्रेमिकासँग बिहे गर्न गएका भनिएका दलित युवा नवराज विश्वकर्मा र उनका २ जना साथीको हत्या भएको घटनालाई मानवताविरुद्धको बर्बर र नृशंस अपराध भनेकाे छ । मंगलबार साझा पार्टीका संयाेजक रविन्द्र मिश्रले विज्ञप्ति निकालेर घटनाकाे गम्भीर छानबिन गरी दाेषीलाई कारबाही गर्न मागसमेत गरेका छन् ।

आक्रमणमा सत्तारूढ दलको वडा अध्यक्षकाे समेत संलग्नता रहेकाे समाचारलाई उनले झनै चिन्ताजनक भनेका छन् ।

'सो घटनामा थप पाँच जना बेपत्ता भएको र पाँच जना घाइते भएको बताइएको छ। सत्तारूढ दलको वडा अध्यक्षसमेत आक्रमणमा संलग्न भएको समाचार झनै चिन्ताजनक छ', विज्ञप्तिमा भनिएकाे छ ।

घटनालाई सामसुम पार्न राजनीतिक सकृयता बढेको चर्चा चलेकाे भन्दै मिश्रले घटनाकाे छानबिन गर्न गठित समिति राजनीतिक प्रभावबाट मुक्त हुनुपर्नेमा जाेड दिएका छन् । 'घटनाबारे छानबिन गर्न गृह मन्त्रालयले पाँच सदस्यीय समिति गठन गरेकाे त छ तर, घटनालाई सामसुम पार्न राजनीतिक सकृयता बढेको चर्चा चलिरहँदा छानबिन समिति राजनीतिक प्रभावबाट मुक्त होस् भनी साझा पार्टी खबरदारी गर्दछ।'

पछिल्लो योलगायत मुलुकका अन्य क्षेत्रमा पनि बारम्बार भइरहने दलितविरुद्धको भेदभावले नेपालको संविधानले न्यायपूर्ण, भेदभावरहित र समावेशी समाजको परिकल्पना गरे पनि गाउँ-गाउँसम्म आफ्नो प्रभुत्व र प्रभाव रहेका राजनीतिक दल र समाजका अगुवाले जातीय भेदभावको मध्ययुगीन पाशविक कृत्यलाई हटाउन नसकेको विज्ञप्तिमा उल्लेख गरिएकाे छ ।

'जातीय विभेद तथा छुवाछुत अन्त्य गर्नको लागि संवैधानिक र कानूनी व्यवस्था गरेरमात्र पुग्दैन। त्यसको प्रभावकारी, व्यवहारिक कार्यान्वयनका लागि उपयुक्त संयन्त्रको निर्माण गरियाेस्, दोषीमाथि कडाभन्दा कडा सजायँको स्पष्ट व्यवस्था गरियाेस् र राष्ट्रियस्तरमै सामाजिक सचेतना कार्यक्रमहरू सुरु गरोस् भनी साझा पार्टी जोडदार माग गर्द', साझा पार्टी संयाेजक मिश्रले विज्ञप्तिमा भनेका छन् ।

साझा पार्टी छुवाछुत तथा जातीय विभेदविरुद्ध शून्य सहनशीलतामा विश्वास गर्ने भन्दै उनले आफ्ना सदस्यलगायत आम सर्वसाधारणलाई अग्रपंक्तिमा रहेर विभेदविरुद्ध काम गर्न आग्रह पनि गरेका छन् ।

प्रकाशित मिति: मंगलबार, जेठ १३, २०७७ १७:२५