यसकारण बढिरहेका छन् प्रदेश २ मा कोरोना संक्रमित

A+ A A-

प्रदेश-२ मा कोरोना संक्रमितको संख्या दिनानुदिन बढिरहेको छ । प्रदेश २ को विभिन्न जिल्लामा २ सय ३२ जना संक्रमित भेटिएको पुष्टि भएको छ ।

आज थप प्रदेश-२ सरकारले रौतहटमा २१ जना महोतरीमा २ जना र बारामा ३ जना कोरोना संक्रमितहरू थपिएका छन् । योसँगै प्रदेशमा कोरोना संक्रमितको संख्या २ सय ६५ जना पुगेको जनाएको छ । प्रदेश सरकारले बताए पनि स्वास्थ्य मन्त्रालयले औपचारिक रूपमा जानकारी दिएको छैन ।

सोमबार मात्रै एकै दिन ५४ जना संक्रमित थपिएका छन् । स्वास्थ्य तथा जनसंख्या मन्त्रालयले सोमबार सार्वजनिक गरेको ७२ जना संक्रमितमध्ये ५४ जना प्रदेश २ कै छन् ।

सबैभन्दा बढी रौतहटमा थपिएका छन् । रौतहटमा २६ जना थपिँदा बारामा २३ जना थपिएका छन् । धनुषामा ३ जना र सप्तरीमा २ जना थपिएका छन् ।

सबैभन्दा बढी संक्रमित पर्सा जिल्लामा छन् । पर्सामा ९० जना, रौतहटमा ५२ जना, बारामा ३६ जना, सर्लाहीमा ३४ जना, धनुषामा ११ जना, महोत्तरी र सप्तरीमा ४/४ जना र सिरहामा १ जना संक्रमित देखापरेका छन् ।

संक्रमितमध्ये ५ जना यस प्रदेशका स्थायी बासिन्दा भए पनि काठमाडौंमै बस्दै आएका छन् । संक्रमितको विभिन्न ठाउँको आइसोलेसनमा उपचार भइरहेको छ । प्रदेश २ मा संक्रमितको संख्या बढनुमा भारतबाट आएकाहरू नै बढी रहेको स्वास्थ्यकर्मीहरू बताउँछनु ।

कोही रोजगारीको क्रममा भारततर्फ गएका थिए भने अन्य कार्यका लागि भारत गएकोमा पनि कोरोना फैलिएको छ । बाहिरबाट आउनेमा कोरोना फैलिने खतरा हुँदा पनि खुल्ला सीमानाका मौका छोपी अहिले पनि भारततर्फबाट आउने क्रम जारी नै रहेको छ ।

जेठ ४ देखि १० गतेसम्ममा ६ सय २१ जना धनुषा भित्रिएका जिल्ला प्रहरी कार्यालय धनुषाले जनाएको छ । ४ गते ६१ जना, ५ गते ६९ जना, ६ गते ३६ जना, ७ गते ८१ जना, ८ गते ६० जना, ९ गते २०७ जना, १० गते १ सय १३ जना नेपाली उक्त नाकामार्फत् भित्रिएका हुन् ।

रोजगारीका सिलसिलामा भारतका विभिन्न सहरमा रहेका २६ सय ४० जना पछिल्लो एक साता रौतहट भित्रिएका थिए । उनीहरू सबै स्थानीय तहको क्वारेन्टाइनमा रहेको रौतहटका प्रमुख जिल्ला अधिकारी बासुदेव घिमिरेले बताए ।

सूचनाविनानै प्रदेश २ का ८ वटै जिल्लामा धेरै नेपाली बहिरबाट भित्रिएको बताइएको छ । बाहिरबाट आएकाहरूको खोजी गर्न कुनै निकाय गम्भीर नदेखिएको बुद्धिजीवीको आरोप छ । 'राज्य नै गम्भीर छैन भने कसले के गर्छन्' चैम्बर अफ कर्मस जनकपुरधामका उपाध्यक्ष सरोज मिश्रले भने ।

संक्रमितमध्ये वीरगञ्जबाट सोमबारसम्म ७२ जना कोरोना संक्रमित निको भएर घर फर्किसकेका छन् । यसअघि आइतबार राति एकै परिवारका १८ जना संक्रमित कोरोना निको भएर घर फर्किएका थिए भने जेठ १० गते ९ जना संक्रमित डिस्चार्ज भएका थिए । जसमध्ये २ जना पुनः संक्रमण देखा परेर भर्ना भएका व्यक्ति थिए ।

