आगामी ३ वर्षमा आइएफसीले नेपालको निजी क्षेत्रमा १ खर्ब २२ अर्ब लगानी गर्ने

A+ A A-

विश्व बैंकअन्तर्गतको अन्तर्राष्ट्रिय मुद्रा कोष (आइएफसी) ले सन् २०२३ सम्ममा नेपालको निजी क्षेत्रमा १.२ अर्ब डलर लगानीको लक्ष्य राखेको जनाइएको छ । अहिलेको विनिमय दरअनुसार करिब १ खर्ब २२ अर्ब रुपैयाँ लगानी हुनेछ ।

आइएफसीले कोभिड-१९ बाट सिथिल नेपाली निजी क्षेत्रलाई गतिशील बनाउन आवश्यक भूमिका खेल्ने पनि जनाएको छ । नेपाल आर्थिक पत्रकार समाज (सेजन) ले राखेको अन्तरक्रियामा बोल्दै आइएफसीका नेपाल, बंलादेश र भुटानका लागि कन्ट्रिम्यानेजर वेण्डी वर्नरले सो कुरा बताएकी हुन् ।

हालको कोभिडको कठिन परिस्थितिमा नेपालका निजी क्षेत्रको भूमिका र आइएफसीका आगामी कार्यक्रम शीर्षकमा बोल्दै यस्तो अवस्थामा निजी क्षेत्रको भूमिका अत्यन्त महत्वपूर्ण हुने वर्नरले बताएकी छन् ।

काभिड-१९ को शुरुवातबाट नै नेपालका पर्यटनलगायतका सेवा क्षेत्र धराशायी भएको बताउँदै यसको असर भविष्यमा पनि केही समय रहिरहने बताएकी छन् । उनको भनाइमा आइएफसीले अन्तर्राष्ट्रियस्तरमा निजी क्षेत्रको पार्टनरको रूपमा काम गर्दै आएको छ ।

नेपालमा निजी क्षेत्रको इक्विटी लगानीकर्ताका रूपमा मात्र नभइ आइएफसीले बृहत्तर रूपमा सहयोगीको भूमिका खेल्ने जनाएकी छिन् । आइएफसीले विश्वव्यापी रूपमा कोभिड-१९ बाट आर्थिक क्षतिसँग जुध्न कुल ४८ मिलियन अमेरिकी डलरको प्याकेज अघि सारेको छ । यसबाट ३ सय संघ संस्थालाई प्रत्यक्ष रूपमा सहयोग उपलब्ध गराइरहेको छ ।

नेपालमा निजी क्षेत्रबाट सञ्चालित बैंक र लघुवित्त कम्पनीहरूलाई आइएफसीले सहयोग गर्दै आइरहेको छ । यस वर्ष लगुवित्तलगायत साना तथा मध्यम व्यवसायलाई पनि सहयोग उपलब्ध गराइने वर्नरले जनाएकी छन् ।

कोभिड-१९ बाट थलिएको अर्थतन्त्रमा यस्ता व्यवसायले रोजगारी सिर्जनामा महत्वपूर्ण भूमिका खेल्ने उनको भनाइ छ । यस वर्षको अन्तिमसम्म आइएफसीको नेपालमा लगानी ०.५ अर्ब अमेरिकी डलरको लगानी पुग्ने पनि वर्नरले जनाएकी छन् ।

प्रकाशित मिति: मंगलबार, जेठ १३, २०७७ १४:३९