जाजरकोट घटनालाई लिएर प्रतिनिधिसभा अवरुद्ध, गृहमन्त्रीसँग जवाफ माग

A+ A A-

जाजरकोट घटनालाई लिएर प्रतिनिधिसभा बैठक अवरुद्ध गरिएको छ । प्रतिपक्षी दल नेपाली कांग्रेस र संघीय समाजवादी दलका सांसदले जाजरकोट घटनालाई लिएर संसद अवरुद्ध गरेको हो ।

बैठक अवरुद्ध गरेपछि मिन विश्वकर्माले जाजरकोटको घटनामा सरकार गम्भीर नभएको आरोप लगाएका छन् । विश्वव्यापी रूमामा फैलिएको कोरोना भाइरसले नेपालमा ४ जनाको ज्यान जाँदा जाजरकोट घटनामा १ घण्टामै ६ जनाको ज्यान जाँदा पनि सरकार गम्भीर नभएको उनले आरोप लगाए ।

उनले त्रिशुलीमा बस खस्दा छानबिन समिति बनाउने तर जाजरकोट घटनामा छानबिन समिति नबनाएको भन्दै आक्रोश व्यक्त गरे । उनले उक्त घटनाका सम्बन्धमा गृहमन्त्री रामबहादुर थापा बादलसँग जवाफसमेत भाग गरेका छन् ।

शनिबार बेलुकी रुकुम पश्चिम चौरजहारी नगरपालिका–८ सोतीस्थित मल्ल थरकी युवतीलाई लिन गएका युवा र गाउँलेको बीचमा भएको झडपमा परी बेपत्ता भएका ३ जना युवाको शव फेला परेको छ । अझै ४ जना बेपता भएको बताइएको छ । प्रहरीका अनुसार जाजरकोटको भेरी नगरपालिका–४ का २१ वर्षीय युवा नवराज विककी प्रेमिका सोतीकी युवतीलाई लिन भनी १९ जना गएका थिए ।

सोतीमा गाउँले र ती युवाहरुबीच झडप हुँदा भेरी नगरपालिका–४ नवराज विक र चौरजहारी नगरपालिका–१ टीकाराम सुनार र भेरी नगरपालिका–४ गणेश बुढाको शव फेला परेको छ । सुनार र विकको शव आइतबार भेटिएको थियो भने गणेशको सोमबार भेटिएको छ । भेरी नगरपालिकाका सञ्जु विक, गोविन्द शाही, लोकेन्द्र सुनार र गोपाल बुढाथोकी शनिबारदेखि बेपत्ता छन् ।