यस्तै, वैशाख १४ गते ४ जना संक्रमित डिस्चार्ज भएका थिए । तर, २ जनामा पुनः संक्रमण देखिएपछि अस्पताल भर्ना भएको सामाजिक विकास मन्त्रालयले जनाएको छ ।

भारतबाट ६ हजारभन्दा बढी आए

भारतबाट १ सातामै प्रदेश २ का जिल्लामा साढे ६ हजारभन्दा धेरै मानिस आएका छन् । जेठ ६ देखि १२ गतेसम्म प्रदेश २ मा ६ हजार ७ सय १३ जना मानिस भारतबाट आएका प्रदेशको सामाजिक विकास मन्त्रालयले जनाएको छ । यी मानिसहरूलाई राख्न १ सातामा थप ७८ क्वारेन्टाइन थपिएको छ ।

मन्त्रालयका अनुसार ६ जेठसम्म २ सय वटा क्वारेन्टाइनमा ६ हजार ७ सय १० बेड भएकामा १२ जेठसम्म २ सय ७८ क्वारेन्टाइनमा १४ हजार २ सय ३२ बेड संख्या पुर्‍याइएको छ ।

६ जेठसम्म क्वारेन्टाइनमा ३ हजार ९ सय ८४ जना रहेकामा १२ जेठसम्म १० हजार ६ सय ८७ जना पुगेका छन् । प्रदेश २ मा अधिकांश क्वारेन्टाइन सामुदायिक विद्यालयमा बनाइएको छ ।

जनकपुरधाम उप-महानगरपालिकाले अघिल्लो हप्ता गोपाल दास धर्मशालालाई क्वारेन्टाइन बनाएको छ । ५० बेड क्षमताको उक्त क्वारेन्टाइनमा बस्नेको संख्या अहिले ७५ पुगेको छ । भारतबाट आउनेको संख्या ह्वात्तै बढेपछि हप्ता दिनमै क्वारेन्टाइन भरिभराउ बनेको छ ।

भारतबाट धमाधम मानिसहरू स्वदेश फर्किन थालेपछि उपमहानगरपालिकाले मंगलबारदेखि वडा नम्बर २० को बसहियामा अर्को क्वारेन्टाइन सञ्चालनको तयारी गरेको प्रमुख प्रशासकीय अधिकृत गोपाल रेग्मीले जानकारी दिए ।

सप्तरीको सीमावर्ती बलान बिहुल गाउँपालिकामा पछिल्लो हप्ता भारतबाट १ सय ५१ जना आएका छन् । लकडाउन अवधीभर १ सय ८५ जना आए पनि ३२ जना परीक्षणपछि घर गइसकेको गाउँपालिका अध्यक्ष दयानन्द गोइत बताउँछन् ।

कोरोना संक्रमण फैलिन नदिन २०७६ चैत ११ गतेबाट लकडाउन सुरु भएदेखि नै सीमामा व्यापक मात्रामा सुरक्षाकर्मी खटाएर आवतजावतमा रोक लगाइएको थियो । तर, गएको ४ जेठदेखि सीमानाका खुकुलो बनाएसँगै प्रदेश २ का ८ वटै जिल्लामा भारतबाट भित्रिनेको संख्या अत्यधिक बढेको छ । अहिले एउटा जिल्लामा दैनिक ५० जनाको हाराहारीमा मानिस भारतबाट आइरहेका छन् ।

जेठ ६ गतेसम्म प्रदेश २ मा ६ हजार ७ सय १० बेड भएको २ सय क्वारेन्टाइन थियो र त्यहाँ ३ हजार ९ सय ८४ जना मानिसलाई राखिएको थियो । जेठ १२ गते सोमबारसम्ममा क्वारेन्टाइन बेड संख्या १४ हजार २ सय ३२ पुग्यो भने त्यहाँ १० हजार ६ सय ९७ जना बसेका छन् ।

क्वारेन्टाइन नथप्ने जिल्ला सर्लाही र बारा मात्रै छन् । सर्लाहीमा ३९ र बारामा १७ वटा क्वारेन्टाइन रहेको छ । सरकारी तथ्यांक बाहेकपनि निकै संख्यामा भारतवाट धेरैजना नेपाल भित्रिएका छन् ।

प्रकाशित मिति: मंगलबार, जेठ १३, २०७७ १५:१४