नेपालमा कति छन् कोरोना भाइरसविरुद्ध लड्ने स्वास्थ्य सामग्री ?

A+ A A-

स्वास्थ्य तथा जनसंख्या मन्त्रालयले कोरोना भाइरससँग लड्नका लागि मौज्दात रहेका स्वास्थ्य सामग्रीबारेमा जानकारी दिएको छ । स्वास्थ्य मन्त्रालयका व्यवस्थापन महाशाखाका निर्देशक भोगेन्द्रराज डोटेल यसबारेमा जानकारी दिएका हुन् ।

उनले यसअघि नेपालमा १ हजार ५ सय कोरोना भाइरसका केस हुन सक्ने आधार मानेर पूर्वानुमान गरी स्वास्थ्य सामग्रीको व्यवस्थापन गरिएको जानकारी दिँदै संक्रमित बढेसँगै उक्त निर्णयलाई पुनः अवलोकन गरिएको बताए । उनले अहिले ५ हजार केसलाई आधार बनाए स्वास्थ्य सामग्री व्यवस्थापनको काम भइरहेको बताए ।

'१ हजार ५ सय केस आधार मानेर पूर्वानुमान गरेको र केस बढेसँगै पुनरवलोकन गरिएको छ । ५ हजार केसलाई आधार बनाए काम भइरहेको छ,' उनले भने ।

हालसम्म स्वास्थ्य मन्त्रालयले प्राप्त गरेको भीटीएम १ लाख रहेकोमा जिल्ला र प्रदेशलाई ८८ हजार वितरण गरिएको र १२ हजार मौज्दात रहेको उनले बताए । उनले २ लाख ५ हजार भीटीएम खरिद प्रकिया अगाडि बढाइएको पनि जानकारी दिए ।

उनले स्वास्थ्य मन्त्रालयलाई १ लाख २८ हजार पीसीआर किट प्राप्त गरेको जानकारी दिँदै ७८ हजार बाँडिएको बताए । उनले स्वास्थ्य मन्त्रालयसँग ५० हजार मौज्दात रहेको बताउँदै १ लाख ७५ पीसीआर किट खरिद प्रकियामा रहेको जानकारी दिए ।

स्वास्थ्य मन्त्रालयले विभिन्न माध्यममाबाट १ लाख ७५ हजार आरडीटी किट प्राप्त गरेकोमा ८० हजार आरडीटी किट फिल्डमा रहेका छन् । तिनको रिपोर्ट आउने क्रम जारी रहेको स्वास्थ्य मन्त्रालयले जनाएको छ । संक्रमण बढ्दै गएको अवस्थालाई मध्यनजर गर्दै मन्त्रालयले थप १ लाख २१ हजार खरिद गर्ने प्रक्रिया अगाडि बढाएको छ ।

कोरोना भाइरस संक्रमण नियन्त्रण तथा रोकथामका लागि अति आवश्यक सामग्रीमध्येको पीपीई १ लाख ४६ हजार प्राप्त गरेको स्वास्थ्य मन्त्रालयका व्यवस्थापन शाखा प्रमुख डोटेलले बताए । प्राप्त पीपीईमध्ये ५४ हजार थान प्रदेश र जिल्लालाई वितरण गरिएको छ । ९२ हजार सेट पीपीई सेट स्वास्थ्य मन्त्रालयमा मौज्दात रहेका छन् ।

सेटभित्र १५ लाख मास्क, १ लाख ८० हजार एन९५ मास्क, २ लाख ७८ हजार ग्लोब , ५३ हजार सु-कभर, १७ हजार सर्जिकल क्याप, ६ सय थान आईआर थर्मल गन मौज्दात रहेको स्वास्थ्य मन्त्रालयले जनाएको छ ।

प्रकाशित मिति: सोमबार, जेठ १२, २०७७ १७:२९