दुग्धजन्य वस्तुको उत्पादनमा ५० प्रतिशत भ्याट छुट दिन व्यवसायीको माग

A+ A A-

डेरी उद्योगीले दग्ध जन्यवस्तुको उत्पादनमा ५० प्रतिशत भ्याट छुट पाउनुपर्ने माग गरेका छन् । कोरोना भाइरस (कोभिड-१९) को रोकथाम तथा नियन्त्रणका लागि सरकारले लकडाउन गरेपछि डेरी क्षेत्रमा असर परेको भन्दै उद्योगीले राहतस्वरूप भ्याटमा छुट दिनुपर्ने माग गरेका हुन् ।

नेपाल डेरी एसोसिएसनका महासचिव प्रल्हाद दाहालले सरकारले पहिला दिँदै आएको ५० प्रतिशत भ्याट छुट फेरी दिनुपर्ने बताए । पछिल्लो केही वर्ष यता सरकारले डेरी उद्योगहरूलाई दिँदै आएको भ्याट छुट रोकेको थियो ।

त्यस्तै, विद्युत् महसुलमा समेत ५० प्रतिशत छुट पाउनुपर्ने माग व्यवसायीहरूले गरेका छन् । उनले लकडाउनका कारण दूध संकलनमा समस्या भएको र ८० प्रतिशत बजार पनि बन्द भएको अवस्थामा किसान, वितरक र डेरी उद्योगी सबैलाई राहतको आवश्यकता रहेको बताए । लकडाउनपछि डेरी उद्योग सञ्चालन गर्न र किसानलाई भुक्तानी गर्न चालू पुँजीको अभाव हुने भएकोले सरकारले सहुलियतपूर्ण कर्जा उपलब्ध गराउनुपर्ने समेत व्यवसायीले माग गरेका छन् ।

यसबाहेक कर्जाको पुर्नतालीकिकरण गर्नसमेत महासचिव दाहालले माग गरे । सरकारले व्यावसायी र किसान दुवै पक्षलाई राहत नदिए लकडाउनपछि व्यावसाय बन्द गर्नुको विकल्प नभएको समेत उनले बताए ।

देशभर दैनिक ६२ लाख दूध उत्पादन हुँदा ३१ लाख लिटर दूध बजारमा आउँछ । त्यसमध्ये पनि करिब १७ प्रतिशत मात्र औपचारिक डेरी उद्योगबाट बजारमा दूध आउने गरेको छ । बाँकी ३३ प्रतिशत अनौपचारिक क्षेत्रबाट खुल्लारूपमा बजारमा आउने गर्छ ।

पछिल्लो समय लकडाउन भएपछि करिब ८० प्रतिशत दूधको बजार बन्द भएको छ । जसकारण डेरीसँग भएको करिब ५ अर्ब रुपैयाँ बराबरको दूधको स्टक बिक्री हुन सकेको छैन । त्यस्तै, दूध संकलन हुन नसक्दा ३ अर्ब रुपैयाँ बढीको नोक्सानी भएको महासचिव दाहालले बताए ।

प्रकाशित मिति: सोमबार, जेठ १२, २०७७ २०:०३